নাগৰিকত্ব সংশোধনী বিধেয়ক সন্দৰ্ভত পুনৰ এবাৰ সৰৱ হৈ উঠিল ৰাজ্য চৰকাৰৰ অংশীদাৰী দল তথা অন্যতম প্ৰধান আঞ্চলিক ৰাজনৈতিক দল অগপ। বিজেপিৰ কেন্দ্ৰীয় কাৰ্যনিৰ্বাহকত ৰাষ্ট্ৰীয় অধ্যক্ষ অমিত শ্বাহে বিধেয়কখন কাৰ্যকৰী কৰাৰ ইংগিত বহন কৰাৰ পাছতে অগপই তৎপৰতাৰে মঙলবাৰে মুখ্য মন্ত্ৰী সৰ্বানন্দ সোণোৱালক সাক্ষাৎ কৰি বিধেয়কখন বাতিল কৰিবলৈ আহ্বান জনায়।
উল্লেখ্য যে বিগত কিছুদিনৰ পৰা বিধেয়কখনৰ প্ৰসংগত ৰাজ্যৰ দল-সংগঠনবোৰ মৌন হৈ থকাৰ সময়তে বিজেপিৰ কাৰ্যনিৰ্বাহকত দলটোৰ ৰাষ্ট্ৰীয় অধ্যক্ষ অমিত শ্বাহে হিন্দু বাংলাদেশী নাগৰিকৰ সংস্থাপনৰ বাবে বিধেয়কখন কাৰ্যকৰী কৰাৰ পোষকতা কৰিছিল। শ্বাহৰ এই মন্তব্যৰ পাছতে এতিয়া পুনৰ এবাৰ অসমত নাগৰিকত্ব বিধেয়কখনৰ প্ৰসংগত সৰৱ হৈ পৰিছে অসম গণ পৰিষদৰ লগতে বিভিন্ন দল-সংগঠন।
মঙলবাৰে আঞ্চলিকতাবাদী দলটোৰ সভাপতি অতুল বৰাৰ নেতৃত্বত যোৱা বিধায়িনী দলে বিধেয়কখনৰ প্ৰসংগত মুখ্য মন্ত্ৰী সোনোৱালৰ সৈতে প্ৰায় ডেৰ ঘণ্টা ধৰি আলোচনা কৰি বিধেয়কখনৰ তীব্ৰ বিৰোধিতা কৰে। নিশা প্ৰায় ৮ বজালৈ চলা আলোচনাত অগপই নাগৰিকত্ব সংশোধনী বিধেয়কে নহয় অসম চুক্তিক আঘাত হনা কোনো কামেই কৰিবলৈ নিদিও বুলি সোণোৱালৰ আগত স্পষ্ট ৰূপত উল্লেখ কৰে।
বহু বিতৰ্কিত বিধেয়কখনৰ উপৰিও অগপ বিধায়িনী দলে এন আৰ চিত দেখা দিয়া বিভিন্ন বিসংগতি সম্পৰ্কতো মুখ্য মন্ত্ৰীক অৱগত কৰায়। তাৰোপৰি উক্ত বৈঠকত ৰাজ্যৰ বিভিন্ন সমস্যা আৰু উন্নয়নমূলক কাম-কাজক লৈও আলোচনা কৰে আঞ্চলিক দলটোৱে।
বৈঠকৰ অন্তত অগপই নাগৰিকত্ব সংশোধনী বিধেয়ক কোনো কাৰণতেই মানি নলয় বুলি সংবাদ মাধ্যমক স্পষ্টকে জনাই দিয়ে দলৰ সভাপতি তথা ৰাজ্য চৰকাৰৰ কৃষি মন্ত্ৰী অতুল বৰাই।
আনহাতে কালি সন্ধিয়া অনুষ্ঠিত হোৱা এই গুৰুত্বপূৰ্ণ বৈঠকত মুখ্য মন্ত্ৰীৰ লগতে ৰাজ্য চৰকাৰৰ অন্যতম প্ৰভাৱশালী মন্ত্ৰী ড০ হিমন্ত বিশ্ব শৰ্মাও উপস্থিত থাকে।