বিমান যাত্ৰীসকলৰ বাবে কমেও ৬০ শতাংশ আসন নিৰ্বাচন বিনামূলীয়া কৰিবলৈ চৰকাৰে দিয়া নিৰ্দেশনাৰ তীব্ৰ বিৰোধিতা কৰিছে ইণ্ডিগ‘, এয়াৰ ইণ্ডিয়া আৰু স্পাইচজেটৰ দৰে আগশাৰীৰ বিমান সংস্থাসমূহে। এই বিমান সংস্থাসমূহক প্ৰতিনিধিত্ব কৰা ‘ফেডাৰেচন অৱ ইণ্ডিয়ান এয়াৰলাইনছ’ (FIA) চমুকৈ এফ আই এ-য়ে অসামৰিক বিমান পৰিবহণ মন্ত্ৰালয়ক এই সিদ্ধান্ত প্ৰত্যাহাৰ কৰিবলৈ আহ্বান জনাইছে। বিমান সংস্থাসমূহৰ দাবী যে চৰকাৰৰ এই পদক্ষেপে তেওঁলোকক বৃহৎ ৰাজহ লোকচানৰ সন্মুখীন কৰাব আৰু ইয়াৰ জোৰা মাৰিবলৈ তেওঁলোক সকলো যাত্ৰীৰ বাবে বিমানৰ যাত্ৰীভাৰা বৃদ্ধি কৰিবলৈ বাধ্য হ’ব।
যোৱা ১৮ মাৰ্চত অসামৰিক বিমান পৰিবহণ মন্ত্ৰালয়ে অসামৰিক বিমান চলাচল সঞ্চালকালয় (DGCA)-লৈ এক নিৰ্দেশনা জাৰি কৰিছিল। নিৰ্দেশনাত যাত্ৰীসকলৰ সুবিধাৰ্থে যিকোনো বিমানৰ কমেও ৬০ শতাংশ আসন আগতীয়াকৈ বিনামূলীয়াকৈ সংৰক্ষণৰ ব্যৱস্থা কৰিবলৈ বিমান সংস্থাসমূহক নিৰ্দেশ দিবলৈ কোৱা হৈছিল। ইয়াৰ পিছতে বৃহস্পতিবাৰে এফ আই এ-য়ে অসামৰিক বিমান পৰিবহণ সচিব সমীৰ কুমাৰ সিনহালৈ এখন পত্ৰ প্ৰেৰণ কৰি এই নিৰ্দেশনাৰ ফলত বিমান খণ্ডত পৰিব পৰা বিৰূপ প্ৰভাৱৰ বিষয়ে অৱগত কৰে। পত্ৰখনত উল্লেখ কৰা অনুসৰি, এই সিদ্ধান্তই সংস্থাসমূহৰ ওপৰত গভীৰ বিত্তীয় প্ৰভাৱ পেলাব আৰু লোকচানৰ ক্ষতিপূৰণৰ বাবে টিকটৰ মূল দাম বৃদ্ধি কৰিবলগীয়া হ’ব। ইয়াৰ ফলত যিসকল যাত্ৰীয়ে আগতীয়াকৈ কোনো নিৰ্দিষ্ট আসন নিৰ্বাচন কৰিব নিবিচাৰে, তেওঁলোকেও অৱশেষত অতিৰিক্ত ভাড়া ভৰিবলগীয়া হ’ব।
সাধাৰণতে বিমান সংস্থাসমূহে সন্মুখৰ শাৰী বা অতিৰিক্ত ঠাই (legroom) থকা আসন নিৰ্বাচনৰ বাবে যাত্ৰীৰ পৰা ২০০ টকাৰ পৰা ২,১০০ টকালৈকে মাচুল সংগ্ৰহ কৰে। এফ আই এ-ৰ মতে, আসন নিৰ্বাচনৰ মাচুল হৈছে বিমান সংস্থাসমূহৰ ৰাজহৰ এক বৈধ অংশ। বৰ্তমানৰ উচ্চ ব্যয়ৰ বজাৰত বিমান সংস্থাসমূহে অতি কম লাভাংশত কাম কৰে। ইন্ধন, মেৰামতি আৰু বিমানবন্দৰৰ মাচুলৰ দৰে ক্ৰমৱৰ্ধমান পৰিচালনা ব্যয়ৰ ক্ষতিপূৰণৰ বাবে তেওঁলোক এনে অতিৰিক্ত ৰাজহৰ ওপৰতে নিৰ্ভৰশীল। কোনো আগতীয়া আলোচনা নকৰাকৈ চৰকাৰে গ্ৰহণ কৰা এনে সিদ্ধান্তই বজাৰ-ভিত্তিক মূল্য নিৰ্ধাৰণ ব্যৱস্থাত বাধাৰ সৃষ্টি কৰিব বুলিও সংস্থাসমূহে অভিযোগ কৰিছে।ইফালে, পশ্চিম এছিয়াত চলি থকা সংঘাতৰ ফলত শেহতীয়াকৈ বিমানৰ টাৰবাইন ইন্ধনৰ (ATF) মূল্য যথেষ্ট বৃদ্ধি পাইছে। ইন্ধনৰ ব্যয় হৈছে এখন বিমানৰ মুঠ পৰিচালনা ব্যয়ৰ প্ৰায় ৪০ শতাংশ। ইন্ধনৰ মূল্যবৃদ্ধিৰ বাবে ইতিমধ্যে এয়াৰ ইণ্ডিয়া গোটে ঘৰুৱা বিমানত ৪০০ টকাৰ ইন্ধন চাৰচাৰ্জ (fuel surcharge) আৰোপ কৰিছে আৰু আন সংস্থাসমূহেও টিকটৰ মূল্য বৃদ্ধিৰ কথা চিন্তা কৰিছে। এনে এক জটিল পৰিস্থিতিৰ মাজত চৰকাৰৰ এই বিনামূলীয়া আসন নিৰ্বাচনৰ নিৰ্দেশনাই বিমান সংস্থাসমূহৰ ব্যৱসায়িক স্থিৰতাত এক প্ৰত্যাহ্বানৰ সৃষ্টি কৰাৰ লগতে অনাগত দিনত সাধাৰণ যাত্ৰীসকলৰ বাবেও বিমান যাত্ৰা ব্যয়বহুল কৰি তোলাৰ সম্ভাৱনা প্ৰকট হৈ পৰিছে।
