মৰিয়নীৰ পৰা প্ৰতিদ্বন্দ্বিতা নকৰে অখিল গগৈয়ে। এতিয়া অকল শিৱসাগৰৰ পৰাহে প্ৰতিদ্বন্দ্বিতা কৰিব কাৰাবন্দী নেতা গৰাকীয়ে।
ৰাইজৰ দলৰ কাৰ্যকৰী সভাপতি ভাস্কো ডি শইকীয়াই এই সিদ্ধান্তৰ কথা সদৰী কৰিছে।
মৰিয়নী অখিল গগৈৰ গৃহ সমষ্টি আছিল যদিও বিজেপিক পৰাভূত কৰাৰ স্বাৰ্থতেই ৰাইজৰ দলে এই সিদ্ধান্ত লৈছে বুলি কোৱা হৈছে।
অখিল গগৈৰ ইচ্ছা আৰু ৰাইজৰ দলৰ কেন্দ্ৰীয় কমিটীৰ সিদ্ধান্ত অনুসৰি এই সিদ্ধান্ত লোৱা বুলি জানিবলৈ দিয়ে ভাস্কো ডি শইকীয়াই।
ৰাইজৰ দলে ইয়াৰ ফেচবুক পেজত ‘ত্যাগৰ পাছত ত্যাগ…..আৰু কিমান ত্যাগ!’ বুলি শিৰোণামাৰে লিখিছে,’’কেৱল আৰু কেৱল জাতিদ্ৰোহী বিজেপিক পৰাভূত কৰাৰ স্বাৰ্থত ৰাইজৰ দল আৰু অখিল গগৈৰ সিদ্ধান্ত।‘’
দলটোৱে লগতে লিখিছে, ‘’জাতীয় স্বাৰ্থতেই গৃহ সমষ্টি মৰিয়নীৰ পৰা জিকাৰ সম্ভাৱনা থকাৰ পাছতো নিৰ্বাচনত নেখেলাৰ কথা ঘোষণা অখিল গগৈৰ। কেৱল গাদী দখল বা নিৰ্বাচনী বৈতৰণী পাৰ হোৱাটো আমাৰ লক্ষ্য নহয়। আমি অসমক ন ৰূপত গঢ়িব খোজোঁ। প্ৰকৃত অৰ্থত বৃহত্তৰ অসমীয়া জাতিটো যাতে ভৱিষ্যতৰ পৰা ভৱিষ্যতলৈ সুৰক্ষিত হৈ থাকে, তাৰবাবেই আমাৰ এই ৰাজনৈতিক যাত্ৰা।‘’
উল্লেখ্য যে ইয়াৰ পূৰ্বে অখিল গগৈয়ে শিৱসাগৰ আৰু মৰিয়নী দুয়োটা সমষ্টিৰ পৰাই প্ৰতিদ্বন্দ্বিতা কৰাৰ কথা আছিল আৰু দুয়োটা সমষ্টিতে মনোনয়ন দাখিলো কৰিছিল।
কিন্তু মৰিয়নীত অখিলে প্ৰতিদ্বন্দ্বিতা কৰাৰ বাবে বিভিন্নজনৰ সমালোচনাৰ সন্মুখীন হৈছিল নেতাগৰাকী। আনকি ইয়াৰ দ্বাৰা তেওঁ বিজেপিক সহায় কৰিবলৈ বিচৰা বুলিও সমালোচিত হৈছিল।