বৰ্তমান আমেৰিকা ভ্ৰমণত আছে প্ৰধানমন্ত্ৰী নৰেন্দ্ৰ মোডী। বৃহস্পতিবাৰে নিশা হোৱাইট হাউছত তেওঁৰ সন্মানত ৰাষ্ট্ৰীয় নৈশভোজৰ আয়োজন কৰে আমেৰিকাৰ ৰাষ্ট্ৰপতি জো বাইডেনে। ইয়াৰ মাজতে আমেৰিকাৰ প্ৰাক্তন ৰাষ্ট্ৰপতি বাৰাক অ’বামাই সংবাদ মাধ্যম ‘চিএনএন’ত ভাৰতক লৈ বিস্ফোৰক মন্তব্য কৰিছে।
উল্লেখ্য যে অ’বামাৰ কাৰ্যকালৰ পৰাই ভাৰত আমেৰিকাৰ ওচৰ চাপিবলৈ আৰম্ভ কৰিছিল। সেই সময়ত উপ-ৰাষ্ট্ৰপতি আছিল জো বাইডেন। আজি সেই বাইডেন আমেৰিকাৰ ৰাষ্ট্ৰপতি। তেওঁৰ নিমন্ত্ৰণ মৰ্মে নৰেন্দ্ৰ মোডী ৰাষ্ট্ৰীয় ভ্ৰমণৰ কাৰ্যসূচী লৈ আমেৰিকালৈ যায়। ইয়াৰ মাজতে অ’বামাই ভাৰতত ‘ধৰ্মীয় অসহিষ্ণুতা’ৰ বিষয়কলৈ সৰৱ হৈছে।
লগতে পঢ়ক: হোৱাইট হাউছত মোদীৰ অভ্যৰ্থনা! আম্বানীৰ পৰা পিচাইলৈ নৈশভোজত অতিথিৰ দীঘলীয়া তালিকা
আমেৰিকাৰ প্ৰাক্তন ৰাষ্ট্ৰপতি বাৰাক অ’বামাই চিএনএনত ভাৰতক লৈ বিস্ফোৰক মন্তব্য কৰে। তেওঁ কয়, ‘ধৰ্মীয় সংখ্যালঘু আৰু অন্যান্য জাতিৰ মানৱ অধিকাৰ সুৰক্ষিত নহ’লে ভৱিষ্যতে ভাৰত বিভাজিত হ’ব পাৰে।’ অ’বামাই লগতে কয় যে বাইডেন প্ৰশাসনেও সংখ্যালঘু অধিকাৰৰ বিষয়টো ভাৰত চৰকাৰৰ সৈতে আলোচনা কৰা উচিত।
অ’বামাই কয়, ‘যদি ৰাষ্ট্ৰপতিয়ে প্ৰধানমন্ত্ৰীৰ সৈতে বৈঠকত বহে, তেন্তে তেওঁ ভাৰতত সংখ্যালঘু মুছলমানসকলৰ স্থিতিৰ বিষয়টো উত্থাপন কৰা উচিত। মই নিজেই মোডীক চিনি পাওঁ। এই পৰিস্থিতিত তেওঁক লগ পোৱা হ’লে ক’লোহেঁতেন, ‘আপুনি যদি সংখ্যালঘুসকলৰ অধিকাৰ ৰক্ষা নকৰে, তেনেহ’লে ভাৰতৰ বিভাজিত হোৱাৰ সম্ভাৱনা অধিক৷’
উল্লেখ্য যে ডেম’ক্ৰেটিক পাৰ্টিৰ ভিতৰত বাইডেনৰ অন্যতম ডাঙৰ সমৰ্থক অ’বামা। ইয়াৰ পূৰ্বে ডেম’ক্ৰেটিক দলৰ ৭৫ জন সাংসদে বাইডেনলৈ পত্ৰ লিখিছিল। তেওঁলোকে ভাৰতৰ সংখ্যালঘুৰ বিষয়টো মোডীৰ আগত উত্থাপন কৰিবলৈ আবেদন জনায়। অৱশ্যে হোৱাইট হাউছে জনাইছে যে ভাৰতক গণতন্ত্ৰৰ বিষয়ে ‘জ্ঞান’ দিয়া নহয়।
লগতে পঢ়ক: টাইটানৰ সকলো যাত্ৰীৰ মৃত্যু; আটলাণ্টিকত ধ্বংসাৱশেষ উদ্ধাৰৰ পিছতে ঘোষণা আমেৰিকান ক’ষ্ট গাৰ্ডৰ
ইপিনে, বাইডেনৰ সৈতে যৌথ বিবৃতিত প্ৰধানমন্ত্ৰী মোদীয়ে কয়, ‘গণতন্ত্ৰ আমাৰ চেতনাত, আমাৰ শিৰাই শিৰাই আছে। আমি গণতন্ত্ৰত বাস কৰো। আমাৰ চৰকাৰে সংবিধান অনুসৰি কাম কৰে। ভাৰতত জাতি, ধৰ্ম, লিংগ, বয়সৰ ভিত্তিত কোনো বৈষম্য নাই। ভাৰতে গণতন্ত্ৰৰ উশাহ লয় গতিকে বৈষম্যৰ কোনো প্ৰশ্নই নুঠে।’
