দেশত কৰ’না আক্ৰান্ত ৰোগীৰ সংখ্যা প্ৰায় ৮২হাজাৰ স্পৰ্শ কৰিছে। যোৱা ২৪ ঘন্টাত প্ৰায় ৪হাজাৰ নতুন ঘটনা পোহৰলৈ আহিছে আৰু ৯৭জন লোকৰ মৃত্যু হৈছে।
শুকুৰবাৰে স্বাস্থ্য বিভাগে প্ৰকাশ কৰা শেহতীয়া তথ্য অনুসৰি, দেশত এতিয়া কৰ’না আক্ৰান্ত মুঠ ৰোগীৰ সংখ্যা হৈছে ৮১ হাজাৰ ৯৭০জন।
ইয়াৰ ভিতৰত ২৬৪৯জন ৰোগীৰ মৃত্যু হৈছে আৰু ২৭হাজাৰ ৯২০জন ৰোগী সুস্থ হৈ উঠিছে।
দেশত বৰ্তমান ৫১হাজাৰ ৪০১টা সক্ৰিয় পজিটিভ ঘটনা আছে।
ৰাজ্যসমূহৰ ভিতৰত কৰ’না আক্ৰান্তৰ সংখ্যা আটাইতকৈ বেছি মহাৰাষ্ট্ৰত। ৰাজ্যখনত আক্ৰান্তৰ সংখ্যা ২৭হাজাৰ স্পৰ্শ কৰিছে।
মহাৰাষ্ট্ৰত এতিয়ালৈকে মুঠ ১০১৯জন লোকৰ মৃত্যু হৈছে।
সেইদৰে, গুজৰাটত কৰ’না আক্ৰান্ত ৰোগীৰ সংখ্যা ৯হাজাৰ ৫৯১জনলৈ বৃদ্ধি পাইছে। ৰাজ্যখনত মুঠ ৫৮৬জন লোকৰ মৃত্যু হৈছে।
আনহাতে, তামিলনাডুত কৰ’না সংক্ৰমম দ্ৰুতভাৱে বৃদ্ধি পাইছে। ৰাজ্যখনত বৰ্তমান ৰোগীৰ সংখ্যা ৯হাজাৰ ৬৭৪জনলৈ বৃদ্ধি পাইছে আৰু ৬৬জন লোকৰ মৃত্যু হৈছে।
ইপিনে, দিল্লীত কৰ’না ৰোগীৰ সংখ্যা ৮হাজাৰ অতিক্ৰম কৰিছে। স্বাস্থ্য মন্ত্ৰ্যালয়ৰ তথ্য অনুসৰি, দিল্লীত মুঠ ৰোগীৰ সংখ্যা ৮হাজাৰ ৪৭০জন আৰু ইয়াৰে ভিতৰত ১১৫জন লোকৰ মৃত্যু হৈছে।
ৰাজস্থানত এতিয়ালৈকে নিশ্চিত হোৱা মুঠ পজিটিভ ৰোগীৰ সংখ্যা হৈছে ৪৫৩৪জন। ৰাজ্যখনত ১২৫জন লোকৰ মৃত্যু হৈছে।
মধ্য প্ৰদেশত এতিয়ালৈকে ৪৪২৬জন পজিটিভ ৰোগী পোৱা গৈছে। ইয়াৰে ভিতৰত ২৩৭জন লোকৰ মৃত্যু হৈছে।
সেইদৰে, উত্তৰ প্ৰদেশত কৰ’না আক্ৰান্ত ৰোগীৰ সংখ্যা ৩৯০২গৰাকীলৈ বৃদ্ধি পাইছে। ইয়াৰে ৮৮জন লোকৰ মৃত্যু হৈছে।
অসমত এতিয়ালৈকে ৮৬ গৰাকী লোকৰ দেহত পোৱা গৈছে এই মাৰাত্মক ভাইৰাছ।
ইয়াৰে ৪৪ জন চিকিৎসাধীন হৈ থকাৰ বিপৰীতে ৩৫ জনক চিকিৎসালয়ৰ পৰা মুক্তি দিয়া হৈছে। ইতিমধ্যে দুগৰাকী আক্ৰান্তই মৃত্যুক আঁকোৱালি লৈছে।
