দেউতাকৰ সপোন আছিল নিজৰ এটা সুন্দৰ ঘৰ হোৱাৰ। সেই ঘৰটোত হুছেইন পৰিয়ালে সুখেৰে দিন কটাব বুলি ভাবিছিল। কিন্তু ২০০৮ চনত এটা ভয়ংকৰ ঘটনাই গোটেই পৰিয়ালটোক থানবান কৰি পেলালে। সন্ত্ৰাসবাদী সংগঠন আল কায়দায়ে তেওঁৰ পিতৃক হত্যা কৰিলে। আনহাতে আই এছ আই এছে তেওঁৰ ককায়েকক হত্যা কৰিলে। আৰু সেই পৰিয়ালৰ সন্তান আয়মেন হুছেইনে আজি ইৰাকৰ হৈ বিশ্বকাপত গ‘ল দিলে। আৰ্লিং হালান্দৰ নৰৱেৰ বিৰুদ্ধে ইৰাকে খেলখনত জিকিব নোৱাৰিলে যদিও আয়মেনে এক নতুন ইতিহাস ৰচিলে। খেলখনত ইৰাকে ১-৪ গ’লত হাৰিল। কিন্তু যুদ্ধৰ আতংকক জয় কৰি এক নতুন প্ৰত্যাৱৰ্তনৰ কাহিনী লিখিলে আয়মেনে।
বষ্টন ষ্টেডিয়ামত অনুষ্ঠিত আই গ্ৰুপৰ খেলখনৰ আৰম্ভণিতে নৰৱে দলটো আগবাঢ়ি গৈছিল। ২৯ মিনিটত হালান্দে গ‘ল কৰিছিল। তাৰ পিছত ৩৯ মিনিটত আল আম্মাৰিৰ পাছৰ পৰা মূৰেৰে আঘাত কৰি আয়মেনে ইৰাকক সমতালৈ ঘূৰাই আনে। কিন্তু সেই আনন্দ বেছি সময় নাথাকিল। ৪ মিনিটৰ ভিতৰত হালান্দৰ আন এটা গ’লৰ জৰিয়তে ইউৰোপৰ দেশখনে পুনৰ অগ্ৰগতি লাভ কৰে। ইয়াৰ পিছত ৭৬ মিনিটত লিঅ’ অষ্টিগাৰ্ডে গ’ল দিয়ে। আৰু খেলৰ একেবাৰে শেষৰ ফালে ইৰাকৰ আত্মঘাতী গ’লৰ ফলত নৰৱেৰ ব্যৱধান অধিক বাঢ়ি যায়। সেই আত্মঘাতী গ’লটো আয়মেনৰ গাতে লাগি হৈছিল।
৪০ বছৰৰ মূৰত ইৰাকে পুনৰ বিশ্বকাপলৈ যোগ্যতা অৰ্জন কৰিছে। আন্তঃমহাদেশীয় যোগ্যতা অৰ্জন পৰ্বত বলিভিয়াক ২-১ গ‘লত পৰাস্ত কৰি ইৰাকে বিশ্বকাপৰ টিকট লাভ কৰে। সেই খেলখনতো বিজয়সূচক গ’লটো আয়মেনৰ ভৰিৰ পৰাই আহিছিল। ইৰাকৰ যুদ্ধ বিধ্বস্ত আল হাজৱা অঞ্চলত তেওঁৰ জন্ম হৈছিল। চাৰিওফালে কেৱল বন্দুকৰ শব্দ আৰু মৃত্যুৰ কিৰিলিৰ মাজতেই তেওঁ ডাঙৰ দীঘল হৈছিল। সেই ভয়ংকৰ পৰিৱেশৰ পৰা বাচি থকাৰ একমাত্ৰ উপায় আছিল ফুটবল। মাত্ৰ ১২ বছৰ বয়সতে তেওঁ পিতৃক হেৰুৱাইছিল। তেওঁৰ পিতৃ ইৰাকৰ সেনাবাহিনীত আছিল। নিজৰ ঘৰ সজাবৰ বাবে প্ৰয়োজনীয় সামগ্ৰী কিনিবলৈ যোৱাৰ সময়তেই আল কায়দায়ে তেওঁক হত্যা কৰিছিল।
