অগপ দলৰ সভাপতি অতুল বৰাই ৩০ ডিচেম্বৰত এক সংবাদমেলৰ জৰিয়তে সমাগত নৱবৰ্ষ উপলক্ষে ৰাজ্যবাসীলৈ শুভেচ্ছা জ্ঞাপন কৰি নতুন বছৰটোত অসমৰ বিভিন্ন জাতি-জনগোষ্ঠীৰ মাজত ভাতৃত্ববোধৰ এনাজৰীডাল অধিক শক্তিশালী হোৱাৰ লগতে শান্তি-সমৃদ্ধিৰে অসমৰ সমাজ জীৱন জীপাল হৈ পৰাৰ আশা প্ৰকাশ কৰে।
সংবাদমেলতে অতুল বৰাই জাতীয় দায়বদ্ধতাক কান্ধপাতি নতুন বছৰত আঞ্চলিকতাবাদী ৰাজনীতিৰ সম্প্ৰসাৰণ সিদ্ধান্ত লোৱা বুলি ঘোষণা কৰে। লগতে জাতীয় সংকটৰ সময়ত সামূহিক প্ৰচেষ্টাৰ অত্যন্ত প্ৰয়োজন আৰু এই প্ৰচেষ্টাত চামিল হ’বলৈ অগপ বদ্ধপৰিকৰ বুলি উল্লেখ কৰি জাতীয় সংকট প্ৰতিহত কৰা আৰু আঞ্চলিকতাবাদক আগবঢ়াই নিয়াৰ ক্ষেত্ৰত দলটো দায়বদ্ধ বুলিও স্পষ্ট কৰে।
সভাপতি গৰাকীয়ে সাম্প্ৰতিক সময়ত অসমৰ অস্তিত্ব, ভাষা-সংস্কৃতিৰ প্ৰতি প্ৰচণ্ড ভাবুকি অহা বুলি সদৰী কৰি এই ভাবুকি ঐক্যবদ্ধভাৱে প্ৰতিহত কৰিব লাগিব বুলি কয়। জাতীয় জীৱনৰ সংকটৰ সময়ত সামূহিক প্ৰচেষ্টাৰ অত্যন্ত প্ৰয়োজন বুলি উল্লেখ কৰি তেওঁ নতুন প্ৰজন্মৰ চিন্তা-চৰ্চাক জাতীয় চেতনাৰে দায়বদ্ধ কৰি ৰাজ্যখনক নতুন গতিপথ দিয়াৰ সময় সমাগত বুলিও কয়।
তাৰোপৰি নতুন বছৰত নতুন প্ৰজন্ম আৰু মহিলা সামজক বিশেষভাৱে অগ্ৰাধিকাৰ দি ব্যাপক গণসংযোগেৰে আঞ্চলিক ৰাজনীতিত নতুন গতি দিবৰ বাবে কাম কৰাৰ প্ৰতিশ্ৰুতিও দিয়ে অগপৰ সভাপতি অতুল বৰাই।