চলিত ভাৰত বনাম নিউজিলেণ্ডৰ টেষ্ট শৃংখলাৰ দ্বিতীয় খন টেষ্টৰ দ্বিতীয় দিনা আজি এক স্বৰ্ণিম ইতিহাসৰ অধিকাৰী হ’ল নিউজিলেণ্ডৰ বাঁওহতীয়া স্পিনাৰ আজাজ পেটেল। জন্মস্থান মুম্বাইৰ মাটিত নিজৰ কেৰিয়াৰত সকলোতকৈ ডাঙৰ সফলতা অৰ্জন কৰিলে আজাজ পেটেলে।
ভাৰতীয় ইনিংছৰ আটাইকেইটা উইকেট দখল কৰি পেটেলে আজি ক্ৰিকেট বিশ্বক হতচকিত কৰি তোলে। এইদৰে তেওঁ আন্তঃৰাষ্ট্ৰীয় ক্ৰিকেটত এটা ইনিংছত দহটা উইকেট দখল কৰা তৃতীয় স্থান জন বলাৰত পৰিণত হয়।
ইয়াৰ পূৰ্বে ইংলেণ্ডৰ জেমচ চাৰ্লছ লেকাৰে ১৯৫৬ চনত অষ্ট্ৰেলিয়াৰ বিৰুদ্ধে ৫৩ ৰানৰ বিনিময়ত ১০ টা উইকেট দখল কৰি এই কৃতিত্ব অৰ্জন কৰা প্ৰথম বলাৰত পৰিণত হৈছিল। ইয়াৰ পাছত ভাৰতীয় স্পিনাৰ অনিল কুম্বলেই ১৯৯৯ চনত পাকিস্তানৰ বিপক্ষে ৭৪ ৰানত ১০ টা উইকেট দখল কৰিছিল।
আজি নিউজিলেণ্ডৰ বলাৰজনে ৪৭.৫ অভাৰত ১২ অভাৰ মেইডেন দি ১১৯ ৰানৰ বিনিময়ত ১০ টা উইকেট দখল কৰে আৰু ক্ৰিকেটত এজন বলাৰৰ বাবে আটাইতকৈ ঈৰ্ষণীয় সাফল্য অৰ্জন কৰে।
উল্লেখ্য যে টেষ্টখনত ভাৰতে মায়াংক আগৰৱালৰ ১৫০ ৰান আৰু অক্সৰ পেটেলৰ ৫২ ৰানৰ সহায়েৰে ৩২৫ ৰান সংগ্ৰহ কৰে।
ইফালে নিউজিলেণ্ডে নিজৰ প্ৰথম ইনিংছ আৰম্ভ কৰি মাত্ৰ ২৭ ৰানতে ৪ টাকৈ উইকেট হেৰুৱাই বিপদত পৰিছে। ভাৰতীয় বেগী বলাৰ মহম্মদ চিৰাজে তিনিটা উইকেট দখল কৰাৰ লগতে আনটো উইকেট অক্সৰ পেটেলৰ হাতলৈ গৈছে।