লোকসভা নিৰ্বাচন সমাগত। গতিকে এতিয়া ৰাজ্যৰ চৌদিশে ৰাজনীতিৰ গৰম বতাহ বলিছে। এনে সময়তে প্ৰশ্ন হৈছে কোনে কাৰ সৈতে মিত্ৰতাৰে নামিব নিৰ্বাচনী যুঁজত? যিহেতু নাগৰিকত্ব সংশোধনী বিধেয়ক ৰাজ্যসভাত উত্থাপন নহ’ল তাৰ পৰিপ্ৰেক্ষিতত পুনৰ হ’ব নেকি অগপ-বিজেপিৰ মিত্ৰতা?
এই বিষয়টোক কেন্দ্ৰ কৰি সুযোগ সন্ধানী অগপ দলৰ মজিয়াত কেইবাখনো গুৰুত্বপূৰ্ণ বৈঠক অনুষ্ঠিত হ’ল যদিও কাৰ সৈতে মিত্ৰতা কৰিব নে অকলেই নিৰ্বাচনত অৱতীৰ্ণ হ’ব সেয়া এতিয়াও স্পষ্ট কৰা নাই।
ইযাৰ মাজতে বিজেপিৰ ৰাজ্যিক সভাপতি ৰঞ্জিত দাসে সংবাদ মাধ্যমৰ আগত কৈছিল যে হিন্দু বাংলাদেশীক সংস্থাপন দিয়াটো যদি অগপই মানি লয় তেতিয়াহে তেওঁলোকে অগপৰ সৈতে মিত্ৰতা কৰিব। ৰঞ্জিত দাসে এইদৰে নিজৰ স্থিতি স্পষ্ট কৰি দিছে বুলি বিজেপি দলৰে এক নিৰ্ভৰযোগ্য সূত্ৰই আমাক জানিবলৈ দিয়ে।
সুত্ৰটোৱে জনোৱা অনুসৰি ‘অগপই যদিহে আমাৰ সৈতে মিত্ৰতা কৰিব বিচাৰে তেন্তে হিন্দু বাংলাদেশী সংস্থাপন দিব বিচৰা আইনখন মানি ল’ব লাগিব বুলি অমিত শ্বাহে স্থিতি স্পষ্ট কৰি দিছে। লগতে অগপই অমিত শ্বাহলৈ মিত্ৰতা কৰিম বুলি পত্ৰ প্ৰেৰণ কৰিব লাগিব।‘
সুত্ৰটোৱে আমাক জনোৱা অনুসৰি অতুল বৰা, কেশৱ মহন্তকে ধৰি আন কেইবাজনো নেতাই ইতিমধ্যে দিল্লীত বাহৰ পাতি আছে। তদুপৰি দিল্লীত বিজেপিৰ উচ্চস্তৰীয় নেতাৰ সৈতে অগপৰ দুই তিনিখন গোপন বৈঠক অনুষ্ঠিত হৈছে বুলিও সুত্ৰটোৱে জানিবলৈ দিয়ে।
প্ৰসংগক্ৰমে উল্লেখ কৰিব পাৰি যে, মিত্ৰতা ছেদৰ পাছতে যোৱা ৯ জানুৱাৰিত অগপৰ তিনি মন্ত্ৰীয়ে পদত্যাগ পত্ৰ মুখ্য মন্ত্ৰীৰ হাতত অৰ্পণ কৰিছিল যদিও এতিয়ালৈকে ৰাজ্যপালৰ হাতত এই পদত্যাগ পত্ৰ পৰাগৈ নাই।
তাৎপয্যপূৰ্ণভাৱে বিজেপিৰ ৰাষ্ট্ৰীয় সভাপতি অমিত শ্বাহৰ নিৰ্দেশ অনুসৰিয়েই মুখ্য মন্ত্ৰীয়ে বৰ্তমানলৈকে ৰাজ্যপাললৈ অগপ মন্ত্ৰীৰ পদত্যাগ পত্ৰ প্ৰেৰণ কৰা নাই বুলি গোপন সুত্ৰৰ পৰা খবৰ পোৱা গৈছে। এই ক্ষেত্ৰত সম্পূৰ্ণৰূপে বিজেপি-অগপৰ মিত্ৰতা নুই কৰিব নোৱাৰি।
তেনে সময়তে অগপৰ জ্যেষ্ঠ নেতৃত্ব কমলা কলিতাই খাদী আৰু গ্ৰামোন্নয়ন বৰ্ডৰ অধ্যক্ষ পদ খামুচি ধৰি ৰখা কথাটোৱেও বিশেষ তাৎপৰ্য্য বহন কৰিছে।
বিজেপিয়ে যিহেতু অগপৰে মিত্ৰতাৰ প্ৰসংগত ‘হিন্দু বাংলাদেশী’ সংস্থাপনৰ ক্ষেত্ৰত ইতিমধ্যে নিজৰ স্থিতি স্পষ্ট কৰিলে, এই মুহূৰ্তত প্ৰশ্ন হয়, হিন্দু বাংলাদেশী সংস্থাপনৰ ইচ্ছুটো অগপই লুকুৱাই ৰাখি পুনৰ ‘অসম চুক্তি ৰূপায়ণ, ৬ নং দফা কাৰ্য্যকৰীকৰণ, বিদেশী বহিস্কৰণ’ ইত্যাদি প্ৰসংগৰে বিজেপিৰে মিত্ৰতা কৰি অন্ধকাৰত ৰাখিব নেকি অসমৰ জনসাধাৰণক?
