অসমৰ কংগ্ৰেছ নেতা ৰকিবুল হুছেইনৰ বিৰুদ্ধে অসংখ্য অভিযোগ আনি দলৰ পৰাই বহিষ্কৃত হোৱা অনিল ৰাজাই এইবাৰ ব্যাখ্যা কৰিছে প্ৰাক্তন মন্ত্ৰীজনৰ সৈতে সুন্দৰী যুৱতী-মহিলাৰ সম্পৰ্কৰ!
হুছেইনক ‘লম্পট’ ব্যক্তিৰূপে অভিহিত কৰি বুধবাৰে গুৱাহাটীত এক সংবাদমেলত প্ৰাক্তন মন্ত্ৰীগৰাকী আৰু সুন্দৰী যুৱতী-মহিলাৰ সম্পৰ্কৰ ৰহস্য ব্যাখ্যা আগবঢ়াই অসম কংগ্ৰেছৰ এসময়ৰ সাধাৰণ সম্পাদক ৰাজাই।
‘সুন্দৰী মহিলা দেখা পালে তেওঁৰ গিৰিয়েকক ভাল পদত চাকৰি দিয়ে ৰকিবুল হুছেইনে। সুন্দৰী যুৱতী পালে ভায়েক-ককায়েকক সম্পত্তিৰ লোভ দেখুৱাই আৰু কেতিয়াবা কোটিপটি বনাই দিয়ে,‘ ‘লম্পট’ ৰকিবুলে কিদৰে যুৱতী-মহিলাৰে সম্পৰ্ক ৰক্ষা কৰে সেয়া ব্যাখ্যা কৰিবলৈ গৈ মন্তব্য ৰাজাৰ।
তাৰোপৰি ‘ৰাজনীতি ভালপোৱা ছোৱালী’ক হুছেইনে দলৰ টিকট দিয়াৰ প্ৰলোভন দিয়ে বুলিও সংবাদমেলত দাবী কৰে ৰাজাই।
থাইলেণ্ডৰ ‘পাটায়া বিশ্ববিদ্যালয়’ৰ পৰা হুছেইনে যুৱতী-মহিলাক ভুলোৱাৰ ডক্তৰে’ট দিগ্ৰি লোৱা বুলিও তীৰ্য্যক মন্তব্য কৰে ৰাজাই।
দুৰ্নীতিৰ অভিযোগত ৰকিবুল হুছেইন জে’ললৈ যাবই লাগিব বুলি দাবী কৰি ৰাজাই কয়, ‘জে’লৰ ৰাস্তা ৯০ শতাংশ মুকলি হৈ আছে।‘
হুছেইনৰ সৈতে ‘ভাল মানুহ কেতিয়াও নাযায়’ আৰু ‘লগত সদায় ২৫-৩০টা গুণ্ডা লৈ ফুৰে‘, বুলিও দাবী কৰি ৰাজাই কয় যে যোৱা ১৫ ছেপ্তেম্বৰত ৰকিবুলৰ ইংগিততে গুণ্ডাই তেওঁৰ গাত চিয়াঁহি মাৰিছিল।
ৰকিবুল হুছেইন আৰু তেওঁৰ গুণ্ডাবাহিনীৰ বিৰুদ্ধে যোৱা ১৫ ছেপ্তেম্বৰত পাণবজাৰ থানাত দিয়া এজাহাৰৰ পিছতে আৰক্ষীয়ে ‘আব্দুল চাত্তাৰ, ৰাকিব হুছেইন, আৰিফ আহমেদ আৰু আব্দুল জানিচাৰ’ নামৰ ৰকিবুলৰ গুণ্ডাকেইজনক গ্ৰেপ্তাৰ কৰা বুলি দাবী কৰি ৰাজাই কয়, ‘হুছেইনলৈও পাণবজাৰ আৰক্ষীয়ে জাননী জাৰি দিছিল যদিও তেওঁ দিল্লীলৈ পলায়ন কৰিছে।’
