শিৱসাগৰ সমষ্টিৰ বিধায়ক অখিল গগৈৰ বিৰুদ্ধে সদনৰ মজিয়াত আক্ৰমণাত্মক হৈ পৰিল ৰাজ্যৰ মুখ্যমন্ত্ৰী ড০ হিমন্ত বিশ্ব শৰ্মা।
আনকি আক্ৰমণ কৰি অখিল গগৈৰ মানসিক ৰোগৰ চিকিৎসা কৰি থকা বুলিও উল্লেখ কৰে মুখ্যমন্ত্ৰীগৰাকীয়ে।
তেওঁ কয় ‘বেমাৰী মানুহ এজনত সদনত কেনেকৈ বহুৱাব পাৰে? অখিল গগৈ মানসিকভাৱে ভাল অৱস্থাত নাই। সদনত অখিল গগৈয়ে কোভিড প্ৰট’কল পাহৰি ইজনৰ পৰা সিজনৰ ওচৰত গৈছে, ই এক বেমাৰৰ আগজাননী। চিকিৎসা মহাবিদ্যালয়ৰ চিকিৎসকসকলে কৈছে এয়াই তেওঁৰ বেমাৰ।‘
‘কিছুদিন পূৰ্বে ভৰহ নৰহে কৈছিল যে অখিল গগৈক সদনত বহাৰ অনুমতি দিব লাগে। যিগৰাকী ব্যক্তিক গুৱাহাটী চিকিৎসা মহাবিদ্যালয়ে চাৰিমাহ ধৰি চিকিৎসা কৰি আছে আৰু চিকিৎসকে কৈছে মানসিকভাৱে মানুহজন ভাল অৱস্থাত নাই। চিকিৎসকে তেওঁৰ মানসিক ৰোগৰ চিকিৎসা কৰি আছে। মানসিক ৰোগৰ বাবে তেওঁ চিকিৎসা লাভ কৰি আছে।‘ হিমন্ত বিশ্ব শৰ্মাই এইদৰে কয়।
ইপিনে, গুৱাহাটী চিকিৎসা মহাবিদ্যালয়ৰ চিকিৎসকক মুখ্যমন্ত্ৰীয়ে অখিল গগৈ সুস্থ হৈ আছে আপোনালোকে কিয় চিকিৎসালয়ত ৰাখি থৈছে? বুলি প্ৰশ্ন কৰাত চিকিৎসকে উত্তৰত তেতিয়া কৈছিল ‘সেইটোৱেই তেওঁৰ বেমাৰ।‘
তেওঁ লগতে কয় ‘যদি অখিল গগৈয়ে সুস্থ বুলি কয় তেন্তে আইন মতে তেওঁ জেইলত যাব লাগিব। যদি কয় তেওঁ বিধানসভাত উপস্থিত থাকিব নোৱাৰে তেওঁ অসুস্থ বুলি কয় তেন্তে তেওঁ পেয়িং কেবিনত থাকিব লাগিব।‘
ইপিনে, এজন বেমাৰীক বিধানসভাত উপস্থিত থাকিবলৈ কিয় অধ্যক্ষই লিখি দিব? বুলি প্ৰশ্ন কৰি মুখ্যমন্ত্ৰীয়ে লগতে কয় ‘আমাৰ পৰা অধ্যক্ষই প্ৰতিক্ৰিয়া বিচৰাত আমি ক’লো বেমাৰী মানুহ এজনক সদনলৈ আহিব দিব নোৱাৰে।‘
তেওঁ লগতে কয় ‘সিদিনাখন অখিল গগৈ মোৰ ওচৰতো আহিছে, মই ভাবিছো কিয় আহিছে? আমি সিদ্ধান্ত লৈছো যে কোভিডৰ নিয়ম মানি চলিম। অখিল গগৈয়ে এখনো টেবুল এৰা নাছিল প্ৰত্যেকৰে ওচৰত গৈছিল। মোৰ এনেকুৱা লাগিছিল অখিল গগৈয়ে কোভিড বিলাই দিম বুলি আহিছিল নেকি? পিছত গম পালো যে তেওঁ য’ত আছে তাত কোভিড হোৱা নাই।‘
ইপিনে, অখিল গগৈক বাছত কিয় অনা হৈছে বুলি বহুতে প্ৰশ্ন কৰিছে বুলি উল্লেখ কৰি হিমন্ত বিশ্ব শৰ্মাই লগতে কয় ‘এখন সৰু গাড়ীত পাঁচজন নিৰাপত্তাৰক্ষীৰে আনিলে তেওঁৰ কোভিড নহ’ব নেকি? আহল বহল বাছ এখনত বহাই অনাটো চৰকাৰৰ দায়িত্ব।‘
এই ধৰণৰ কথা-বতৰাৰে সদনৰ গৰিমা বৃদ্ধি নহয় বুলি তেওঁ উল্লেখ কৰে।
