হায়দৰাবাদৰ সন্ধ্যা থিয়েটাৰত পদপিষ্ট হৈ মহিলাৰ মৃত্যুৰ গোচৰত জেৰাৰ বাবে আৰক্ষী থানাত হাজিৰ হৈছে আল্লু অৰ্জুন। মঙলবাৰে পুৱা হায়দৰাবাদ আৰক্ষী থানাত হাজিৰ হয় অভিনেতাগৰাকী। ইফালে বাস্তৱ জীৱনৰ ‘পুষ্পা’ৰ বাবে বিপদ বাঢ়িয়ে গৈছে। এইবাৰ কংগ্ৰেছ নেতাৰ ৰোষত পৰিল অভিনেতাগৰাকী।
আল্লু অৰ্জুন অভিনীত ছবি ‘পুষ্পা ২: দ্য ৰুল’ৰ এটা দৃশ্যক লৈ আপত্তি কৰিছে তেলেংগানা কংগ্ৰেছ নেতা তিনমাৰ মাল্লানাৰে। অভিনেতাগৰাকীৰ এই ছুপাৰহিট ছবিখনত আৰক্ষী জোৱানক অপমান কৰা বুলি অভিযোগ কৰা হৈছে।
জানিব পৰা মতে, কংগ্ৰেছ নেতাগৰাকীয়ে হায়দৰাবাদৰ মেডিপল্লী আৰক্ষী থানাত পৰিচালক সুকুমাৰ, মুখ্য অভিনেতা আল্লু অৰ্জুন আৰু ‘পুষ্পা ২: দ্য ৰুল’ ছবিখনৰ প্ৰযোজকৰ বিৰুদ্ধে এজাহাৰ দাখিল কৰে। তিনমাৰ মাল্লান্না হৈছে তেলেংগানা বিধান পৰিষদৰ সদস্য।
লগতে পঢ়কঃ মগজুত জমিছে তেজ, বিনামূলীয়া চিকিৎসা আগবঢ়াব হাস্পাতালে; চিকিৎসকৰ প্ৰতি কৃতজ্ঞ কাম্বলি
ছবিখনৰ এটা দৃশ্যত ‘পুষ্পা’ আল্লুৱে অভিনেতা ফাহাদ ফাজিলৰ চৰিত্ৰত অভিনয় কৰা এছ পি ‘ভৱৰ সিং শ্বেখাৱত’ক চুইমিং পুলত পেলাই দিয়ে। ইয়াৰ পিছত মাতাল অৱস্থাত ‘পুষ্পাই’ চুইমিং পুলত প্ৰস্ৰাৱ কৰি দিয়ে। এনে দৃশ্য আৰক্ষী বাহিনীৰ বাবে অতি অপমানজনক বুলি দাবী কৰে কংগ্ৰেছ নেতাগৰাকীয়ে। ইয়াৰ বিৰুদ্ধে অনতিপলমে কঠোৰ ব্যৱস্থা গ্ৰহণৰ দাবী তোলে মাল্লান্নাই।
আল্লুৰ বিৰুদ্ধে সৰৱ হৈছে AIMIMৰ বিধায়ক আকবৰুদ্দিন ৱাইছিয়েও। তেলেংগানাৰ মুখ্যমন্ত্ৰী ৰেৱন্ত ৰেড্ডীয়েও আল্লুক ৰেহাই দিয়া নাই। ছুপাৰষ্টাৰগৰাকীৰ ঘৰতো আক্ৰমণ হৈছে। এই ঘটনাত ৬ জন লোকক গ্ৰেপ্তাৰ কৰা হয় যদিও পিছত আটাইকেইজনক জামিনত মুকলি কৰি দিয়া হয়। বিজেপিৰ অভিযোগ যে আল্লুৰ ঘৰত আক্ৰমণৰ আঁৰত আছে ৰেৱন্ত ৰেড্ডী।
লগতে পঢ়কঃ শ্যাম বেনেগালৰ দেহাৱসান; ৯০ বছৰত স্তব্ধ হৈ পৰিল কিংবদন্তি পৰিচালকৰ জীৱন
সন্ধ্যা থিয়েটাৰত পদপিষ্ট হৈ মৃত্যু হোৱা মহিলাগৰাকীৰ ৯ বছৰীয়া পুত্ৰ এতিয়াও চিকিৎসালয়ৰ আই চি ইউত আছে। আল্লুৰ পিতৃয়ে তেওঁক চাবলৈ গৈছিল।
