এআইয়ুডিএফৰ প্ৰধান বদৰুদ্দিন আজমলে আজি অগপক তীব্ৰ ভাষাৰে আক্ৰমণ কৰি সুবিধাবাদী ৰাজনৈতিক দল আখ্যা দিছে। তেওঁ কৈছে যে ক্ষমতা লাভৰ বাবে অগপই যিকোনো দলৰে সৈতে মিত্ৰতা কৰিব পাৰে।
তেওঁ আৰু দাবী কৰে যে চলিত বৰ্ষৰ ডিচেম্বৰৰ ৫ আৰু ৯ তাৰিখে অনুষ্ঠিত হ’বলগীয়া যে অসমৰ পঞ্চায়ত নিৰ্বাচনৰ বাবে অগপই বিজেপিৰ সৈতে গোপন বুজাবুজি কৰিছে।
আজমলে আৰু কৈছে যে অগপৰ নাহৰকটীয়াৰ বিধায়ক নৰেন সোণোৱালে আগন্তুক পঞ্চায়ত নিৰ্বাচনৰ বাবে কংগ্ৰেছৰ সৈতে মিত্ৰতা কৰিব বিচৰা বুলি মন্তব্য কৰাটোৱে এআইয়ুডিএফৰ পূৰ্বানুমান সঁচা বুলি প্ৰমাণিত কৰিছে। ৰাজ্যৰ ৰাজনীতিত অগপৰ চৰিত্ৰৰ সমালোচনা কৰি আজমলে কৈছে যে অসমৰ ৰাইজে দলটোৰ সুবিধাবাদী চৰিত্ৰ বুজি উঠিছে।
ধুবুৰী লোকসভা সমষ্টিৰ সাংসদগৰাকীয়ে অভিযোগ কৰিছে যে কংগ্ৰেছ আৰু বিজেপিৰ প্ৰাৰ্থী প্ৰক্ষেপণে বিজেপি আৰু কংগ্ৰেছৰ বুজাবুজিৰ কথাটো প্ৰমাণ কৰিছে। আজমলে আৰু কৈছে, ‘‘অগপ, বিজেপি আৰু কংগ্ৰেছে জনসাধাৰণক মূৰ্খ সজাব বিচাৰিছে। কিন্তু অসমৰ মানুহ সদায় একেই নাথাকে। তেওঁলোকে সত্যটো এদিন বুজি পাব।’’
তাৎপৰ্যপূৰ্ণভাৱে বিপজেপি আৰু কংগ্ৰেছৰ পৰিৱৰ্তে সৰু সৰু আঞ্চলিক দলসমূহৰ সৈতে মিত্ৰতা কৰি আঞ্চলিকতাবাদী ৰাজনীতিক শক্তিশালী কৰাৰ বাবে এআইয়ুডিএফৰ প্ৰধানগৰাকীয়ে অগপক আৱেদন জনায়।
ৰাজ্যৰ ৰাজনীতিত পঞ্চায়ত নিৰ্বাচনৰ গুৰুত্ব অনুধাৱন কৰি তেওঁ অসমৰ জনসাধাৰণক বিজেপি, কংগ্ৰেছ আৰু অগপৰ চৰিত্ৰৰ বিষয়ে সজাগ হ’বলৈ আৱেদন জনায়।