বিগত দুটা বছৰে কৰ’নাকালীন পৰিস্থিতিৰ বাবে বন্ধ হৈ থকা অঙ্গনবাদী কেন্দ্ৰসমূহলৈ আশাৰ বতৰা আহিছে।
ৰাজ্য চৰকাৰৰ নিৰ্দেশ মৰ্মে ১ মাৰ্চৰ পৰা অঙ্গনবাড়ী কেন্দ্ৰ সমূহ খোলাৰ প্ৰক্ৰিয়া আৰম্ভ হৈছে।
কলিয়াবৰতো জিলা সমাজ কল্যাণ বিষয়া তথা পশ্চিম কলিয়াবৰ সংহত শিশু উন্নয়ন প্ৰকল্প বিষয়া ৰুবী কলিতাৰ পৰিচালনাত “অঙ্গনবাদী কেন্দ্ৰলৈ যাঁও ব’লা” শীৰ্ষক এক শোভাযাত্ৰা কাৰ্যসূচী ৰূপায়ন কৰা হয়।
এই শোভাযাত্ৰা কাৰ্যসূচীত হালোৱা গাঁও, মিছামুখ, কেলিডেনৰ লগতে মাজগাঁও অঙ্গনবাদী কেন্দ্ৰলৈ শোভাযাত্ৰা কৰি যাত্ৰা আৰম্ভ কৰা হয়।
এই কাৰ্যসূচীত নগাঁও জিলা সমাজ কল্যাণ বিষয়া তথা পশ্চিম কলিয়াবৰ সংহত শিশু উন্নয়ন প্ৰকল্প বিষয়া, অঙ্গনবাড়ী কৰ্মী আৰু সহায়িকাৰ উপৰিও অঙ্গনবাদী কেন্দ্ৰ পৰিচালনা সমিতিৰ বিষয়ববীয়াকে ধৰি শিশু, বৃদ্ধা মহিলা, যুৱতী আৰু মাতৃসকলে অংশ গ্ৰহণ কৰে।
