২০১৬ৰ বিধানসভাৰ নিৰ্বাচনৰ পূৰ্বে অসমলৈ আহি নৰেন্দ্ৰ মোদীয়ে হুংকাৰ দিছিল যে অসমত বিজেপি চৰকাৰ গঠনৰ পিছতে বাংলাদেশীয়ে তালি-টোপোলা বান্ধিব লাগিব। মোদীৰ সেই হুংকাৰ বিগত পাঁচ বছৰত অসাৰ প্ৰতিপন্ন হ’ল।
ৰাজ্যৰ প্ৰথম পৰ্যায়ৰ নিৰ্বাচনলৈ মাজত মাত্ৰ কেইটামান দিন বাকী। প্ৰতিটো ৰাজনৈতিক দলেই এতিয়া তীব্ৰতৰ কৰি তুলিছে প্ৰচাৰ অভিযান।
নিৰ্বাচনৰ প্ৰতি লক্ষ্য ৰাখি এতিয়া বিজেপিয়ে আৰম্ভ কৰিছে আগ্ৰাসী প্ৰচাৰ অভিযান।
আজি তিনিচুকীয়া জিলাৰ মাৰ্ঘেৰিটাৰ বৰগোলাইস্থিত দিহিং পাটকাই ক্ৰীড়া প্ৰকল্পত দিনৰ ২ বজাত কেন্দ্ৰীয় গৃহমন্ত্ৰী তথা বিজেপিৰ ষ্টাৰ কেম্পেনাৰ অমিত শ্বাহে মাৰ্ঘেৰিটাৰ বিজেপি প্ৰাৰ্থী ভাস্কৰ শৰ্মাৰ হৈ নিৰ্বাচনী প্ৰচাৰ চলাই কেন্দ্ৰীয় গৃহমন্ত্ৰীগৰাকীয়ে কংগ্ৰেছক তীব্ৰ সমালোচনা কৰে।
ভাষণ আৰম্ভ কৰাৰ পূৰ্বে সুধাকণ্ঠ ভূপেন হাজৰিকাক স্মৰণ কৰি কেন্দ্ৰীয় গৃহমন্ত্ৰীগৰাকীয়ে অসমৰ উন্নয়নৰ বাবে বিজেপিৰ বিকল্প নাই বুলি মন্তব্য কৰে।
লগতে অসমৰ পৰা বিদেশী বহিষ্কাৰৰ লগতে বানপানী সমস্যাৰ স্থায়ী সমাধান বাবে অসমবাসীৰ পৰা আৰু পাঁচ বছৰ বিচাৰে অমিত শ্বাহে। সভাত অংশগ্ৰহণ কৰি বিত্ত, শিক্ষা, স্বাস্থ্য মন্ত্ৰী হিমন্ত বিশ্ব শৰ্মাই চৰকাৰৰ সফলতাৰ খতিয়ান দাঙি ধৰে।
কংগ্ৰেছ আৰু AIUDFক মোগলৰ সৈতে তুলনা কৰি মন্ত্ৰী হিমন্ত বিশ্ব শৰ্মাই কয় যে, অসমে মোগলৰ নামত আৰু চৰকাৰ গঠন কৰিব নিদিয়ে। অসমীয়াই মোগলক ১৭ বাৰ হৰুৱালে আৰু এবাৰ হৰুৱাম।
বিজেপিয়ে পাঁচ বছৰত দহ লাখ লোকৰ জীৱিকাৰ পথ মুকলি কৰি দিব। প্ৰথম এটা বছৰত ১ লাখ চাকৰি দিম। আধুনিক পদ্ধতিৰে পুনৰ মাৰ্ঘেৰিটাত কয়লাৰ খনন কাৰ্য্য চলোৱা হ’ব।
উল্লেখ্য বিগত বিধানসভা নিৰ্বাচনৰ সময়ত হিমন্ত বিশ্ব শৰ্মাই ২৬ লাখ নিৱনুৱাক সংস্থাপিত কৰা হ’ব বুলি ঘোষণা কৰিছিল যদিও লাখ লাখ নিবনুৱাক সংস্থাপন দিয়াটো বাদেই নিযুক্তিৰ পৰীক্ষা কেইটাও বিজেপিয়ে ভালদৰে অনুষ্ঠিত কৰিব নোৱাৰিলে।
জাগুনত এখন ডিগ্ৰী কলেজ স্থাপন কৰিম। দিহিং পাটকাই ক্ৰীড়া প্ৰকল্পৰ স্থাপন কৰিব। লগতে ১০লাখ যুৱক যুৱতীলৈ স্বয়ম আঁচিনৰ অধিনত লোৱা হ’ব বুলি উল্লেখ কৰাৰ লগতে অৰুণোদয় ৮৩০ৰ পৰা ৩হাজাৰ টকালৈ বৃদ্ধি, প্ৰথম বছৰত ১লাখ চাকৰি আৰু ৫ বছৰত ১০লাখ যুৱক-যুৱতীক কৰ্মসংস্থপানৰ ব্যৱস্থা কৰিব বুলি উল্লেখ কৰে।
ইফালে ভাস্কৰ শৰ্মাৰ হৈ ভোট ভিক্ষা কৰি মুখ্যমন্ত্ৰী সৰ্বানন্দ সোণোৱালে কয় যে, ‘মাৰ্ঘেৰিটাত ভাস্কৰ শৰ্মাক ডেৰ লাখ ভোটত জয়যুক্ত কৰিব লাগিব।
দুৰ্নীতি মুক্ত অসম আমি গঢ়িলো। অসমত এতিয়া কোনো দুৰ্নীতি নাই। ৰাইজৰ ধন আমি আত্মসাৎ কৰা নাই বুলি মুখ্যমন্ত্ৰী গৰাকীয়ে ভাষণ প্ৰসংগত উল্লেখ কৰে।
