নামনি সোৱণশিৰি জলবিদ্যুত প্ৰকল্পক লৈ অসম জাতীয়তাবাদী যুৱ ছাত্ৰ পৰিষদে সোমবাৰে লখিমপুৰত উত্তাল প্ৰতিবাদ সাব্যস্ত কৰে। লখিমপুৰৰ ৰাজপথত পুত্তলিকা দাহ কাৰ্য্যসূচীৰে চৰকাৰ আৰু এন এইছ পি চি কর্তৃপক্ষৰ বিৰুদ্ধে শ্লোগান দি তীব্ৰ প্ৰতিবাদী কাৰ্য্যসূচী ৰূপায়ন কৰে সংগঠনটোৱে।
প্ৰতিবাদকাৰীসকলে কেন্দ্ৰীয় শক্তি মন্ত্ৰীৰ লগতে এন এইছ পি চি কৰ্তৃপক্ষৰো পুত্তলিকা দাহ কৰে।
উল্লেখযোগ্য যে, নামনি সোৱণশিৰি জলবিদ্যুৎ প্ৰকল্প বন্ধৰ বিৰুদ্ধে অসম জাতীয়তাবাদী যুৱ ছাত্ৰ পৰিষদে ২০১১ চনৰ পৰাই প্ৰতিবাদ সাব্যস্ত কৰি আহিছে। সংগঠনটোৰ এই প্ৰতিবাদী কাৰ্য্যসূচীৰ অংশস্বৰূপে নিৰ্মাণ কৰ্তৃপক্ষ, কেন্দ্ৰীয় চৰকাৰ, ৰাজ্য চৰকাৰ আৰু প্ৰতিবাদী দল-সংগঠনৰে হোৱা আলোচনা মৰ্মে জলবিদ্যুৎ প্ৰকল্পৰ কাম বন্ধ ৰখাৰ সিদ্ধান্ত গ্ৰহণ কৰা হয়।
অসম জাতীয়তাবাদী যুৱ ছাত্ৰ পৰিষদে অভিযোগ কৰা মতে এন এইছ পি চি কৰ্তৃপক্ষই ৰাজ্যত নাগৰিকত্ব সংশোধনী বিধেয়ককলৈ আন্দোলন চলি থকাৰ সুযোগ গ্ৰহণ কৰি গোপনে নিৰ্মান কাৰ্য্য চলাই গৈছে।
আনহাতে, দল-সংগঠন সমূহৰ সৈতে চৰকাৰৰ জলবিদ্যুৎ প্ৰকল্পক লৈ চলি থকা আলোচনা সঠিক সিদ্ধান্তত উপনীত নোহোৱালৈ নিৰ্মাণকাৰ্য্য বন্ধ ৰখাৰ যি প্ৰতিশ্ৰুতি আছিল তাক উলংঘা কৰি নিৰ্মাণ চলাই গ’লে অসম জাতীয়তাবাদী যুৱ ছাত্ৰ পৰিষদে ভয়ংকৰ প্ৰতিবাদী কাৰ্য্যসূচী হাতত ল’বলৈ বাধ্য হ’ব বুলি সকীয়াই দিয়ে।
ভবিষ্যতে হ’ব পৰা এনে পৰিস্থিতিৰ বাবে কিন্তু সৰ্বানন্দ সোণোৱাল, ৰাজ্যৰ চৰকাৰ আৰু এন এইছ পি চি কৰ্তৃপক্ষহে জগৰীয়া হ’ব বুলিও সংগঠনটোৱে উল্লেখ কৰে।