সৰুক্ষেত্ৰী বিধানসভা সমষ্টিত অসম গণ পৰিষদৰ কয়াকুছিস্থিত মুখ্য নিৰ্বাচনী কাৰ্যালয় জ্বলাই লণ্ড ভণ্ড কৰিলে অসম গণ পৰিষদৰ দলীয় কৰ্মীয়ে।
বিজেপিৰ মিত্ৰজোঁটে অগপক এৰি দিয়া সমষ্টিটো সংগীত শিল্পী কল্পনা পাটোৱাৰীয়ে অগপৰ হৈ প্ৰতিদ্বন্দ্বিতা কৰিছে।
উল্লেখ্য যে শুকুৰবাৰে প্ৰাৰ্থী কল্পনা পাটোৱাৰীৰ সমৰ্থন সমষ্টিটোত ৰোড শ্ব’ তথা বাইক ৰেলী উলিওৱা হৈছিল।
প্ৰাৰ্থী কল্পলা পাটোৱাৰীৰ লগতে অগপৰ সভাপতি অতুল বৰা আৰু কাৰ্যকৰী সভাপতি কেশৱ মহন্তই অংশগ্ৰহণ কৰা ৰোড শ্ব’টোৰ সমাপ্ত হোৱাৰ পিছতে ক্ষুব্ধ অগপ কৰ্মীসকলে মুখ্য নিৰ্বাচনী কাৰ্যালয়টোত থকা চকী মেজ ভাঙি লণ্ড ভণ্ড কৰাৰ লগতে জ্বলাই দিয়ে।
ইফালে বাইক ৰেলীত অংশগ্ৰহণ কৰা দলীয় কৰ্মীসকলে অভিযোগ কৰি কয় যে বাইক ৰেলীত অংশগ্ৰহণ কৰাৰ সময়ত নেতাসকলে দলীয় কৰ্মীসকলক পানী যোগান নিদিয়াৰ লগতে ধন দিয়া নাছিল। যাৰ ফলত ক্ষুব্ধ দলীয় কৰ্মীসকলে কাৰ্যালয়টো লণ্ড ভণ্ড কৰাৰ লগতে জ্বলাই দিয়ে।
“ওপৰ পৰা পইচা দিছে, কিন্তু আমাক পইচা দিয়া নাই। আৰু আমাক চাহ দিয়া নাই, পানী এবটলো দিয়া নাই। পইচা দিয়া নাই কাৰণে সকলোৱে ভাঙিছে।” ক্ষুব্ধ দলীয় কৰ্মীয়ে এইদৰে কয়।
ইফালে সমষ্টিটোৰ অগপৰ নেতাই ঘটনাটোত কোনো তৃতীয় পক্ষ জড়িত আছে বুলিও দাবী কৰিছে।
ইফালে ঘটনা সন্দৰ্ভত আৰক্ষীৰ ওচৰত অভিযোগ দাখিল কৰা হৈছে আৰু আৰক্ষীয়ে ঘটনাৰ সন্দৰ্ভত তদন্ত আৰম্ভ কৰিছে।
