দুৰ্নীতিৰ বিৰুদ্ধে অসম চৰকাৰে ব্যাপক অভিযান আৰম্ভ কৰা বুলি ঢাকঢোল কোবালেও দুৰ্নীতি ৰোধত সফল হ’ব পৰা নাই হিমন্ত বিশ্ব শৰ্মাৰ অসম চৰকাৰ। চৰকাৰৰ নাকৰ তলতে এতিয়াও ৰাজ্যত চলি আছিল দুৰ্নীতিৰ মুকলি বজাৰ।
এইবাৰ প্ৰধানমন্ত্ৰী আৱাস যোজনাৰ নামত দুৰ্নীতি সংঘটিত হোৱাৰ অভিযোগ উঠিছে গোৱালপাৰা জিলাৰ এখন পঞ্চায়তত। গোৱালপাৰাৰ ধাইগাওঁ পঞ্চায়তৰ বিৰুদ্ধে এই গুৰুতৰ অভিযোগ তুলিছে পঞ্চায়তৰ অন্তৰ্গত এখন গাঁৱৰ ৰাইজে।
গাঁওখনৰ ৰাইজৰ অভিযোগ অনুসৰি ধন নিদিলে হিতাধিকাৰীয়ে লাভ নকৰে চৰকাৰী ঘৰ৷ ধন বা অন্য কোনো সম্পদ বাবদ পঞ্চায়ত কৰ্তৃপক্ষই যোগান ধৰে চৰকাৰী আৱাস গৃহ! এই অভিযোগ উত্থাপন কৰিছে কৃষ্ণাইৰ সৰ্দাৰপাৰা গাঁৱৰ একংশ লোকে।
ধন নিদিলে “জিয়-টেক” পৰ্যন্ত কৰা হিতাধিকাৰীৰো নামো তালিকাৰ পৰা কৰ্তন কৰা হয় বুলি গঞা ৰাইজে অভিযোগ তুলিছে! এনেদৰে এতিয়া দালালৰাজেৰে গোৱালপাৰাৰ একাংশ পঞ্চায়তত চলিছে প্ৰধানমন্ত্ৰী আৱাস যোজনাৰ নামত দুৰ্নীতি।
পঞ্চায়ত কৰ্তৃপক্ষৰ বিৰুদ্ধে এই গুৰুতৰ অভিযোগ উত্থাপন কৰিছে গাঁওখনৰ স্থানীয় ৰাইজে। এতিয়া প্ৰশ্ন হৈছে, ৰাইজে অভিযোগ কৰা দৰেই ধনৰ বিনিময়ত যোগান ধৰা হয় নেকি চৰকাৰী গৃহ? যদিহে এয়াই হৈছে তেন্তে এনেবোৰ দালালৰূপী পঞ্চায়ত কতৃপক্ষৰ বিৰুদ্ধে কি ব্যৱস্থা গ্ৰহণ কৰিব চৰকাৰে?