”আমি চৰকাৰৰ পৰা সহজে আঁতৰি নাহো। বাহিৰলৈ ওলাই আহিলে সমস্যাৰ সমাধান নহয়। চৰকাৰৰ ভিতৰত থাকি আমি যুঁজি যাম নাগৰিকত্ব সংশোধনী বিধেয়কৰ বিৰুদ্ধে। পূৰ্বতে আই এম ডি টি আইন থকাৰ বাবে আমি বিদেশী চিনাক্ত কৰিব পৰা নাছিলো। কিন্তু এতিয়া আৰু কোনো আপোচ কৰা নহ’ব। বিদেশী বহিস্কাৰ কৰিব নোৱৰাৰ বাবেই অসমৰ ৰাইজে আমাক পিছৰ পৰ্যায়ত ক্ষমতালৈ আহিব দিয়া নাই।‘’ এই মন্তব্য অগপৰ সভাপতি তথা কৃষিমন্ত্ৰী অতুল বৰাৰ।
শুকুৰবাৰে নগাঁও জিলাৰ বঢ়মপুৰত পৰম্পৰা নাৰিকল উৎপাদন আঁচনিৰ এখন প্ৰদৰ্শনী মূলক সজাগতা সভাত উপস্থিত থাকি সাংবাদিকে সোধা এক প্ৰশ্নৰ উত্তৰত অতুল বৰাই এইদৰে কয়।
তেওঁ কয়, ‘’প্ৰধান মন্ত্ৰী নৰেন্দ্ৰ মোডীৰ কথাত আস্বস্ত হৈ আমি বিজেপিক সংগ দিছিলো। কিন্তু বৰ্তমান বিজেপিৰ যি ধৰ্মৰ নামত ভাগ ভাগ কৰা নীতি অৱলম্বন কৰিছে নাগৰিকত্ব সংশোধনী বিধেয়কৰ বিৰোধিতাৰ জৰিয়তে সেই আইনখন প্ৰতিহত কৰাই অগপৰ মূল লক্ষ্য। আমি ভিতৰত থাকি যি যুঁজ কৰিছো সেয়াই শক্তিশালী যুঁজ। শেষ মুহূৰ্তলৈকে আমি যুজি যাম।”
তদুপৰি, আগন্তুক লোকসভা নিৰ্বাচনত কেন্দ্ৰীয় চৰকাৰৰ নাগৰিকত্ব সংশোধনী বিধেয়কৰ স্থিতিৰ ওপৰত ভিত্তি কৰিব অগপ কাৰ লগত থাকিব বুলিও মন্ত্ৰীগৰাকীয়ে এক গুৰুত্বপূৰ্ণ মন্তব্য প্ৰদান কৰে। আনহাতে, ২৬ টাকৈ বঙালী সংগঠনে আয়োজন কৰিবলৈ লোৱা গণ সমাৱেশখনক সম্পূৰ্ণ ৰূপে বিৰুদ্ধচাৰণ কৰে মন্ত্ৰী অতুল বৰাই।
ৱমেন এণ্ড চাইল্ড ডেভেলপমেন্ট ছ’চাইটি নামৰ এটা স্বেচ্ছাসেৱী সংগঠনে আয়োজন কৰা প্ৰদৰ্শনীখনত অসম চৰকাৰৰ কৃষি তথা পশুপালন বিভাগৰ মন্ত্ৰী অতুল বৰা, বঢ়মপুৰ সমষ্টিৰ বিধায়ক প্ৰফুল্ল কুমাৰ মহন্ত, জিলা উপায়ুক্ত বিশ্বজিৎ পেগু, কেইবাজনো বিজ্ঞানী, বিভাগীয় উচ্চ পদস্থ বিষয়াৰ লগতে কেইবাজনো বিশিষ্ট ব্যক্তি উপস্থিত থাকে।
