নামৰূপস্থিত অসম পেট্ৰকেমিকেলছ লিমিটেডত আজি ৫ অক্টোবৰত দেশৰ প্ৰথমটো মিথানল-ভিত্তিক ৰান্ধন ইন্ধনৰ পাইলট প্ৰজেক্টটোৰ উদ্বোধন কৰিছে। এই ইন্ধন এলপিজিতকৈ সস্তা হ’ব জানিব পৰা গৈছে।
নিটি আয়োগৰ সদস্য ভিকে স্বাৰস্বতে পৰিৱেশ-বান্ধৱ পৰিষ্কাৰ ইন্ধনৰ পাইলট প্ৰজেক্টটো উদ্বোধন কৰি পৰিৱেশ-বান্ধৱ ইন্ধনৰ দিশত এটা নতুন দিগন্তৰ সূচনা কৰে।নিটি আয়োগৰ ফ্লেগশ্বিপ কাৰ্যসূচীটোৱে ভাৰতৰ ‘মিথানল অৰ্থনীতি’ৰ ধাৰণাটোক এখোপ আগুৱাই দিছে।
স্বাৰস্বতে কৈছে যে নিটি আয়োগে এই কাৰ্যসূচীৰ জৰিয়তে অকল মিথানলেৰেই দেশৰ খাৰুৱা তেলৰ আমদানি ২০ শতাংশ হ্ৰাস কৰাৰ পৰিকল্পানা কৰিছে। তেওঁ আৰু কৈছে যে মিথানলৰ ব্যৱহাৰে অকল ৰন্ধন গেছৰ বৰ্ধিত মূল্যৰ সমস্যাই হ্ৰাস কৰাটোৱেই নহয়, ই ৪০ শতাংশ প্ৰদূষণো হ্ৰাস কৰিব।
উল্লেখ্য যে ‘মিথানল অৰ্থনীতি’ৰ ধাৰণাটো চীন, ইটালি, ছুইডেন, ইজৰাইল, যুক্তৰাষ্ট্ৰ, অষ্ট্ৰেলিয়া, জাপান আৰু বহুতো ইউৰোপীয় দেশত চলি আছে। চীনৰ ইন্ধনৰ ১০ শতাংশ হৈছে মিথানল।
অসম পেট্ৰকেমিকেলছ লিমিটেডৰ অধ্যক্ষ জগদীশ ভুঞাই কৈছে যে এই পাইলট প্ৰজেক্টৰ অধীনত সীমিত পৰিমাণে ছুলা আৰু মিথানল কেনিষ্টাৰ উপলব্ধ কৰোৱা হ’ব। ২ মাহৰ ভিতৰত কোম্পানীটোৱে বাণিজ্যিক হাৰত ইয়াৰ উৎপাদন আৰম্ভ কৰিব। প্ৰথম অৱস্থাত উত্তৰ-পূৰ্বাঞ্চলীয় ৰাজ্যসমূহত ইয়াক উপলব্ধ কৰোৱা হ’ব বুলিও ভুঞাই জনায়।
বৰ্তমানৰ ৰন্ধন গেছৰ তৰলীকৃত গেছ ৰূপৰ পৰিৱৰ্তে মিথানল বাষ্প ৰূপত আহিব আৰু জুইৰ সংস্পৰ্শত বিষ্ফোৰণ ঘটাৰ পৰিৱৰ্তে মিথানলৰ কেনিষ্টাৰটো জ্বলিহে যাব।
উদ্বোধনী অনুষ্ঠানত ‘মিথানল’ৰ কেন্দ্ৰীয় কমিটীৰ সদস্য প্ৰশান্ত গুৰু শ্ৰীনিৱাস আৰু অসম পেট্ৰকেমিকেলছ লিমিটেডৰ কেটালাক্টিক থিংক টেংক ফৰামৰ অধ্যক্ষ জগদীশ ভুৱা, উদ্যোগ আৰু বাণিজ্য বিভাগৰ অতিৰিক্ত মুখ্য সচিব ৰৱি কাপুৰ আৰু অসম পেট্ৰকেমিকেলছ লিমিটেডৰ উপাধ্যক্ষ বিকুল চন্দ্ৰ ডেকা উপস্থিত আছিল।