শনিবাৰে উত্তৰ প্ৰদেশ আৰক্ষীক এহাল আন্তঃধৰ্মীয় দম্পতীক অবৈধভাৱে আটক কৰাৰ বাবে এলাহবাদ উচ্চ ন্যায়ালয়ে তীব্ৰ সমালোচনা কৰে। এই কাৰ্যক ন্যায়ালয়ে তেওঁলোকৰ মৌলিক অধিকাৰৰ উলংঘা বুলি উল্লেখ কৰে। ন্যায়ালয়ে কয় যে “সামাজিক হেঁচা”ত আইনৰ কৰ্তৃত্ব অবিহনে আটক কৰা কাৰ্য বৈধ নহয়।
বিশেষ শুনানিৰ ন্যায়াধীশ সলিল কুমাৰ ৰায় আৰু দিবেশ চন্দ্ৰ সমান্তৰ বিচাৰপীঠে দম্পতীহালক (এজন মুছলমান পুৰুষ আৰু এগৰাকী হিন্দু মহিলাক) মুকলি কৰি দিয়াৰ নিৰ্দেশ দিয়ে। ইয়াৰ উপৰিও দম্পতীহালৰ সুৰক্ষা নিশ্চিত কৰিবলৈ আৰু তেওঁলোকৰ সংগীতৰ কাৰ্যসূচীত যাতে কোনো ধৰণৰ অতিৰিক্ত আইনী হস্তক্ষেপ নহয় তাৰ বাবেও আৰক্ষীক নিৰ্দেশ দিয়ে।
উল্লেখ্য যে ছোৱালীগৰাকীৰ পিতৃয়ে তেওঁৰ ‘নাবালিকা’ কন্যাক শ্বেন আলী নামৰ এজন লোকে অপহৰণ কৰাৰ অভিযোগ উত্থাপন কৰি এফআইআৰ দাখিল কৰিছিল।এই অভিযোগৰ ভিত্তিত আলিগড় আৰক্ষীয়ে দম্পতীহালক গ্ৰেপ্তাৰ কৰে। যেতিয়া তেওঁলোকক নিম্ন আদালতত হাজিৰ কৰা হয়, তেতিয়া যুৱতীগৰাকীয়ে তেওঁ এগৰাকী প্ৰাপ্তবয়স্ক আৰু নিজৰ ইচ্ছামতে আলীৰ সৈতে বিয়াত বহিছে বুলি ভাষ্য দিয়ে।
উচ্চ ন্যায়ালয়ৰ সন্মুখত হাবিয়াছ কৰ্পাছ আবেদনৰ পাছত শনিবাৰে দম্পতীহালক ন্যায়ালয়ত হাজিৰ কৰা হয় য’ত তেওঁলোকে দাবী কৰে যে মহিলাগৰাকীৰ পিতৃ আৰু তেওঁৰ সহযোগীয়ে তেওঁলোকক অপহৰণ কৰি আৰক্ষীৰ সহায়ত আলিগড়লৈ লৈ গৈছিল। মহিলাগৰাকীক ‘ৱান ষ্টপ চেণ্টাৰ’লৈ প্ৰেৰণ কৰাৰ বিপৰীতে ১৫ অক্টোবৰৰ পৰা লোকজনক থানাত আবদ্ধ কৰি ৰখা হৈছিল।
ন্যায়ালয়ে চৰকাৰী অধিবক্তাজনক আটক কৰাৰ বিষয়ে সোধা প্ৰশ্নত তেওঁ দাবী কৰে যে আন্তঃধৰ্মীয় বিবাহৰ বাবে অঞ্চলটোত সামাজিক উত্তেজনা সৃষ্টি হৈছে আৰু আৰক্ষীয়ে দম্পতীহালক আটক কৰিবলগীয়া হৈছে। কিন্তু আদালতে লক্ষ্য কৰিলে যে ছোৱালীগৰাকী প্ৰাপ্তবয়স্ক আৰু আৰক্ষী বা তেঁওৰ পিতৃয়ে জিম্মাত ৰাখিব নোৱাৰে।
ন্যায়ালয়ৰ দৃষ্টিত দুয়োকে আৰক্ষীৰ জিম্মাত ৰখাটো অবৈধ আছিল আৰু ভাৰতৰ সংবিধানৰ ২১ নং অনুচ্ছেদৰ অধীনত ছোৱালীগৰাকী আৰু পুৰুষজনৰ মৌলিক অধিকাৰ খৰ্ব কৰা হৈছিল। দুয়োৰে পৃথক ধৰ্মৰ বাবে অঞ্চলটোত সামাজিক উত্তেজনাৰ বাবে ছোৱালীজনীক ‘ৱান ষ্টপ চেণ্টাৰ’ত ৰখাৰ লগতে পুৰুষজনক থানাত আবদ্ধ কৰি ৰখা হৈছিল বুলি কৰা আবেদনখন গ্ৰহণযোগ্য নহয় আৰু আৰু এই উপাদানসমূহে আটক কৰাৰ ন্যায্যতা প্ৰদান কৰিব নোৱাৰে।
লগতে ন্যায়ালয়ে কয় গণতান্ত্ৰিক দেশ এখনত ৰাজ্য চৰকাৰ আৰু আইন বলবৎকাৰী যন্ত্ৰই নিজৰ ক্ষমতা ব্যৱহাৰ কৰি এজন নাগৰিকৰ স্বাধীনতা ৰক্ষা কৰিব আৰু ভৱিষ্যতে সামাজিক হেঁচাৰ বলি হৈ নাগৰিকৰ স্বাধীনতা কৰ্তন নকৰিব বুলি আশা কৰিব পাৰি।
তদুপৰি ন্যায়ালয়ে দুয়োৰে স্বাধীনতা ৰক্ষাত ব্যৰ্থ বিষয়াসকলৰ বিৰুদ্ধে বিভাগীয় ব্যৱস্থা গ্ৰহণ কৰিবলৈ আৰক্ষী আয়ুক্তক নিৰ্দেশ দিয়ে। লগতে এই গোচৰৰ তদন্ত কৰি এমাহৰ ভিতৰত প্ৰতিবেদন দাখিল কৰিবলৈয়ো এলাহবাদ উচ্চ ন্যায়ালয়ে আলিগড়ৰ আৰক্ষী আয়ুক্তক নিৰ্দেশ দিয়ে।
