উত্তৰ প্ৰদেশৰ আমৰোহা জিলাত এক ভয়ংকৰ পথ দুৰ্ঘটনাই তীব্ৰ চাঞ্চল্যৰ সৃষ্টি কৰিছে। মঙলবাৰে জিলাখনৰ মিলক ছাভি গাঁৱৰ এটা হনুমান মন্দিৰত প্ৰাৰ্থনৰত ভক্তৰ ওপৰত এখন দ্ৰুতবেগী ট্ৰাক বাগৰি পৰাৰ ফলত এটি পাঁচ বছৰীয়া শিশুসহ কমেও তিনিজন লোকৰ কৰুণ মৃত্যু হোৱাৰ লগতে আন পাঁচজন লোক গুৰুতৰভাৱে আহত হয়। ৰাজপথৰ কাষত অৱস্থিত মন্দিৰটোত একাংশ লোকে ‘সুন্দৰকাণ্ড’ পাঠ শুনি থকাৰ সময়তে এই আকস্মিক দুৰ্ঘটনাটো সংঘটিত হয়।
আৰক্ষীয়ে জানিবলৈ দিয়া মতে, ঘটনা সংঘটিত হোৱাৰ সময়ত প্ৰায় ২০-২৫ জন লোক সেই স্থানত উপস্থিত আছিল। অতিৰিক্ত আৰক্ষী অধীক্ষক অখিলেশ ভাদৌৰিয়াই এই সন্দৰ্ভত প্ৰকাশ কৰে যে মহিলা আৰু শিশুক ধৰি ভক্তসকল এটা অস্থায়ী মণ্ডপত বহি থকা অৱস্থাত এখন শিলভৰ্তি দ্ৰুতবেগী ট্ৰাকে নিয়ন্ত্ৰণ হেৰুৱাই প্ৰথমে এজোপা গছত খুন্দা মাৰে আৰু তাৰ পিছতে মণ্ডপটোৰ ওপৰত বাগৰি পৰে। এই অঘটনৰ লগে লগে উপস্থিত ভক্তসকলৰ মাজত এক হাহাকাৰ আৰু আতংকময় পৰিৱেশৰ সৃষ্টি হয়।
দুৰ্ঘটনাটোত থিতাতে নিহত হোৱা লোককেইজনক ৭০ বছৰীয়া পৰম সিং, ৪২ বছৰীয়া মহিপাল আৰু পাঁচ বছৰীয়া শিশু আৰ্যবীৰ বুলি চিনাক্ত কৰা হৈছে। উল্লেখযোগ্য যে কণমানি আৰ্যবীৰে মিলক ছাভি গাঁৱত থকা নিজৰ আজোককাক-আইতাকৰ ঘৰলৈ ফুৰিবলৈ আহিছিল আৰু এই অনাকাংক্ষিত ঘটনাই সমগ্ৰ অঞ্চলটোতে তীব্ৰ উদ্বেগ প্ৰকাশৰ কাৰণ হৈ পৰিছে। দুৰ্ঘটনাটোত আহত হোৱা আন পাঁচজন লোকক তাৎক্ষণিকভাৱে উদ্ধাৰ কৰি চিকিৎসা প্ৰদানৰ ব্যৱস্থা কৰা হয়।
বৰ্তমান আৰক্ষীয়ে নিহত আটাইকেইজনৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে। আনহাতে, আহতসকলক চিকিৎসালয়ত ভৰ্তি কৰোৱা হৈছে আৰু সমগ্ৰ দুৰ্ঘটনাটোৰ কাৰণ সন্দৰ্ভত আৰক্ষীৰ আনুষ্ঠানিক তদন্ত অব্যাহত আছে।
