যুৱ শক্তিৰ বিপুল প্ৰচেষ্টাৰে প্ৰাণ পাই উঠা যোৰহাট তথা সমগ্ৰ অসমৰে এক সামাজিক অগ্ৰণী বেচৰকাৰী সংস্থা “গ’ গ্ৰীণ অৰ্গেনাইজেশ্বন” যোৰহাট-অসম সংস্থাৰ উদ্যোগত সোমবাৰে গোলাঘাট জিলাৰ বেঙেনাখোৱাস্থিত ‘আমাৰ ঘৰ বৃদ্ধাশ্ৰম’ ত আলাপেৰে-আদৰেৰে শীর্ষক এক ব্যতিক্রমী অনুষ্ঠান অনুষ্ঠিত হয়।
গ’ গ্ৰীণ অৰ্গেনাইজেশ্বনৰ সদস্যসকলে বৃদ্ধাশ্ৰমৰ আৱাসীসকলৰ লগত এক মত বিনিময় কৰাৰ লগতে প্ৰয়োজনীয় কিছু খাদ্য সামগ্রী উপহাৰ দিয়ে। ককা-আইতা সকলৰ গীত নৃত্য আদিৰ পৰিবেশনেৰে আৰু ”আমাৰ ঘৰ” অধিক মোহনীয় হৈ পৰে।
আমাৰ ঘৰ বৃদ্ধাশ্ৰমখনৰ স্বত্তাধিকাৰী, বৃদ্ধাশ্ৰমখনৰ আৱাসীসকল তথা শুভাকাংক্ষীসকলে সকলে গ’ গ্ৰীণ অৰ্গেনাইজেশ্বনৰ এনে পদক্ষেপৰ প্ৰতি কৃতজ্ঞতা প্ৰকাশ কৰি সংস্থাটিৰ উত্তৰোত্তৰ কামনা কৰি মহাপুৰুষ জনাৰ এফাঁকি প্ৰাৰ্থনাৰে আশীর্বাদ প্ৰদান কৰে।
অনুষ্ঠানৰ শেষত গ’ গ্ৰীণ অৰ্গেনাইজেশ্বনৰ মুখ্য সংগঠক গৌৰাংগ বৰদলৈয়ে আৱাসীসকলৰ সুবিধা অসুবিধাৰ বুজ লয় লগতে আশ্ৰমখনৰ পৰিয়ালবৰ্গলৈ কৃতজ্ঞতা ও ধন্যবাদ জ্ঞাপন কৰে।
জনমানসত মানৱীয় প্ৰমুল্যবোধ অবক্ষয়ৰ এক স্পষ্ট চিত্ৰ পৰিস্ফুত হোৱাৰ সময়তে যুৱ সংস্থাটোৱে গ্ৰহণ কৰা এই পদক্ষেপে ইতিমধ্যেই যঠেষ্ট সমাদৰ লাভ কৰিবলৈ সক্ষম হৈছে।
