ভাৰতীয় জনতা পাৰ্টিৰ আই টি চেলৰ মুৰব্বী অমিত মালব্য আৰু ৰিপাব্লিক টিভিৰ সাংবাদিক অৰ্ণৱ গোস্বামীৰ বিৰুদ্ধে কৰ্ণাটকত কংগ্ৰেছে এজাহাৰ দাখিল কৰিছে। তেওঁলোকৰ বিৰুদ্ধে “ভুৱা তথ্য বিয়পোৱাৰ” অভিযোগ উত্থাপন হৈছে। শেহতীয়াকৈ অৰ্ণৱ গোস্বামীয়ে এটা অনুষ্ঠানত দাবী কৰিছিল যে তুৰস্কত কংগ্ৰেছৰ কাৰ্যালয় আছে।
যুৱ কংগ্ৰেছৰ আইনী কোষৰ মুৰব্বী শ্ৰীকান্ত স্বৰূপে ২০ মে’ত কৰ্ণাটকৰ বেংগালুৰুৰ হাই গ্ৰাউণ্ড আৰক্ষী থানাত এই সন্দৰ্ভত অভিযোগ দাখিল কৰিছিল। তেওঁৰ মতে এয়া সম্পূৰ্ণ মিছা আৰু কোনো ভিত্তি নথকা তথ্য।
বিজেপিৰ ৰাষ্ট্ৰীয় তথ্য আৰু প্ৰযুক্তি বিভাগৰ দায়িত্বত থকা অমিত মালব্য আৰু ৰিপাব্লিকৰ মুখ্য সম্পাদক অৰ্ণৱ গোস্বামীৰ বিৰুদ্ধে ভাৰতীয় ন্যায় সংহিতাৰ ১৯২ আৰু ধাৰাত গোচৰ ৰুজু কৰা হৈছে।
এই কাণ্ড সন্দৰ্ভত শ্ৰীকান্ত স্বৰূপে সংবাদ মাধ্যমৰ আগত কয় যে অমিত মালব্য আৰু অৰ্ণৱ গোস্বামী আচলতে ভুৱা তথ্য বিয়পোৱাৰ এক জঘন্য আৰু অপৰাধমূলক অভিযানৰ মাষ্টাৰমাইণ্ড। তেওঁ অভিযোগ কৰে যে অভিযুক্তসকলে ইচ্ছাকৃতভাৱে এই ভুৱা অপপ্ৰচাৰ প্ৰচাৰ কৰিছিল।
এই ঘটনা সন্দৰ্ভত কংগ্ৰেছৰ সাংসদ তথা লোকসভাৰ বিৰোধী দলপতি ৰাহুল গান্ধীয়ে কয়, “কংগ্ৰেছক বদনাম, অশান্তি কৰা আৰু ৰাষ্ট্ৰীয় নিৰাপত্তাক ভেঙুচালি কৰাৰ এই দুৰ্নীতিপৰায়ণ প্ৰচেষ্টা গণতন্ত্ৰৰ ওপৰত প্ৰত্যক্ষ আক্ৰমণ। আমি মৌন হৈ নাথাকো। আমাৰ বাৰ্তা অতি স্পষ্ট: আমাৰ দল বা দলৰ নেতৃত্বৰ বিৰুদ্ধে ভুৱা বাতৰি বিয়পোৱাৰ যিকোনো প্ৰচেষ্টা কঠোৰ আইনী আৰু ৰাজনৈতিক সঁহাৰিৰ সন্মুখীন হ’ব।”
১৫ মে’ত ৰিপাব্লিক টিভিৰ ‘ডিবেট উইথ অৰ্ণৱ’ অনুষ্ঠানত আয়োজক অৰ্ণৱ গোস্বামীয়ে ‘ইস্তানবুল কংগ্ৰেছ চেণ্টাৰ’ৰ এখন ছবি দেখুৱাই কংগ্ৰেছৰ কাৰ্যালয় বুলি দাবী কৰিছিল। যিটো আচলতে আছিল এটা সভাঘৰ। কিন্তু তীব্ৰ সমালোচনাৰ বাবে ৰিপাব্লিক টিভিয়ে অনুষ্ঠানটোৰ সেই অংশটো ডিলিট কৰিবলৈ বাধ্য হয়।
এই অনুষ্ঠানত আয়োজক অৰ্ণৱ গোস্বামীয়ে দাবী কৰে যে কংগ্ৰেছ দল আমাৰ শত্ৰুদেশ তুৰস্কৰ পক্ষত আছে। অৰ্ণৱে লগতে কয়, “তুৰস্কত আপোনাৰ দলৰ কেনেধৰণৰ কাম আছে?” তেওঁ দৰ্শকক প্ৰশ্ন কৰে, “দৰ্শকসকল, আপোনালোকে জানেনে যে কংগ্ৰেছ দলৰ তুৰস্কত পঞ্জীয়নভুক্ত কাৰ্যালয় আছে? ২০১৯ চনত ৰাহুল গান্ধীয়ে কৈছিল যে তুৰস্কত আমাৰ এটা ডাঙৰ কাৰ্যালয় থাকিব লাগে।’
ৰিপাব্লিক টিভিত এই অনুষ্ঠানটোৰ পিছত বিজেপিৰ আই টি চেলৰ মুৰব্বী অমিত মালব্যই নিজৰ এক্স হেণ্ডেলত কয়, “আপোনালোকে জানেনে যে কংগ্ৰেছ দলৰ তুৰস্কত পঞ্জীয়নভুক্ত কাৰ্যালয় আছে? ৰাহুল গান্ধীয়ে ক’ব পাৰিবনে যে এই কাৰ্যালয়ৰ কি প্ৰয়োজন? এইটো বহু স্তৰত আচৰিত আৰু বুজাব নোৱাৰা। ভাৰতে এই তথ্য জানিব বিচাৰে। মনত ৰাখিব: শত্ৰুৰ বন্ধুজনো শত্ৰু।”
উল্লেখ্য যে এই কাণ্ডৰ পাঁচ দিনৰ পাছত ২০ মে’ৰ বিয়লি ৫:৩০ বজাত এক্স বাৰ্তাযোগে ৰিপাব্লিকে এই কাণ্ডৰ বাবে ক্ষমা বিচাৰিছিল।
