সাংসদৰ পুত্ৰৰ গাড়ীয়ে ২৬ বছৰীয়া এগৰাকী যুৱতীক মহতিয়াই নিয়ে। যুৱতীগৰাকীৰ মৃত্যু হয়। এই ঘটনাত সাংসদগৰাকীৰ পুত্ৰক গ্ৰেপ্তাৰ কৰা হৈছে। আৰু এই পৰিস্থিতিতো সাংসদগৰাকীয়ে নিজৰ পুত্ৰক সপক্ষে মাত মাতিছে।
অভিযুক্তৰ পিতৃয়ে দাবী কৰে যে তেওঁৰ পুত্ৰই অলপো সময় নষ্ট নকৰি আহতক চিকিৎসালয়লৈ লৈ গৈছিল। আনকি তেওঁ নিজেই এই দুৰ্ঘটনা সম্পৰ্কে আৰক্ষীক অৱগত কৰে। সাংসদগৰাকীয়ে দাবী কৰিছে যে তেওঁৰ ২১ বছৰীয়া পুত্ৰই তদন্তত সম্পূৰ্ণ সহযোগিতা আগবঢ়াইছে।
উল্লেখ্য যে হায়দৰাবাদত সংঘটিত হৈছিল এই পথ দুৰ্ঘটনা। ১৬ আগষ্টত অন্ধ্ৰপ্ৰদেশৰ ৰাজ্যসভাৰ সাংসদ লিংগামনেনী ৰমেশৰ (জনসেনা পাৰ্টি) পুত্ৰই যুৱতীগৰাকীক মহতিয়াই নিছিল। পিছত আহত যুৱতীগৰাকীৰ মৃত্যু হয়।
২১ বছৰীয়া পুত্ৰৰ এই জঘন্য কাৰ্যক ঢাকি ৰাখিবলৈ ছ’চিয়েল মিডিয়াত এটা পোষ্টত সাংসদগৰাকীয়ে কয় যে আমি শোকসন্তপ্ত পৰিয়ালটোক সকলো ধৰণৰ সহায় আগবঢ়াম।’ ৰাজ্যসভাৰ সাংসদগৰাকীয়ে লগতে কয় যে, ‘এই কাণ্ডৰ পৰিস্থিতি সন্দৰ্ভত সকলোকে কোনো ধৰণৰ পূৰ্ব ধাৰণা বা অনুমান নাৰাখিবলৈ অনুৰোধ জনোৱা হৈছে।’
সাংসদগৰাকীয়ে কয় যে দুৰ্ঘটনাৰ সময়ত তেওঁৰ পুত্ৰই এষ্টন মাৰ্টিন গাড়ীখন চলাই গৈছিল। তেওঁৰ ভাষাত, ‘দুৰ্ঘটনাটোৰ পিছত মোৰ ল’ৰাটোৱে আহত ছোৱালীজনীক চিকিৎসালয়লৈ লৈ গ’ল। কোনো সময় নষ্ট নকৰিলে। ইয়াৰ পিছত তেওঁ নিজেই আৰক্ষীক এই দুৰ্ঘটনাৰ বিষয়ে অৱগত কৰে। প্ৰয়োজনীয় সকলো তথ্য দিলে।’
ইয়াৰ সমান্তৰালকৈ সাংসদগৰাকীয়ে লগতে কয় যে চিকিৎসা প্ৰতিবেদনত উল্লেখ কৰা অনুসৰি দুৰ্ঘটনাৰ সময়ত তেওঁৰ পুত্ৰই কোনো ধৰণৰ মদ্যপান কৰা নাছিল। অন্ধ্ৰ প্ৰদেশৰ ৰাজ্যসভাৰ সাংসদগৰাকীৰ ভাষাত ‘এটা গোচৰ ৰুজু হৈছে। মোৰ ল’ৰাটোৰ তিনিটা শাৰীৰিক পৰীক্ষা কৰা হৈছিল। ৰিপৰ্ট নিগেটিভ আহিছিল। তদন্ত অব্যাহত আছে। আমি তদন্তকাৰীসকলক সম্পূৰ্ণ সহযোগিতা আগবঢ়াইছো।’
সাংসদগৰাকীয়ে নিজৰ পৰিচয় ব্যৱহাৰ কৰি অভিযুক্তক লুকুৱাই ৰখাৰ অভিযোগ উত্থাপন কৰিছে নিহতৰ পৰিয়ালৰ লোকে। এই প্ৰসংগত সাংসদগৰাকীয়ে কয়, ‘এই বিষয়ত একো লুকুৱাই ৰখা হোৱা নাই। আমিও আইনী প্ৰক্ৰিয়াৰ পৰা আঁতৰি থাকিবলৈ চেষ্টা কৰা নাই। আইনৰ প্ৰতি আমাৰ সম্পূৰ্ণ সন্মান আছে।’
