বানপীড়িতক সাহায্য দিয়াত চৰকাৰ খেলিমেলিক লৈ সৰৱ হৈ উঠিছে শিৱসাগৰৰ বিধায়ক তথা ৰাইজৰ দলৰ সভাপতি অখিল গগৈ। মঙলবাৰে শিৱসাগৰৰ বৰ্ডিং খেলপথাৰত সংবাদমেল সম্বোধন কৰি গগৈয়ে অসম চৰকাৰক ৪৮ ঘণ্টাৰ সময়সীমা বান্ধি দিয়ে। তেওঁৰ দাবী, বানত ক্ষতিগ্ৰস্ত হৈ এতিয়াও যিসকল পৰিয়ালে চৰকাৰে ঘোষণা কৰা অন্তৱৰ্তীকালীন আৰ্থিক সাহায্য লাভ কৰা নাই, সেইসকলক শীঘ্ৰে ধন মুকলি কৰি দিব লাগিব।
গগৈৰ অভিযোগ, ইতিমধ্যে ৩৬ দিনতকৈ অধিক সময় পাৰ হৈ গৈছে, তথাপিও বহু বানপীড়িত পৰিয়াল চৰকাৰী সাহায্যৰ অপেক্ষাত আছে। তেওঁ কয়, চৰকাৰে ১৫ হাজাৰ বা ২৫ হাজাৰ টকাৰ আৰ্থিক সাহায্যক নিজেই ‘জৰুৰী সাহায্য’ বুলি অভিহিত কৰিছে। কিন্তু জৰুৰী সাহায্য যদি ২৪ বা ৪৮ ঘণ্টাৰ ভিতৰত দিয়া হয়, তেন্তে ৩৬ দিন পাৰ হৈ যোৱাৰ পাছতো কিয় বহু পৰিয়ালে ধন পোৱা নাই বুলি প্ৰশ্ন তোলে গগৈয়ে।
তেওঁ স্পষ্ট কৰি দিয়ে যে ৪৮ ঘণ্টাৰ ভিতৰত বাকী থকা সকলো উপযুক্ত বানপীড়িত পৰিয়ালক সাহায্য প্ৰদান নকৰিলে আন্দোলন অধিক তীব্ৰ কৰা হ’ব। প্ৰয়োজন হ’লে বানপীড়িত লোকসকলক লগত লৈ গুৱাহাটী অভিমুখে পদযাত্ৰা কৰাৰো হুংকাৰ দিয়ে ৰাইজৰ দলৰ নেতাগৰাকীয়ে।
বানত ক্ষতিগ্ৰস্ত হোৱা ঘৰ-দুৱাৰৰ বাবে চৰকাৰে ঘোষণা কৰা ক্ষতিপূৰণকো অখিল গগৈয়ে অপৰ্যাপ্ত বুলি মন্তব্য কৰে। তেওঁৰ মতে, বহু পৰিয়ালে বৃহৎ ক্ষতিৰ সন্মুখীন হৈছে, সেয়েহে প্ৰতিটো ক্ষতিগ্ৰস্ত পৰিয়ালক কমেও ১০ লাখ টকাৰ ক্ষতিপূৰণ দিব লাগে। ইয়াৰ উপৰি বানত ব্যৱসায়িক প্ৰতিষ্ঠান, দোকান-পোহাৰ ক্ষতিগ্ৰস্ত হোৱা ব্যৱসায়ীসকলৰ বাবেও পৃথক আৰ্থিক সহায় আগবঢ়োৱাৰ দাবী জনায় তেওঁ।
চৰকাৰে দাবীসমূহ পূৰণ নকৰিলে মুখ্যমন্ত্ৰীৰ কাৰ্যালয় ঘেৰাও কৰাৰ দৰে কাৰ্যসূচী গ্ৰহণ কৰাৰ সম্ভাৱনাৰ কথাও গগৈয়ে উল্লেখ কৰে। তেওঁ কয়, বানপীড়িত লোকসকলৰ দাবী আৰু ক্ষোভক আওকাণ কৰি চৰকাৰে অধিক সময় পাৰ কৰিব নোৱাৰে।
ইফালে বানপানীৰ ভয়াবহতাৰ আঁৰত অবৈধ খনন আৰু কয়লা, বালি, শিল উত্তোলনৰ দৰে কাৰ্যকলাপৰ ভূমিকা সম্পৰ্কে তদন্ত কৰাৰ দাবী জনায় গগৈয়ে। তেওঁ কয়, অবৈধ খনন চলোৱা তথাকথিত ছিণ্ডিকেটৰ কাৰ্যকলাপে বান পৰিস্থিতি অধিক ভয়াবহ কৰি তুলিছে নেকি, সেইটো তদন্ত কৰি সত্য উন্মোচন কৰিব লাগে। এই ক্ষেত্ৰত কেন্দ্ৰীয় তদন্তকাৰী সংস্থা চিবিআইৰ জৰিয়তে তদন্ত কৰাৰো দাবী জনায় তেওঁ।
অখিল গগৈয়ে কয় যে মঙলবাৰৰ প্ৰতিবাদ কেৱল কোনো ৰাজনৈতিক কাৰ্যসূচী নহয়। বানত সৰ্বস্ব হেৰুওৱা সাধাৰণ লোকসকলৰ অভিযোগ, ক্ষোভ আৰু দাবী চৰকাৰৰ ওচৰত তুলি ধৰিবলৈও এই প্ৰতিবাদ আয়োজন কৰা হৈছে। বানপীড়িত লোকসকলে এতিয়া তাৎক্ষণিক সাহায্য, পুনৰ সংস্থাপন আৰু উপযুক্ত ক্ষতিপূৰণ বিচাৰিছে বুলি তেওঁ উল্লেখ কৰে।