ৰাজাৰ মতে সৰু-সুৰা সভা এখনো বাদ নিদিয়া ৰকিবুল হুছেইনে কালি নগাঁৱত যুৱ কংগ্ৰেছৰ ৰাষ্ট্ৰীয় সভাপতি উপস্থিত থকা সভাখনতো আৰক্ষীৰ ভয়তে উপস্থিত নাথাকিল।
আনহাতে ৰাজেন গোহাঁইৰ সৈতে হুছেইনৰ ভিতৰুৱা বুজাবুজি আছে বুলিও দাবী কৰে ৰাজাই।
‘ৰাজেন গোহাঁইৰ বিৰুদ্ধে ধৰ্ষণৰ দৰে অভিযোগ উঠাত সকলো ৰাজনৈতিক নেতা তথা অসমৰ ৰাইজে ধিক্কাৰ দিলে, কিন্তু ৰকিবুল হুছেইনে তেওঁৰ বিৰুদ্ধে কোনোধৰণৰ মাত এষাৰ নামাতিলে। কংগ্ৰেছৰ নেতাসকলে ৰাজেন গোহাঁইৰ বিৰুদ্ধে ধৰ্ণা দিওঁতে তেওঁ কিয় উপস্থিত নাথাকিল? ৰাজেন গোহাঁইৰ সৈতে ৰকিবুল হুছেইনৰ কি সম্পৰ্ক আছে,’ প্ৰশ্ন অনিল ৰাজাৰ।
আনহাতে ‘১৯৯৭ চনত ৰকিবুল হুছেইনক মই তৰুণ গগৈৰ ওচৰলৈ লৈ আহিছিলো’, বুলি দাবী কৰি ৰাজাই কয়, ‘তৰুণ গগৈৰ ওচৰলৈ আনি কৈছিলো, এই ল’ৰাটো ভাল, এওঁৰ নিলম্বন পত্ৰখন উঠাই লওক।’
হুছেইনৰ বিৰুদ্ধে মুখ্য মন্ত্ৰীৰ তদাৰকী শাখাৰ তদন্ত শেষ পৰ্যায় পাইছেহি বুলি সংবাদমেলত জানিবলৈ দি তেওঁ কয়, ‘দহটা ফাইল আহি গৈছে আৰু সেইকেইটা চি এ ৰ দ্বাৰা পৰীক্ষা-নিৰীক্ষা চলি আছে৷ মুখ্য মন্ত্ৰীৰ ওপৰত বিশ্বাস ৰাখক।’
আনহাতে, অনিল ৰাজাই অনা প্ৰত্যেকটো অভিযোগ তেওঁৰ কাণত পৰা বুলি উল্লেখ কৰি ৰাজাৰ প্ৰত্যেকটো অভিযোগেই অস্বীকাৰ কৰিছে প্ৰাক্তন মন্ত্ৰী ৰকিবুল হুছেইনে।
নৰ্থ ইষ্ট নাও-ৰ সৈতে হোৱা কথা-বতৰাত তেওঁ কয়, ‘মোৰ বিৰুদ্ধে অভিযোগ অনা মানুহজনে, যদি মই বিএ পাছ কৰাৰ চাৰ্টিফিকেট দেখুৱাব পাৰো, তেন্তে ৰাজহুৱা জীৱন ত্যাগ কৰিম বুলি কৈছিল। এতিয়া কি হ’ল? তেওঁ কৰিলে জানো।‘
সুন্দৰী মহিলা-যুৱতীৰ মন ভুলোৱাৰ অভিযোগ সন্দৰ্ভত হুছেইনে কয়, ‘এইটো তেওঁৰ ষ্টেণ্ডাৰ্ড। মানুহৰ মাত-কথাই মানুহৰ পৰিচয় বা চিনাকি। যিটো ষ্টেণ্ডাৰ্ডত থাকে, সেইটো কথাই ক’ব।‘
