অসমৰ কাৰ্বি আংলং জিলাত প্ৰস্তাৱিত দুটা বৃহৎ পাম্পড ষ্টোৰেজ শক্তি প্ৰকল্পক লৈ সৃষ্টি হোৱা তীব্ৰ বিৰোধিতাৰ মাজতে কেন্দ্ৰীয় চৰকাৰৰ বন উপদেষ্টা সমিতিয়ে ইয়াৰ বাবে প্ৰাৰম্ভিক অনুমোদন জনাইছে। কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰালয়ৰ অধীনস্থ এই সমিতিয়ে যোৱা ২২ জানুৱাৰীত অনুষ্ঠিত এখন বৈঠকত এই সিদ্ধান্ত গ্ৰহণ কৰে। অসম শক্তি বিতৰণ কোম্পানী লিমিটেডৰ দ্বাৰা প্ৰস্তাৱিত এই প্ৰকল্প দুটাৰ বিৰুদ্ধে পাহাৰীয়া জিলাখনৰ বিভিন্ন দল-সংগঠন আৰু নাগৰিক সমাজে দীৰ্ঘদিন ধৰি প্ৰতিবাদ সাব্যস্ত কৰি আহিছিল যদিও সমিতিয়ে নীতিগতভাৱে ইয়াৰ সপক্ষে সঁহাৰি জনাইছে।
প্ৰায় ২৪০০ মেগাৱা্ট ক্ষমতা সম্পন্ন এই প্ৰকল্প দুটাৰ বাবে কাৰ্বি আংলঙৰ ৫২১ হেক্টৰতকৈও অধিক বনভূমি ব্যৱহাৰ কৰাৰ পৰিকল্পনা কৰা হৈছে। ইয়াৰ ভিতৰত ডিফু মহকুমাৰ লিপগাঁও গাঁৱত নিৰ্মাণ হ’বলগীয়া ১৫০০ মেগাৱাটৰ প্ৰকল্পটোৰ বাবে ৪৪১.৯ হেক্টৰ সংৰক্ষিত বনভূমি ডাইভাৰচন কৰা হ’ব। এই অঞ্চলটো জৈৱ-বৈচিত্ৰ্যৰ দিশৰ পৰা অত্যন্ত চহকী আৰু ইয়াৰ প্ৰায় ২১,৭৬৭ জোপা গছ কাটি পেলোৱাৰ প্ৰস্তাৱ দিয়া হৈছে। ইয়াৰ উপৰিও এই ঘন অৰণ্য এলেকাত চিতা বাঘ, হলৌ বান্দৰ, বনৰীয়া ছাগলী আৰু অজগৰৰ দৰে বিৰল বন্যপ্ৰাণীৰ বসতি আছে, যাৰ বাবে পৰিৱেশবিদসকলে গভীৰ চিন্তা ব্যক্ত কৰিছে।
আনহাতে পশ্চিম কাৰ্বি আংলং জিলাৰ ডংকা মহকুমাৰ থাৰাখুন্সি গাঁৱৰ ওচৰত ৯০০ মেগাৱাটৰ দ্বিতীয়টো প্ৰকল্প নিৰ্মাণ কৰাৰ প্ৰস্তাৱ দিয়া হৈছে। ইয়াৰ বাবে ৭৯.৩৭ হেক্টৰ বনভূমি ব্যৱহাৰ কৰা হ’ব আৰু ৬,৯০৫ জোপা গছ কটাৰ কথা উল্লেখ কৰা হৈছে। বন উপদেষ্টা সমিতিয়ে এই নিৰ্মাণ কাৰ্যৰ বাবে পৰিৱেশ আৰু বন্যপ্ৰাণী সুৰক্ষাৰ কেইবাটাও চৰ্ত আৰোপ কৰিছে। বিশেষকৈ কাজিৰঙা-কাৰ্বি আংলং হস্তী সংৰক্ষিত বনাঞ্চলৰ ওচৰত হোৱা বাবে এই প্ৰকল্পৰ পৰা বন্যপ্ৰাণীৰ যাতে ক্ষতি নহয়, তাৰ বাবে ৰাজ্য চৰকাৰক এক সুকীয়া বন্যপ্ৰাণী ব্যৱস্থাপনা আঁচনি প্ৰস্তুত কৰিবলৈ নিৰ্দেশ দিয়া হৈছে।
এই প্ৰকল্প দুটাক কেন্দ্ৰ কৰি ৰাজনৈতিক মহলতো ব্যাপক বিতৰ্কৰ সৃষ্টি হৈছে। অল পাৰ্টি হিল লিডাৰ্ছ কনফাৰেন্স, ৰাইজৰ দল আৰু চিপিআই(এম)-ৰ দৰে দলসমূহে অভিযোগ কৰিছে যে চৰকাৰে ব্যক্তিগত খণ্ডৰ কোম্পানী গ্ৰীণকো এনাৰ্জীক সুবিধা কৰি দিবলৈহে চৰকাৰী প্ৰতিষ্ঠান এপিডিচিএলক সন্মুখত ৰাখিছে। তেওঁলোকৰ মতে সংবিধানৰ ষষ্ঠ অনুসূচীৰ সুৰক্ষা কৱচ থকাৰ বাবে ব্যক্তিগত কোম্পানীয়ে পোনপটীয়াকৈ ভূমি অধিগ্ৰহণ কৰিব নোৱাৰে, সেয়েহে চৰকাৰে এই কৌশলী পথ অৱলম্বন কৰিছে। জনজাতীয় লোকসকলৰ পৰা কোনো ধৰণৰ আগতীয়া সন্মতি নোলোৱাকৈ চলাই থকা এই কামে খিলঞ্জীয়া লোকৰ স্বাধিকাৰ খৰ্ব কৰিব বুলিও আন্দোলনকাৰীসকলে দাবী জনাইছে।
প্ৰকল্পটোৰ ফলত কেইবাটাও পৰিয়াল গৃহহীন হোৱাৰ উপৰিও শ শ পৰিয়াল আৰ্থিকভাৱে প্ৰভাৱিত হ’ব বুলি জানিব পৰা গৈছে। যদিও বন সমিতিয়ে ভূমি খহনীয়া ৰোধ কৰা আৰু ক্ষতিগ্ৰস্ত লোকৰ পুনৰ সংস্থাপনৰ বাবে কঠোৰ নিৰ্দেশনা দিছে, তথাপিও স্থানীয় ৰাইজৰ ক্ষোভ মাৰ যোৱা নাই। বৰঞ্চ এই বৃহৎ প্ৰকল্পৰ জৰিয়তে কাৰ্বি আংলঙৰ পৰিৱেশ তন্ত্ৰ আৰু পৰম্পৰাগত ঝুম খেতিৰ ওপৰত কি প্ৰভাৱ পৰিব, তাক লৈ এক অনিশ্চয়তাৰ সৃষ্টি হৈছে। ভৱিষ্যতে এই চৰ্তসমূহ সঠিকভাৱে পালন হ’লেহে প্ৰকল্পটোৱে চূড়ান্ত অনুমোদন লাভ কৰিব বুলি জানিব পৰা গৈছে।
