শনিবাৰে ৰাইজৰ দলৰ উপদেষ্টা ড° সীতানাথ লহকৰে এক সংবাদমেল অনুষ্ঠিত কৰি কাৰাৰুদ্ধ অখিল গগৈৰ মুকলি চিঠিৰ কিছু বিষয় ৰাইজৰ মাজলৈ দাঙি ধৰে।
উক্ত চিঠিখনত ৰাইজক উদ্দেশ্যি অখিল গগৈৰ আহ্বান “কাৰাগৰৰ পৰাই মই সকলোলৈকে মোৰ নমস্কাৰ জনালো। আপোনালোকে জানে মোৰ কাৰাৰুদ্ধ জীৱনে ১৫ মাহ অতিক্ৰম কৰিলে। বিজেপি চৰকাৰখনে মোক ২ বছৰ জেলত ৰাখিলে। মই নাজানো মোৰ ভৱিষ্যত কি? কিন্তু মই বুজি উঠিছো যে বিজেপিৰ শাসনত অসম আৰু অসমবাসীৰ ভৱিষ্যত অন্ধকাৰ। এই দলটোৱে দেশৰ সকলো সম্পদ এফালৰ পৰা বিক্ৰী কৰাৰ লগতে অসমৰ ভৱিষ্যত দিল্লীৰ ওচৰত বন্ধকত দিছে।‘’
আগন্তুক বিধানসভা নিৰ্বাচনক উদ্দেশ্যি তেওঁ কয়, “২০২১ চনৰ বিধানসভা নিৰ্বাচনত বিজেপি মিত্ৰজোঁটক আমি আটায়ে মিলি পৰাভূত কৰিব লাগিব। অসমৰ স্বাভিমান ৰক্ষা কৰিবলৈ আৰু অসমবাসীৰ স্বাৰ্থক সুৰক্ষা দিবলৈ বিজেপিক পৰাভূত কৰাটো অপৰিহাৰ্য্য। আমি বিজেপিক পৰাভূত কৰাৰ স্বাৰ্থত ভাৰতীয় জাতীয় কংগ্ৰেছৰ লগতো আলাপ আলোচনা কৰিছিলো।”
“আমি সৰ্বমুঠ ৮৬টা সমষ্টিৰ ২১টা সমষ্টিত প্ৰাৰ্থীত্ব দিছোঁ। মৰিয়নী সমষ্টিৰ প্ৰাৰ্থিত্ব মই নিজেই উঠাই ললোঁ কেৱল বিজেপিক পৰাভূত কৰাৰ স্বাৰ্থত। উজনি অসম আৰু উত্তৰ অসমৰ সমষ্টিত বিজেপিৰ জিকাৰ সম্ভাৱনা আছে বাবেই আমি ভেটা দিবলৈ সকলো কৰিলো কিন্তু দুৰ্ভাগ্যৰ কথা আমাৰ এই সীমিত সমষ্টি সমূহতো আমাৰ দলৰ প্ৰাৰ্থীৰ বিৰুদ্ধে আঞ্চলিক দল তথা ৰাষ্ট্ৰীয় দলে প্ৰাৰ্থিত্ব দিলে, ৰাজহুৱা প্ৰতিশ্ৰুতিৰ পাছতো মোৰ বিৰুদ্ধে প্ৰাৰ্থিত্ব দিয়া হ’ল। সেইবাবে মোৰ সকলো অসমবাসী ৰাইজলৈ বিনম্ৰ আহ্বান এইবাৰ নিৰ্বাচনত বিজেপিক পৰাভূত কৰিবলৈ বিজেপি বিৰোধী আৰু “কা” বিৰোধী প্ৰাৰ্থীক জয়যুক্ত কৰক আৰু অসমখনক বচাওঁক,”-কাৰাবন্দী অখিল গগৈৰ আহ্বান।
