বোকাখাত মহকুমা প্ৰশাসনৰ উদ্যোগত বোকাখাত মহকুমাৰ সমুহ সাংবাদিকৰ সহযোগিতাত শুকুৰবাৰে বোকাখাতত ৰাষ্ট্ৰীয় প্ৰেছ দিৱস পালন কৰা হয় ৷
বোকাখাতৰ মহকুমাধিপতি কাৰ্যালয়ৰ প্ৰেক্ষাগৃহত আয়োজিত এই দিৱসত বোকাখাতৰ মহকুমা সাংবাদিক সন্থা, বোকাখাত প্ৰেছ ক্লাব আৰু ইলেকট্ৰনিকচ মেডিয়া জাৰ্ণেলিষ্ট এচোচিয়েচনৰ সমুহ সাংবাদিকৰ উপৰিও স্থানীয় জে ডি এচ জি মহাবিদ্যালয়ৰ ছাত্ৰ ছাত্ৰী আৰু শিক্ষক উপস্থিত থাকে৷
অনুষ্ঠানত সমল ব্যক্তি হিচাবে উপস্থিত থাকে ‘নৰ্থ ইষ্ট নাও’ৰ মুখ্য সম্পাদক অৰ্নিবান ৰয় ৷ মুখ্য সম্পাদক গৰাকীয়ে বোকাখাতৰ ৰাষ্ট্ৰীয় প্ৰেছ দিৱসত সমল ব্যক্তি হিচাবে উপস্থিত থাকি ” সাংবাদিকতাত নৈতিকতা আৰু ডিজিটেল যুগত ইয়াৰ প্ৰভাৱ ” শীৰ্ষক এক মনোজ্ঞ আলোচনা আগবঢ়ায় ৷
বোকাখাতৰ মহকুমাধিপতি বিবেক শ্যামৰ পৌৰহিত্যত অনুষ্ঠিত এই ৰাষ্ট্ৰীয় প্ৰেছ দিৱসৰ কাৰ্যসুচীত আপকুৰ প্ৰতিষ্ঠাপক সভাপতি ভৱেশ শইকীয়া, অতিৰিক্ত সহকাৰী আয়ুক্ত শান্তনু গগৈ, ৰাজহ চক্ৰ বিষয়া দাস, নিৰ্বাচনী বিষয়া নিকিতা বৰা ,জ্যেষ্ঠ সাংবাদিক ভৱানন্দ কলিতা, বুবুল দত্ত আৰু ড৹ বাবুলাল মোৰ উপস্থিত থাকে ৷
বোকাখাত মহকুমাৰ তথ্য আৰু জনসংযোগ বিষয়া মামুন বৰকটকীয়ে আঁত ধৰা অনুষ্ঠানত সমল ব্যক্তিৰ সৈতে এক মত বিনিময়ো অনুষ্ঠিত হয়।
