“নাগৰিকত্ব সংশোধনী বিধেয়কৰ বিৰুদ্ধে সমাৱেশ অনুষ্ঠিত কৰাৰ বিৰোধ নকৰোঁ। কিন্তু নাগৰিকত্ব সংশোধনী বিধেয়কৰ বিৰুদ্ধে অগপৰ সমাৱেশ এখন নাটক।”
অহা ২৩ অক্টোবৰত নাগৰিকত্ব সংশোধনী বিধেয়কৰ বিৰোধিতাৰে অগপই উলিওৱা সমাৱেশক লৈ আজি এই তাৎপৰ্য্যপূৰ্ণ মন্তব্য কৰিছে প্ৰদেশ কংগ্ৰেছৰ সভাপতি ৰিপুণ বৰাই।
আন এটা গুৰুত্বপূৰ্ণ মন্তব্যত বৰাই কয়, “অগপ নেতৃত্বই কৈ আছে যে বিধেয়কখন সংসদত গৃহীত হ’লে তেওঁলোক মিত্ৰজোঁটৰ পৰা ওলাই আহিব। কিন্তু জাতিধ্বংসী বিধেয়কখন গৃহীত হোৱাৰ পাছত ওলাই আহি অগপই কি কৰিব?”
উল্লেখযোগ্য যে আজি সাংবাদিকৰ আগত সাম্প্ৰতিক অসমৰ ৰাজনৈতিক প্ৰেক্ষাপটত গুৰুত্বপূৰ্ণ বিবেচিত আন কেইবাটাও মন্তব্য কৰে প্ৰদেশ কংগ্ৰেছৰ সভাপতিজনে।
অসমৰ বৃহত্তৰ স্বাৰ্থত অগপই ৩টা মন্ত্ৰিত্বৰ পদৰ মোহ এৰিব পৰা নাই –এই কথাটো আঙুলিয়াই সভাপতি ৰিপুণ বৰাই অগপক কয়, “আমাৰ আহ্বান আপোনালোকে বিধেয়কখন গৃহীত নহ’বলৈ কিবা এটা কৰক। তিনিজন মন্ত্ৰীয়ে অসম চৰকাৰৰ মন্ত্ৰিত্ব পদ ত্যাগ কৰিব নোৱাৰে নে?”
এই ক্ষেত্ৰত তেওঁ আত্মবিশ্বাসেৰে দাবী কৰি কয়, “অগপৰ তিনি মন্ত্ৰীয়ে মন্ত্ৰিত্ব পদ ত্যাগ কৰিলেই কেন্দ্ৰীয় চৰকাৰে বিধেয়কখন গৃহীত কৰাৰ ক্ষেত্ৰত থমকি ৰ’ব।”
আনহাতে একেদিনাই, অৰ্থাৎ ২৩ অক্টোবৰতে ৰাজ্যৰ ৪৬টা জাতীয়-জনগোষ্ঠীয় সংগঠনে আহ্বান জনোৱা অসম বন্ধলৈ প্ৰদেশ কংগ্ৰেছৰ সমৰ্থন থকা বুলি কয় ৰিপুণ বৰাই। তেওঁ সংবাদ মাধ্যমৰ আগত কয়, “এই বন্ধৰ প্ৰতি আমাৰ সমৰ্থ আছে। কাৰণ ৪৬টা সংগঠনে যি দাবীৰে অসম বন্ধৰ আহ্বান জনাইছে সেই দাবী কংগ্ৰেছৰো দাবী।”
উল্লেখ্য যে অহা ২৩ অক্তোবৰৰ দিনা যুটীয়া সংসদীয় সমিতিয়ে প্ৰতিশ্ৰুতি মতে, পুনৰবাৰ অসমলৈ শুনানিৰ বাবে নাহি কেবিনেটৰ সৈতে নাগৰিকত্ব সংশোধনী বিধেয়কৰ ক্ষেত্ৰত সিদ্ধান্ত গ্ৰহণ কৰিব বিচৰা বুলি অভিযোগ তুলি কৃষক মুক্তি সংগ্ৰাম সমিতি,অসম জাতীয়তাবাদী যুৱ ছাত্ৰ পৰিষদকে ধৰি ৪৬টা জাতীয়-জনগোষ্ঠীয় সংগঠনে উক্ত দিনটোত বাৰ ঘণ্টীয়া অসম বন্ধৰ আহ্বান জনাইছে।
বিষয়টোত মত প্ৰকাশ কৰি প্ৰদেশ কংগ্ৰেছৰ সভাপতি বৰাই এই কথাক দুৰ্ভাগ্যজনক আখ্যা দিয়ে।
তেওঁ আশ্বাস দি কয়, “সংসদত বিধেয়কখন উত্থাপন হ’লে কংগ্ৰেছৰ সাংসদসকলে বিৰোধিতা কৰিব। অন্যান্য বিৰোধী দলৰ সাংসদসকলকো এই বিলখনৰ বিৰোধিতা কৰিবলৈ আহ্বান জনোৱা হ’ব।”
