আজি উত্তৰ-পূবলৈ দুদিনীয়া ভ্ৰমণসূচীৰে আহি গুৱাহাটীত উপস্থিত হ’বহি বিজেপিৰ ৰাষ্ট্ৰীয় সভাপতি অমিত শ্বাহ। দেশৰ পাঁচখন ৰাজ্যত অনুষ্ঠিত হ’বলগীয়া বিধানসভা নিৰ্বাচনক লৈ ব্যস্ত থকা সভাপতিগৰাকীৰ অসম ভ্ৰমম কেইবাটাও দিশত গুৰুত্বপূৰ্ণ হিচাপে বিবেচিত হৈছে।
সভাপতি শ্বাহ মাজুলীত অনুষ্ঠিত ৰাজ্যিক বিজেপিৰ কাৰ্যনিৰ্বাহকত উপস্থিত থকাৰ কথা আছিল যদিও শেষমুহূৰ্তত সেই কাৰ্যসূচী বাতিল কৰে। সেয়েহে তেওঁ এতিয়া ৰাজ্যিক বিজেপিৰ কাম-কাজ সন্দৰ্ভত দলীয় বিষয়ববীয়াৰ পৰা প্ৰতিবেদন ল’ব।
অসমত অনুষ্ঠিত হ’বলগীয়া পঞ্চায়ত নিৰ্বাচন মিত্ৰদল অগপই অকলে খেলিব বুলি স্পষ্ট কৰি দিয়াৰ পাছত স্বাভাৱিকতে বিজেপিৰ বাবে পৰিস্থিতিটো কিছু জটিল হৈ পৰিছে। এনে পৰিপ্ৰেক্ষিতত তৃণমূল পৰ্যায়ত ৰাজ্যিক বিজেপিৰ নেতৃত্বই কিদৰে পৰিস্থিতিৰ মোকাবিলা কৰিছে তাৰো বুজ ল’ব ৰাষ্ট্ৰীয় সভাপতি গৰাকীয়ে।
আজি নিশাটো গুৱাহাটীতে কটাই বুধবাৰে তেওঁ মিজোৰামলৈ যাব। কিয়নো বিধানসভাৰ নিৰ্বাচন অনুষ্ঠিত হ’বলগীয়া ৰাজ্যকেইখনৰ ভিতৰত মিজোৰাম অন্যতম। উত্তৰ-পূবক কংগ্ৰেছমুক্ত কৰাৰ বিজেপিয়ে যি পণ লৈছিল তাৰ অংশ হিচপে মিজোৰামত দলটোৰ সাংগঠনিক স্থিতি শক্তিশালী কৰাটো জৰুৰী হৈ পৰিছে। তদুপৰি, নেডাৰ আহ্বায়ক ড০ হিমন্ত বিশ্ব শৰ্মাই মিজোৰামৰ নিৰ্বাচন সন্দৰ্ভত নিজৰ অভিযান এতিয়াও আৰম্ভ কৰা নাই।
জানিব পৰা মতে আজি নিশা অনুষ্ঠিত হ’বলগীয়া বৈঠকত নাগৰিকত্ব সংশোধনী বিধেয়ককে ধৰি অত্যাৱশ্যকীয় সামগ্ৰীৰ মূল্য বৃদ্ধি, ছয় জনগোষ্ঠীৰ জনজাতিকৰণ, নিৰ্বাচনৰ পূৰ্বে দিয়া প্ৰতিশ্ৰুতি পালনত ব্যৰ্থ হোৱা আদি বিষয়ক লৈ ৰাজ্যখনত চলি থকা প্ৰতিবাদ সন্দৰ্ভত সভাপতি শ্বাহে ৰাজ্যিক নেতৃত্বৰে আলোচনা কৰিব।
ইপিনে, মিত্ৰদল অগপ আৰু বি পি এফৰ সৈতে আগন্তুক নিৰ্বাচনত মিত্ৰতা কৰিব নে নাই সেই সম্পৰ্কে ৰাষ্ট্ৰীয় সভাপতিগৰাকীয়ে ৰাজ্যিক বিজেপিৰ নেতাসকলক দিক্ নিৰ্দেশনা দিয়াৰ সম্ভাৱনা আছে। অসমত বিজেপিৰ জনপ্ৰিয়তা হ্ৰাস পোৱাৰ বিষয়ে ৰাষ্ট্ৰীয় সভাপতিগৰাকীয়ে ইতিমধ্যে অৱগত হৈছে আৰু সেয়েহে এই ভ্ৰমণৰ সময়তে ৰাজ্যিক বিজেপিক কৰ্ম তৎপৰ হৈ উঠাৰ ওপৰত তেওঁ গুৰুত্ব দিব।