শিৱসাগৰত সদৌ কোচ ৰাজবংশী ছাত্ৰ সন্থাই শিৱসাগৰ জিলা উপায়ুক্ত কাৰ্যালয়ৰ সন্মুখত এক প্ৰতিবাদী কাৰ্যসূচী ৰূপায়ণ কৰে।
কোচ ৰাজবংশী জনগোষ্ঠীয় লোকক জনজাতিৰ মৰ্যদা প্ৰদান কৰাৰ দাবীত জিলা উপায়ুক্ত কাৰ্যালয়ত এক তিনি ঘণ্টীয়া অৱস্থান ধৰ্মঘট কাৰ্যসূচী ৰূপায়ণ কৰে।
বিগত দিন সমূহত চৰকাৰ গঠন কৰা বিভিন্ন ৰাজনৈতিক দল সমূহে কোচ ৰাজবংশী জনগোষ্ঠীক জনজাতিকৰণ কৰাৰ নামত প্ৰতাৰণা কৰা বুলি স্পষ্ট অভিযোগ উত্থাপন কৰি কয় যে বিজেপি চৰকাৰৰ প্ৰথমটো কাৰ্যকালত মুখ্যমন্ত্ৰী সৰ্বানন্দ সোনোৱালে তেতিয়াৰ জেষ্ঠ মন্ত্ৰী হিমন্ত বিশ্ব শৰ্মাৰ নেতৃত্বত এক কমিটি গঠন কৰি দিয়ে।
পৰৱৰ্তী সময়ত তেতিয়াৰ মন্ত্ৰী তথা এতিয়াৰ মুখ্যমন্ত্ৰী হিমন্ত বিশ্ব শৰ্মাই কোচ ৰাজবংশী জনগোষ্ঠীক জনজাতি মৰ্যাদা প্ৰদানৰ নব্বৈ শতাংশ কাম হৈ থকা বুলি উল্লেখ কৰি ইতিমধ্যে কেন্দ্ৰীয় চৰকাৰলৈ এক খচৰা পঠোৱা বুলি উল্লেখ কৰে।
তাৰ পাছতে কেন্দ্ৰীয় চৰকাৰৰ জনজাতি পৰিক্ৰমাৰ মন্ত্ৰী গৰাকীয়ে এই সন্দৰ্ভত অসম চৰকাৰৰ পৰা কোনো খচৰা লাভ নকৰাৰ কথা ঘোষণা কৰে।
এইদৰে অসমৰ বিজেপি চৰকাৰে বছৰ বছৰ ধৰি কোচ ৰাজবংশী লোকক প্ৰতাৰণা কৰা বুলি কোচ ৰাজবংশী ছাত্ৰ সন্থাই ক্ষোভ উজাৰে।কোচ ৰাজবংশী ছাত্ৰ সন্থাই জনজাতিকৰণৰ দাবীত জুলাই মাহত এহেজাৰ লোকক লৈ দিল্লীৰ যন্তৰমন্তৰত প্ৰতিবাদী কাৰ্যসূচী ৰূপায়ণ কৰিব বুলিও হুংকাৰ দিয়ে।
