বড়োলেণ্ড টেৰিটৰিয়েল ৰিজন’ৰ সাম্প্ৰতিক পৰিস্থিতি সন্দৰ্ভত আলোচনা কৰাৰ বাবে আজি অসম প্ৰশাসনীয় পদাধিকাৰী মহাবিদ্যালয়ত মুখ্যমন্ত্ৰী সৰ্বানন্দ সোণোৱালৰ অধ্যক্ষতাত এখন সৰ্বদলীয় বৈঠক অনুষ্ঠিত হয়।
মুখ্য সচিব কুমাৰ সঞ্জয় কৃষ্ণই আদৰণী ভাষণেৰে আৰম্ভ কৰা উক্ত বৈঠকৰ আৰম্ভণিতে স্বাস্থ্য বিভাগৰ প্ৰধান সচিব সমীৰ কুমাৰ সিনহাই ৰাজ্যখনৰ শেহতীয়া ক’ভিড পৰিস্থিতিৰ অৱলোকনেৰে এক প্ৰেজেন্টেশ্যন আগবঢ়ায়।
ইয়াৰ পিছতে স্বাস্থ্য আৰু পৰিয়াল কল্যাণ বিভাগৰ মন্ত্ৰী ড০ হিমন্ত বিশ্ব শৰ্মাই নিজৰ বক্তব্যত ৰাজ্যখনৰ শেহতীয়া ক’ভিড পৰিস্থিতি অৱলোকন কৰাৰ লগতে আগন্তক দুৰ্গাপূজা তথা দ্বীপান্বিতাৰ দৰে উৎসৱৰ বতৰত সম্ভাব্য ক’ভিড সংক্ৰমণ বৃদ্ধিৰ প্ৰতি লক্ষ্য ৰাখি বিটিচিৰ নিৰ্বাচন আগন্তক ডিচেম্বৰ মাহত অনুষ্ঠিত কৰাৰ পোষকতা কৰি এই বিষয়ে ইতিমধ্যে মুখ্যমন্ত্ৰীৰ ওচৰত প্রস্তাৱ উত্থাপন কৰিছে বুলি কোৱাৰ লগতে মুখ্যমন্ত্ৰীৰ নিৰ্দেশমৰ্মে এই বিষয়ত সকলো দলৰে মতামত গ্ৰহণ কৰাৰ বাবে আজিৰ এই সৰ্বদলীয় বৈঠকখন ৰাজ্য চৰকাৰে অনুষ্ঠিত কৰিছে বুলিও কয়।
তেওঁ লগতে কয় যে মুখ্যমন্ত্ৰীয়ে এই সম্পৰ্কত সকলো ৰাজনৈতিক দলৰ স্থিতি ব্যক্ত কৰাৰ বাবে আজিৰ এই বৈঠকখন অনুষ্ঠিত কৰিছে।
ইয়াৰ পিছতে কোকৰাবাৰ লোকসভা সমষ্টিৰ সাংসদ নৱ কুমাৰ শৰণীয়া, ইউ পি পি এলক প্ৰতিনিধিত্ব কৰা প্রমোদ বড়ো, বিপিএফ দলৰ ৰবিৰাম নাৰ্জাৰী, এ আই ইউ ডি এফৰ আমিনুল ইছলাম, ভাৰতীয় জাতীয় কংগ্ৰেছৰ দুৰ্গা দাস বড়ো, চি পি আই (এম)ৰ দেবেন ভট্টাচাৰ্য, ভাৰতীয় গণ পৰিষদৰ সুকান্ত মজুমদাৰ, ভোটাৰ্চ পাৰ্টি ইন্টাৰনেশ্যনেলৰ ললিত পেণ্ড, অসম গণ পৰিষদৰ কেশৱ মহন্ত, ভাৰতীয় জনতা পাৰ্টিৰ জয়ন্ত কুমাৰ দাসে ক’ভিড পৰিস্থিতিৰ এই জটিল সন্ধিক্ষণত বিটিচিৰ নিৰ্বাচন অনুষ্ঠিত কৰা সম্পৰ্কত নিজ নিজ দলৰ দৃষ্টিভংগী উত্থাপন কৰে।
