কমতাপুৰৰ দাবীত দীৰ্ঘদিনধৰি সশস্ত্ৰ আন্দোলনৰ পথ বাছি লোৱা কেএলঅৰ মুৰব্বীৰ সৈতে চৰকাৰে শান্তি আলোচনাৰ যি প্ৰক্ৰিয়া আৰম্ভ কৰিছে সেই প্ৰক্ৰিয়াক ক্ষীতিশ বৰ্মন নেতৃত্বাধীন সদৌ কোচ-ৰাজবংশী ছাত্ৰ সন্থা চমুকৈ আক্ৰাছুৱে আদৰণি জনাইছে ৷
সংগঠনটোৰ বঙাইগাঁও চহৰৰ বৰপাৰাস্থিত মুখ্য কাৰ্যালয়ত আয়োজিত এক সংবাদমেলত সভাপতি ক্ষীতিশ বৰ্মনে কয় যে ঐতিহাসিক পৃথক কমতাপুৰ ৰাজ্যৰ দাবীত আক্ৰাছুৰ লগতে অসম আৰু পশ্চিম বংগৰ কেইবাটাও সংগঠনে কেইবাদশক ধৰি গণতান্ত্ৰিক আন্দোলন কৰি আহিছে৷
ইয়াৰ লগতে কে এল অ নামৰ সশস্ত্ৰ সংগঠনটোৱেও সশস্ত্ৰ পন্থাৰে কমতাপুৰ ৰাজ্যৰ দাবীত বিভিন্ন ঘাত- প্ৰতিঘাতৰ মাজেৰে সংগ্ৰাম চলাই আছে ৷
কিন্তু দুই ডিচেম্বৰত অসমৰ মুখ্যমন্ত্ৰী ডঃ হিমন্ত বিশ্ব শৰ্মাই এক টুইকযোগে সশস্ত্ৰ সংগঠন কে এল অই শান্তি আলোচনাৰ বাবে আগ্ৰহ প্ৰকাশ কৰা বুলি উল্লেখ কৰিছে ৷
সেয়ে এই শান্তি আলোচনা অনুষ্ঠিত কৰাৰ বাবে আগবঢ়া এই পদক্ষেপৰ বাবে ৰাজ্যৰ মুখ্যমন্ত্ৰীগৰাকীৰ লগতে ভাৰতৰ প্ৰধানমন্ত্ৰী নৰেন্দ্ৰ মোদী, গৃহমন্ত্ৰী অমিত শ্বাহ আৰু কে এল অৰ সেনাধ্যক্ষ জীৱন সিংহক আক্ৰাছুৰ তৰফৰ পৰা আদৰণি জনাইছে ৷
আক্ৰাছুই এই শান্তি আলোচনাৰ জৰিয়তে ঐতিহাসিক কমতাপুৰ ৰাজ্য পুনৰ গঠন আৰু কোচ ৰাজবংশী জনগোষ্ঠীৰ সমস্যাসমূহৰ সমাধানৰ ক্ষেত্ৰত এক গঠনমূলক সিদ্ধান্তত উপনীত হ’ব বুলি আশা প্ৰকাশ কৰে ৷
লগতে আন সশস্ত্ৰ সংগঠনসমূহ আলোচনাৰ মজিয়ালৈ অহাৰ সময়ত যি মৰ্যদা প্ৰদান কৰিছিল, সেইদৰে কে এল অকো সম মৰ্যদা প্ৰদান কৰি সমস্যাসমূহ সমাধানত গুৰুত্বাৰোপ কৰিব বুলি আশা প্ৰকাশ কৰে ৷
সংবাদ মেলত শান্তি আলোচনা ক্ষেত্ৰত কেএলঅ’ৰ সেনাধ্যক্ষ জীবন সিংহৰ পদক্ষেপকো আদৰণি জনাইছে সংগঠনটোৱে ৷
ইপিনে সংবাদমেলত জনজাতিকৰণ সন্দৰ্ভত সংগঠনটোৰ সভাপতি ক্ষীতিশ বৰ্মনে গভীৰ ক্ষোভ প্ৰকাশ কৰি কয় যে আক্ৰাছুৱে দীৰ্ঘদিন ধৰি কোচ-ৰাজবংশী জনগোষ্ঠীক জনজাতিকৰণ কৰা আৰু কমতাপুৰ ৰাজ্য পুনৰ গঠনৰ দাবীত আন্দোলন কৰি আহিছে যদিও বৰ্তমান লৈকে জনজাতিকৰণৰ ক্ষেত্ৰত ৯০ শতাংশ কাম সম্পন্ন হোৱা বুলি বিগত চৰকাৰৰ শিক্ষামন্ত্ৰী তথা বৰ্তমান চৰকাৰৰ মুখ্যমন্ত্ৰী ডঃ হিমন্ত বিশ্ব শৰ্মাই সভাত ঘোষণা কৰিছিল ৷
কিন্তু এতিয়ালৈকে জনজাতিকৰণ হোৱা নাই ৷ গতিকে আক্ৰাছুৱে পুনৰ আন্দোলন কাৰ্যসূচী গ্ৰহণ কৰিবলৈ বাধ্য হোৱা বুলি প্ৰকাশ কৰি অহা ২০ ডিচেম্বৰত বিধান সভাৰ শীতকালীন অধিবেশনৰ সময়তে সংগঠনটোৱে দিছপুৰ লাষ্ট গেটত তিনি ঘন্টীয়া অৱস্থান ধৰ্মঘট কাৰ্যসূচী পালন কৰিব বুলিও সংবাদ মেলত উল্লেখ কৰে ৷
লগতে ইয়াৰ পিছতো যদি অসম চৰকাৰ আৰু ভাৰত চৰকাৰে কোচ ৰাজবংশী জনগোষ্ঠীৰ জনজাতিকৰণৰ ক্ষেত্ৰত কোনো ব্যৱস্থা গ্ৰহণ নকৰে ,তেতিয়াহলে আগন্তুক দিনত আক্ৰাছুৱে অধিক শক্তিশালী ৰূপত আন্দোলন গঢ়ি তুলিবলৈ বাধ্য হ’ব বুলি কয় ৷
সংবাদ মেলত আক্ৰছুৰ কেইবাগৰাকীও নেতা উপস্থিত আছিল ৷