আজি সন্ধিয়া প্ৰায় ৫-৫৫বজাত মহানগৰীৰ ছাত্ৰীবাৰী অঞ্চলত মুখ্য মন্ত্ৰী সৰ্বানন্দ সোণোৱালৰ গাড়ীত উন্মত্ত জনতাই আক্ৰমণ কৰে। মুখ্য মন্ত্ৰীৰ কনভয়ৰ তিনিখন গাড়ী ছাত্ৰীবাৰীৰ পথেৰে গৈ থাকোতেই সংঘটিত হয় এই ঘটনা।
জানিব পৰা মতে, মুখ্য মন্ত্ৰী সোণোৱালৰ কনভয়ৰ গাড়ী নং এএছ০১-ডি ডব্লিউ ৭৮৪৫ নম্বৰৰ ফৰছুনাৰ বাহনখনে এগৰাকী স্কুটী আৰোহীক যুৱতীক খুন্দিওৱাৰ পাছতেই এই ঘটনা সংঘটিত হয়। স্কুটীখনৰ নম্বৰ হৈছে এ এছ ০১ডি এল ৮৮০৪।
ছাত্ৰীবাৰীৰ ব্যস্ততাপূৰ্ণ পথত সংঘটিত হোৱা ঘটনাটোৰ পাছতেই উপস্থিত থকা স্থানীয় লোক উত্তেজিত হৈ বাহনখন আৱদ্ধ কৰে আৰু স্কুটী আৰোহী যুৱতীগৰাকীয়ে মুখ্য মন্ত্ৰীৰ বাহনখনৰ ওপৰত ইটাৰে আক্ৰমণ কৰে। আক্ৰমণৰ ফলত বাহনখনৰ পিছপিনৰ আইনা ভাগি চূৰ্ণ-বিচূৰ্ণ হৈ পৰে।
উক্ত ঘটনাৰ পাছতে অঞ্চলটোত উত্তেজনাপূৰ্ণ পৰিস্থিতিৰ সৃষ্টি হয়। ঘটনাটোৰ পাছতে যুৱতীগৰাকীয়ে পল্টবজাৰ আৰক্ষী থানাত এজাহাৰ দাখিল কৰাৰ সমান্তৰালভাৱে মুখ্য মন্ত্ৰীৰ কনভয়ৰ বাহনখনৰ চালকজনেও যুৱতীগৰাকীৰ বিৰুদ্ধে থানাখনত এখন এজাহাৰ দাখিল কৰে।
জানিব পৰা মতে, পল্টনবজাৰ আৰক্ষীয়ে ইতিমধ্যে ঘটনাটো সন্দৰ্ভত মুখ্য মন্ত্ৰীৰ কাৰ্যালয়ক অৱগত কৰিছে।
উল্লেখযোগ্য যে ঘটনাৰ সময়ত কনভয়ত মুখ্য মন্ত্ৰী নাছিল। বৰ্তমান মুখ্য মন্ত্ৰী তেওঁৰ কাৰ্যালয়তে উপস্থিত আছে। কিন্তু জেদ কেটেগুৰিৰ সুৰক্ষা ব্যৱস্থা গ্ৰহণ কৰা মুখ্য মন্ত্ৰীৰ কনভয় যে উন্মত্ত জনতাৰ পৰা নিৰাপদ নহয় সেয়া এই ঘটনাই প্ৰমান কৰে। আনহাতে, চৰকাৰৰ প্ৰতি বিক্ষুব্ধ হৈ থকা একাংশ লোকে এনে পৰিস্থিতিৰ সুযোগ গ্ৰহণ কৰি পৰিস্থিতি উত্তপ্ত কৰি তোলাৰ সম্ভাৱনাও নুই কৰিব নোৱাৰি।