এআইয়ুডিএফৰ কাৰ্যবাহী সভাপতি ড০ আদিত্য লাংথাছাই আজি ২৩ নৱেম্বৰ শুকুৰবাৰে গুৱাহাটীত থকা দলীয় প্ৰধান কাৰ্যালয়ত দলটোৰ আগন্তুক পঞ্চায়ত নিৰ্বাচনৰ বাবে নিৰ্বাচনী ইস্তাহাৰ উন্মোচন কৰে। ড০ লাংথাছাই নাগৰিকত্ব (সংশোধনী) বিধেয়ক, ২০১৬ক লৈ শাসনাধিষ্ঠ বিজেপি চৰকাৰক কটু সমালোচনা কৰে আৰু ঘোষণা কৰে যে এইবাৰৰ পঞ্চায়ত নিৰ্বাচনত ৰাইজে এই বিতৰ্কিত বিধেয়কখনৰ বাবে গেৰুৱা দলটোৰ বিৰুদ্ধে ভোটদান কৰিব।
ড০ লাংথাছাই কয় যে বিজেপিয়ে নিজৰ কৃতকৰ্মৰ ফল ভোগ কৰিব। ড০ লাংথাছাই আৰু কয় যে পূৰ্বৰ আৰু বৰ্তমানৰ চৰকাৰেও অসমৰ পঞ্চায়তীৰাজ ব্যৱস্থাটোক শক্তিশলী কৰাৰ বাবে কোনো পদক্ষেপ গ্ৰহণ নকৰিলে।
তেওঁ আৰু অভিযোগ কৰে যে বিশেষকৈ বৰাক উপত্যকাৰ অন্তৰ্গত কিছুমান পঞ্চায়তত চৰকাৰে কোনো পুঁজি মোকোলাই নিদিলে। তেওঁ অভিযোগ কৰে যে চৰকাৰে পঞ্চায়তলৈ পুঁজি মোকোলাই দিয়াৰ ক্ষেত্ৰত পক্ষপাতিত্ব কৰিছে।
তেওঁ আৰু কৈছে যে ৰাজ্যখনৰ আইন শৃংখলাজনিত পৰিস্থিতি বজাই ৰখা, শিক্ষিত নিবনুৱাৰ বাবে নিয়োগৰ সুবিধা সৃষ্টি কৰা চৰকাৰ সম্পূৰ্ণ ব্যৰ্থ হৈছে আৰু নাগৰিকত্ব (সংশোধনী) বিধেয়ক, ২০১৬ক সদনত পাছ কৰাত উঠি পৰি লগাটো চৰকাৰৰ দুৰ্বলতা। বিজেপি এইবাৰৰ পঞ্চায়ত নিৰ্বাচনত হৰাৰ উপৰিও ২০১৯ৰ লোকসভা নিৰ্বাচনতো সমস্যাৰ সন্মুখীন বুলি ভৱিষ্যতবাণী কৰে।
তাৰোপৰি, পঞ্চায়ত নিৰ্বাচনত পৰাজিত হোৱাৰ আশংকাত বিজেপিয়ে নিৰ্বাচন অনুষ্ঠিত কৰা নাছিল কাৰণ পল্চায়ত পৰ্যায়ত বিজেপিৰ কোনো ভেটি নাই। কিন্তু উপায়ন্তৰ হৈ বিজেপিয়ে নিৰ্বাচন অনুষ্ঠিত কৰিবলগীয়া হৈছে।
‘দূৰ্নীতি’ৰ ওপৰত বিশেষ জোৰ দি এআইয়ুডিএফৰ সভাপতিগৰাকীয়ে কৈছে, ‘স্বাধীনতাৰ পাছৰে পৰা কংগ্ৰেছে দেশখন উচন কৰিছিল। এতিয়া বিজেপিয়েও দেশখন ধ্বংস কৰিব ধৰিছে। কংগ্ৰেছে ২জি কেলংকাৰি সংঘটিত কৰিছিল আৰু বিজেপিয়ে ৰাফে’ল ডীল কেলেংকাৰি সংঘটিত কৰিছে। চৰকাৰ পৰিৱৰ্তন হৈছে কিন্তু কেলেংকাৰিৰ পৰিমাণ একেই আছে।