আজিও তেওঁলোকৰ সেই ঘৰটো অসম্পূৰ্ণ হৈয়ে আছে। প্ৰথম খেলখনৰ আগতে ফিফাক দিয়া এটা সাক্ষাৎকাৰত আয়মেনে কৈছিল যে তেওঁ আজিও সপোন দেখে, টকা গোটাই গাঁৱলৈ গৈ দেউতাকে আৰম্ভ কৰা সেই ঘৰটোৰ কাম সম্পূৰ্ণ কৰিব। কিন্তু তেওঁৰ দুখৰ কাহিনী কেৱল দেউতাকৰ মৃত্যুতেই শেষ হোৱা নাছিল। ফুটবল খেলা আৰম্ভ কৰাৰ পিছত তেওঁ মাকক গাঁও এৰি গুচি আহিবলৈ কৈছিল। কিন্তু মাকে মান্তি হোৱা নাছিল। এদিন তেওঁ গম পালে যে তেওঁৰ ককায়েক নিৰুদ্দেশ হৈছে। আৰু তাৰ পিছত তেওঁ কেতিয়াও ঘূৰি নাহিল। সেই সময়ত সেই অঞ্চলটো আই এছ আই এছৰ দখলত আছিল। দেউতাকৰ দৰে তেওঁৰ ককায়েকো সেনাবাহিনীত কাম কৰিছিল।
An opening match win for Norway 🇳🇴#FIFAWorldCup
— FIFA World Cup (@FIFAWorldCup) June 17, 2026
ককায়েক নিৰুদ্দেশ হোৱাৰ পিছত আয়মেনে ফুটবল খেলাৰ সকলো আগ্ৰহ হেৰুৱাই পেলাইছিল। তেওঁ ফুটবল এৰি দিয়াৰ সিদ্ধান্ত লৈছিল। তেনে এক কঠিন সময়ত তেওঁৰ মাকে তেওঁক সাহস দিছিল। মাকে বিচাৰিছিল আয়মেনে যাতে কেতিয়াও সপোন দেখা বন্ধ নকৰে। সেই সপোনৰ পিছত দৌৰিয়েই তেওঁ ইৰাক দলত স্থান পালে আৰু বিশ্বকাপলৈ আমন্ত্ৰণ পালে। বৰ্তমান তেওঁ ইৰাকৰ আল কাৰমা নামৰ ক্লাবটোৰ হৈ খেলে। ইৰাকত তেওঁক মেছোপটেমিয়াৰ সিংহ বুলি জনা যায়। কিন্তু আমেৰিকালৈ আহিও তেওঁ বিপদত পৰিছিল। আমেৰিকাত ভৰি দিয়াৰ লগে লগেই তেওঁক অনুপ্ৰৱেশ বিভাগৰ বিষয়াসকলে ৭ ঘণ্টাৰ বাবে আৱদ্ধ কৰি ৰাখিছিল আৰু তেওঁৰ ফোনটো তন্ন তন্নকৈ পৰীক্ষা কৰিছিল। ইমানবোৰ কষ্ট আৰু পিতৃ তথা ককায়েকক হেৰুৱাৰ যন্ত্ৰণা লৈ আৰম্ভ কৰা যাত্ৰাৰ অন্তত তেওঁ বিশ্বকাপত গ‘ল কৰিবলৈ সক্ষম হ’ল। এতিয়া নিশ্চয় আয়মেনে নিজৰ অসম্পূৰ্ণ ঘৰটো সম্পূৰ্ণ কৰিব পাৰিব।
