অসমৰ নিৰ্বাচনত অল ইণ্ডিয়া ডেম’ক্ৰেটিক ফ্ৰণ্টৰ সৈতে হাত মিলালে ওৱাইছিয়ে। দিল্লীস্থিত বাসগৃহৰ পৰা সংবাদ মাধ্যমৰ সৈতে কথা পতাৰ সময়তে এ আই এম আই এমৰ মুৰব্বী আছাদুদ্দিন ওৱেইছিয়ে এক গুৰুত্বপূৰ্ণ ঘোষণা কৰে। আগন্তুক অসম বিধানসভা নিৰ্বাচনত তেওঁৰ দল AIMIM-এ অল ইণ্ডিয়া ইউনাইটেড ডেম’ক্ৰেটিক ফ্ৰণ্টক সমৰ্থন কৰিব। এই সিদ্ধান্ত এআইইউডিএফৰ মুৰব্বী মৌলানা বদৰুদ্দিন আজমলৰ অনুৰোধত লোৱা বুলি জানিব পৰা গৈছে।
ওৱাইচিয়ে কয় যে ‘বদৰুদ্দিন আজমল চাহাবৰ অনুৰোধত আমি এআইইউডিএফক সমৰ্থন কৰিম।‘ এই ঘোষণাৰ আঁৰত আছে এখন ব্যক্তিগত বৈঠক। ওৱাইচিয়ে কয় যে আজমলৰ পুত্ৰ তথা প্ৰাক্তন বিধায়ক আব্দুল ৰহমান আজমলে আজি দিল্লীস্থিত তেওঁৰ বাসগৃহত তেওঁক সাক্ষাৎ কৰিবলৈ আহিছিল। দুয়োৰে মাজত বিতং আলোচনা হয়। পিছত ওৱাইছিয়েও বদৰুদ্দিন আজমলৰ সৈতে ফোনযোগে কথা পাতে। তেওঁ লগতে ২ আৰু ৩ এপ্ৰিলত গুৱাহাটীত উপস্থিত হ’ব বুলিও জনায়।
তেওঁ এ আই ইউ ডি এফৰ প্ৰাৰ্থীৰ সমৰ্থনত কেইবাখনো ৰাজহুৱা সভাত ভাষণ দিব। অসমত ২০২৬ চনৰ ৯ এপ্ৰিলত বিধানসভা নিৰ্বাচন অনুষ্ঠিত হোৱাৰ কথা। ১২৬খন আসনৰ এই নিৰ্বাচনত ৰাজনৈতিক সমীকৰণ নতুনকৈ গঢ়ি তোলাৰ প্ৰয়াস কৰা হৈছে। সংখ্যালঘুৰ এক বৃহৎ অংশ বিশেষকৈ অসমৰ মুছলমান সম্প্ৰদায়ৰ মাজত দীৰ্ঘদিন ধৰি প্ৰভাৱশালী হৈ আহিছিল AIUDF। কিন্তু যোৱা কেইটামান নিৰ্বাচনত তেওঁলোকৰ আসনৰ সংখ্যা হ্ৰাস পাইছে।
আনহাতে, হায়দৰাবাদস্থিত দল যদিও এআইএমআইএম দেশৰ বিভিন্ন প্ৰান্তত সংখ্যালঘু ভোটৰ ৰাজনীতিত সক্ৰিয়। ৰাজনৈতিক মহলৰ এটা অংশই ধাৰণা কৰে যে ওৱাইছিৰ এই সমৰ্থনে এ আই ইউ ডি এফক নতুন শক্তি দিব পাৰে। ইতিমধ্যে এই ঘোষণা সন্দৰ্ভত স্থানীয় ৰাজনৈতিক মহলত আলোচনা আৰম্ভ হৈছে। কংগ্ৰেছ দলৰ ভিতৰতো ইয়াক লৈ ৰণনীতি প্ৰস্তুত কৰাৰ চিন্তা আৰম্ভ হৈছে।
অসমত সংখ্যালঘু ভোটৰ এক বৃহৎ অংশ পৰম্পৰাগতভাৱে কংগ্ৰেছৰ ফালে গৈছে। যদি AIUDF আৰু AIMIM একেলগে কাম কৰে, তেন্তে সেই ভোটত বিভাজন আনিব পাৰে। এনে মিত্ৰতাই বিজেপি শাসিত অসম চৰকাৰৰ বিৰুদ্ধে বিৰোধী ঐক্য গঢ়ি তোলাৰ প্ৰচেষ্টাত এক নতুন মাত্ৰা যোগ কৰিব পাৰে। অৱশ্যে পূৰ্ণাংগ নিৰ্বাচনী মিত্ৰতা নে সাধাৰণ সমৰ্থন সেয়া এতিয়াও স্পষ্ট হোৱা নাই। ওৱাইছিয়ে কেৱল সমৰ্থন আৰু প্ৰচাৰৰ কথাহে কৈছে।
