মুখ্যমন্ত্ৰী ড৹ হিমন্ত বিশ্ব শৰ্মাৰ ড্ৰাগছ মুক্ত অসম অভিযানক বুঢ়া আঙুলি দেখুৱাইছে আমিনগাঁও আৰক্ষীয়ে ।
আৰক্ষীৰ চত্ৰছায়াতে আমিনগাঁৱৰ বিভিন্ন প্ৰান্তত বৰবিহ ড্ৰাগছৰ ৰমৰমীয়া কলা বেহা চলাৰ অভিযোগ ।
ড্ৰাগছ সৰবৰাহকাৰীৰে গোপন মিতিৰালিৰ অভিযোগ আমিনগাঁও আৰক্ষী চকীৰ ভাৰপ্ৰাপ্ত আৰক্ষী বিষয়া মুকুট বৈশ্যৰ বিৰুদ্ধে ।
আমিনগাঁও ICDত বৃহৎ পৰিমানৰ ড্ৰাগছ জব্দ ঘটনা সন্দৰ্ভত ৭ দিনৰ পাছতো ৰুজু নহ’ল গোচৰ ।
আৰক্ষীৰ নিষ্ক্ৰিয় ভূমিকাত অতিষ্ঠ হৈ ২৪ ডিচেম্বৰ শুক্ৰবাৰে স্থানীয় ৰাইজৰ তৎপৰতাত আৰক্ষীয়ে চলাইছিল ড্ৰাগছৰ বিৰুদ্ধে অভিযান ।
অভিযানত এটা অবৈধ ডেম্পত উদ্ধাৰ হৈছিল বৃহৎ পৰিমানৰ ড্ৰাগছসহ কণ্টেইনাৰ, চিৰিঞ্জ আৰু নিচাজাতীয় টেবলেটৰ লগতে কেইবাটাকৈ এনড্ৰইড ম’বাইল ফোন ।
আনোৱাৰা বেগম আৰু ৰুমি বেগম নামৰ দুগৰাকী ড্ৰাগচ সৰবৰাহকাৰী মহিলাক আটক কৰিছিল আমিনগাঁও আৰক্ষীয়ে ।
কিন্তু অতি ৰহস্যজনক ভাৱে ড্ৰাগছ সৰবৰাহকাৰী আনোৱাৰা বেগম আৰু ৰুমি বেগমক উপঢৌকনৰ বিনিময়ত মুকলি দিয়ে আৰক্ষীয়ে ।
উল্লেখ্য যে ড্ৰাগছ জব্দৰ ঘটনা সংক্ৰান্তত ৭২ ঘন্টাৰ ভিতৰত NDPS আইনৰ আধাৰত ৰুজু হ’ব লাগিছিল গোচৰ কিন্তু ৭ দিন পাছতো আৰক্ষীয়ে ৰুজু নকৰিলে কোনো ধৰনৰ গোচৰ ।
ড্ৰাগচ মাফিয়া উৎপল নাথ আৰু ছাইফুদ্দিন আলীয়ে আমিনগাওঁ আৰক্ষী চকীৰ দাঁতিতে ডেম্প সাজি দীৰ্ঘ দিনৰ পৰা চলাই আহিছিল বৰবিহ ড্ৰাগছৰ বেহা ।
আৰক্ষীৰ নিৰ্বিকাৰ ভূমিকাক কেন্দ্ৰ কৰি অঞ্চলজুৰি সচেতন মহলৰ মাজত সৃষ্টি হৈছে ব্যাপক প্ৰতিক্ৰিয়াৰ ।
এতিয়া প্ৰশ্ন হয় মুখ্যমন্ত্ৰীৰ গৃহ সমষ্টিতে মুখ্যমন্ত্ৰীৰ ড্ৰাগছ বিৰোধী নিৰ্দেশনাক কেৰেপ নকৰা আমিনগাঁও আৰক্ষীৰ চকীৰ ভাৰপ্ৰাপ্ত বিষয়া মুকুট বৈশ্যৰ বিৰুদ্ধে গৃহ বিভাগে কি শাস্তি প্ৰদান কৰে সময়তহে লক্ষ্যণীয় হ’ব ।