বৈঠকত অধ্যক্ষতা কৰি মুখ্যমন্ত্ৰী সৰ্বানন্দ সোণোৱালে কয় যে বিটিআৰত আজি যি পৰিস্থিতি উদ্ভৱ হৈছে সেই কথা বিস্তৃতভাৱে আলোচনা কৰাৰ বাবে আজিৰ এই বৈঠকখন অনুষ্ঠিত কৰা হৈছে। এই বৈঠকত উপস্থিত থাকি প্রত্যেকটো দলে বিটিচিৰ নিৰ্বাচন সম্পৰ্কত নিজৰ নিজৰ মত দাঙি ধৰাৰ বাবে মুখ্যমন্ত্ৰীয়ে সকলোকেইটা ৰাজনৈতিক দলৰ প্রতিনিধিসকলক আন্তৰিকভাৱে ধন্যবাদ জ্ঞাপন কৰাৰ লগতে সকলো দলে সন্মিলিতভাৱে গণতান্ত্ৰিক প্রক্ৰিয়া অব্যাহত ৰখাৰ দিশত কাম কৰিব লাগিব বুলিও কয়।
এই ক্ষেত্ৰত চৰকাৰ আৰু বিৰোধী দল সকলোৱে ‘টীম অসম’ৰ ধাৰণাৰে কাম কৰিব লাগিব বুলিও কয়।
আজিৰ বৈঠকত উপস্থিত থকা ৰাজনৈতিক দলসমূহে উত্থাপন কৰা মতামতসমূহ লিপিৱদ্ধ কৰা হৈছে বুলি উল্লেখ কৰি কাইলৈ অনুষ্ঠিত হ’বলগীয়া কেবিনেট বৈঠকতো এই সম্পৰ্কত বিস্তৃতভাৱে আলোচনা কৰা হ’ব বুলিও মুখ্যমন্ত্ৰীয়ে কয়।
এই সমগ্র প্রক্ৰিয়াত বিটিআৰৰ জনসাধাৰণ যাতে কোনো ধৰণৰ ক্ষতিগ্ৰস্ত নোহোৱাকৈ গণতান্ত্ৰিক প্রক্ৰিয়াটোক আগবঢ়াই নিব পৰা যায় সেই দৃষ্টিকোণ আগত ৰাখিয়েই ৰাজ্য চৰকাৰে সঠিক সিদ্ধান্ত ল’ব বুলিও মুখ্যমন্ত্ৰীয়ে কয়।
স্বাস্থ্য বিধি অটুত ৰাখি গণতান্ত্ৰিক প্ৰক্ৰিয়াক আগবঢ়াই নিয়াৰ দিশত ৰাজ্য চৰকাৰে পদক্ষেপ ল’ব বুলি উল্লেখ কৰি আগন্তুক দিনত শাসক-বিৰোধীৰ মিলিত প্ৰচেষ্টাৰে এনেদৰে জনসাধাৰণক সেৱা কৰাৰ বাবে ৰাজ্য চৰকাৰে ইতিবাচক পদক্ষেপ লৈ যাব বুলিও মুখ্যমন্ত্ৰীয়ে কয়।
আজিৰ এই সৰ্বদলীয় বৈঠকত উদ্যোগ আৰু বাণিজ্য বিভাগৰ মন্ত্ৰী চন্দ্ৰমোহন পাটোৱাৰী, কৃষি মন্ত্ৰী অতুল বৰা, ভৈয়াম জনজাতি আৰু পিছপৰা শ্ৰেণী কল্যাণ বিভাগৰ মন্ত্ৰী চন্দন ব্ৰহ্ম, জনস্বাস্থ্য কাৰিকৰী বিভাগৰ মন্ত্ৰী ৰিহণ দৈমাৰী, জলসিঞ্চন বিভাগৰ ৰাজ্যিক (স্বতন্ত্ৰ) মন্ত্ৰী ভৱেশ কলিতা, মুখ্য সচিব কুমাৰ সঞ্জয় কৃষ্ণ, গৃহ আৰু ৰাজনৈতিক বিভাগৰ দায়িত্ব থকা অতিৰিক্ত মুখ্য সচিব জিষুণ বৰুৱাকে ধৰি বিভিন্ন ৰাজনৈতিক দলৰ সভাপতি, সম্পাদক তথা অন্যান্য বিষয়ববীয়াসকলে অংশগ্ৰহণ কৰে।
