ভাৰতীয় মূলৰ মাৰ্কিন মহাকাশচাৰী অনিল মেননে মঙলবাৰে আন্তঃৰাষ্ট্ৰীয় মহাকাশ কেন্দ্ৰলৈ সফলতাৰে যাত্ৰা আৰম্ভ কৰিছে। কল্পনা চাওলা, সুনীতা উইলিয়ামছ আৰু ৰাজা চাৰীৰ পাছত মহাকাশলৈ উৰা মৰা তেওঁ হৈছে আন এগৰাকী ভাৰতীয় বংশোদ্ভূত মহাকাশচাৰী। মঙলবাৰে কাজাখস্তানৰ বাইকনৌৰ কচম’ড্ৰমৰ পৰা ৰাছিয়াৰ ছয়ুজ এমএছ-২৯ মহাকাশযানৰে তেওঁ এই ঐতিহাসিক যাত্ৰা আৰম্ভ কৰে। মাৰ্কিন মহাকাশ গৱেষণা সংস্থা নাছাৰ মহাকাশচাৰী, চিকিৎসক তথা অভিযন্তা অনিলে ৰাছিয়াৰ মহাকাশ সংস্থা ৰছকছমছৰ ‘এক্সপিডিছন-৭৫’ অভিযানত ক্ৰু সদস্য আৰু ফ্লাইট ইঞ্জিনিয়াৰ হিচাপে গুৰুত্বপূৰ্ণ দায়িত্ব পালন কৰিব।
৪৮ বৰ্ষীয় অনিল মেননৰ বাবে এয়া হৈছে জীৱনৰ প্ৰথমটো মহাকাশ যাত্ৰা। এই অভিযানত তেওঁৰ সৈতে ৰাছিয়াৰ আন দুগৰাকী মহাকাশচাৰী ক্ৰমে পিঅ’তৰ দুব্ৰভ আৰু আনা কিকিনাই যাত্ৰা কৰিছে। অৱশ্যে ৰাছিয়ান মহাকাশচাৰী দুগৰাকীৰ বাবে এয়া হৈছে দ্বিতীয়টো মহাকাশ অভিযান। তিনিওগৰাকী মহাকাশচাৰীয়ে আন্তঃৰাষ্ট্ৰীয় মহাকাশ কেন্দ্ৰত প্ৰায় আঠ মাহ ধৰি অৱস্থান কৰিব আৰু এই সময়ছোৱাত তেওঁলোকে কেইবাটাও গুৰুত্বপূৰ্ণ গৱেষণামূলক কাৰ্যত নিয়োজিত হ’ব।
অনিল মেননৰ জন্ম হৈছিল আমেৰিকা যুক্তৰাষ্ট্ৰৰ মিনেসোটা প্ৰদেশৰ মিনিয়াপলিছত। মিনেসোটাৰ চেণ্ট পল একাডেমী এণ্ড ছামিট স্কুলৰ পৰা প্ৰাথমিক শিক্ষা গ্ৰহণ কৰা অনিলে ১৯৯৫ চনত স্নাতক ডিগ্ৰী লাভ কৰে। ইয়াৰ পাছত তেওঁ ১৯৯৯ চনত হাৰ্ভাৰ্ড বিশ্ববিদ্যালয়ৰ পৰা নিউৰ’বায়’লজীত স্নাতক আৰু ২০০৪ চনত ষ্টেনফ’ৰ্ড বিশ্ববিদ্যালয়ৰ পৰা মেকানিকেল ইঞ্জিনিয়াৰিঙত স্নাতকোত্তৰ ডিগ্ৰী অৰ্জন কৰে। শিক্ষাৰ প্ৰতি প্ৰবল ধাউতি থকা অনিলে ২০০৬ চনত ষ্টেনফ’ৰ্ড মেডিকেল স্কুলৰ পৰা চিকিৎসা বিজ্ঞানৰ ডিগ্ৰীও গ্ৰহণ কৰে। পৰৱৰ্তী সময়ত তেওঁ ২০০৯ চনত ষ্টেনফ’ৰ্ডত জৰুৰীকালীন চিকিৎসাৰ ৰেচিডেণ্টশ্বিপ সম্পূৰ্ণ কৰে আৰু ২০১০ চনত ৱাইল্ডাৰনেছ মেডিচিনত জলপানি লাভ কৰিবলৈ সক্ষম হয়।
দীৰ্ঘদিন ধৰি মাৰ্কিন বিমান বাহিনীত সেৱা আগবঢ়োৱা অনিল মেননে ২০১৪ চনত ফ্লাইট ইঞ্জিনিয়াৰ হিচাপে নাছাত যোগদান কৰিছিল। নিজৰ বৰ্ণিল কৰ্মজীৱনত তেওঁ ছয়ুজ টিএমএ-১৩এম আৰু ছয়ুজ টিএমএ-১৭এম অভিযানৰ উপ-ক্ৰু চাৰ্জন আৰু ছয়ুজ এমএছ-৬ ৰ প্ৰাথমিক ক্ৰু চাৰ্জন হিচাপেও দক্ষতাৰে দায়িত্ব পালন কৰিছে। আকাশমাৰ্গত এক হাজাৰ ঘণ্টাতকৈয়ো অধিক সময় উৰণৰ অভিজ্ঞতা থকা মেননৰ এই মহাকাশ যাত্ৰাই এতিয়া সমগ্ৰ বিশ্বৰ লগতে ভাৰতবাসীৰ মাজতো ব্যাপক চৰ্চা লাভ কৰিছে।
বৰ্তমান আন্তঃৰাষ্ট্ৰীয় মহাকাশ কেন্দ্ৰ অভিমুখে যাত্ৰা অব্যাহত ৰখা অনিল আৰু তেওঁৰ সতীৰ্থসকলে মহাকাশত সুদীৰ্ঘ আঠ মাহ সময় অতিবাহিত কৰি নিৰ্ধাৰিত গৱেষণাসমূহ সম্পন্ন কৰিব। এই অভিযানৰ জৰিয়তে মহাকাশ বিজ্ঞানৰ ক্ষেত্ৰখনলৈ নতুন বৈজ্ঞানিক তথ্য আৰু আৱিষ্কাৰৰ সংযোজন ঘটিব বুলি আশা প্ৰকাশ কৰা হৈছে।
