বিশ্বকাপৰ মাজতে হৃদয় বিদাৰক সংবাদ! ভূমিকম্পত মৃত্যু আৰ্জেণ্টিনাৰ তাৰকাৰ পত্নী আৰু সন্তানৰ

প্ৰকৃতিৰ ৰোষে কাকো ৰেহাই নিদিয়ে। এবাৰ নিজৰ শক্তি দেখুৱাবলৈ আৰম্ভ কৰিলেই নিৰ্বিশেষে সকলো কাঢ়ি নিয়ে। ভেনিজুৱেলাই পুনৰবাৰ প্ৰত্যক্ষ কৰিছে ইয়াৰ নিষ্ঠুৰ ৰূপ। ৰাজধানী কাৰাকাছকে ধৰি সেই দেশৰ এক বৃহৎ অংশ দুটাকৈ ভূমিকম্পৰ ফলত বিধ্বস্ত হৈছে। এই ভূমিকম্পৰ ফলতে আৰ্জেণ্টিনাৰ ফুটবলাৰ লুকাছ ট্ৰেজোৰ জীৱনো বিধ্বস্ত হৈ পৰিছে। কিছুদিন আগতেও যাক লৈয়ে আছিল তেওঁৰ পৃথিৱী, সেই পত্নী আৰু দুটা সন্তানক হেৰুৱাবলগীয়া হ’ল।

৭৪ ঘণ্টীয়া উদ্ধাৰ অভিযানৰ অন্তত ধ্বংসাৱশেষৰ পৰা উদ্ধাৰ কৰা হৈছে তেওঁলোকৰ নিথৰ মৃতদেহ। এই কৰুণ ঘটনাই সমগ্ৰ দক্ষিণ আমেৰিকাৰ ফুটবল জগতত শোকৰ ছাঁ পেলাইছে। ৩৮ বছৰীয়া লুকাছ ট্ৰেজোৱে ভেনিজুৱেলাৰ ক্লাব স্প’ৰ্ট মেৰিটিমো দে লা গুয়াৰাৰ হৈ খেলে।

যোৱা বুধবাৰে তেওঁ দলটোৰ সৈতে কাৰাকাছত আছিল। সেই সময়ত ভেনিজুৱেলাৰ উত্তৰ উপকূলত দ্ৰুতগতিত একেৰাহে ৭.২ আৰু ৭.৫ প্ৰাবল্যৰ দুটা ভূমিকম্পই আঘাত হানিছিল। ইয়াৰ ফলত উপকূলীয় অঞ্চলটোৰ ব্যাপক ক্ষতিসাধন হয়। কিছু সময়ৰ পিছতে ট্ৰেজোৱে গম পালে যে লা গুইৰাৰ প্লায়া গ্ৰেণ্ডেত থকা তেওঁলোকৰ এপাৰ্টমেণ্টটো সম্পূৰ্ণৰূপে ধ্বংস হৈছে। খবৰ পোৱাৰ লগে লগে তেওঁ লৰালৰিকৈ ক্ষতিগ্ৰস্ত অঞ্চললৈ যায়। তেওঁ নিজেই উদ্ধাৰ কৰ্মীৰ সৈতে গৈ পত্নী আৰু সন্তানৰ সন্ধানত নামি পৰে।

উদ্ধাৰ অভিযানৰ আৰম্ভণিতে ট্ৰেজোৱে ছ’চিয়েল মিডিয়াত লিখিছিল, “প্লায়া গ্ৰেণ্ডেৰ আমাৰ এপাৰ্টমেণ্টটো ভাঙি গৈছে। মোৰ পৰিয়ালৰ কোনো শুংসূত্ৰ নাই। সকলোৱে তেওঁলোকৰ বাবে প্ৰাৰ্থনা কৰক। যদি কোনোবাই তেওঁলোকক দেখিছে তেন্তে এই বাৰ্তা বিয়পাই দিয়ক। সেই সময়ত তেওঁলোক ঘৰৰ ভিতৰত নাছিল, মই এতিয়াও সেই কথা বিশ্বাস কৰিব বিচাৰো।”

এই খবৰ পোৱাৰ লগে লগে ট্ৰেজোৰ পিতৃ আৰু ভাতৃয়ে লৰালৰিকৈ আৰ্জেণ্টিনাৰ পৰা ভেনিজুৱেলালৈ যায়। লগতে অগ্নিনিৰ্বাপক বাহিনী, সেনা আৰু স্বেচ্ছাসেৱকৰ সৈতে কান্ধত কান্ধ মিলাই উদ্ধাৰ অভিযানত অংশগ্ৰহণ কৰে। কিন্তু কেইবা দিন, কেইবা ৰাতি পাৰ হৈ গ’ল, কিন্তু পৰিয়ালটো তেতিয়াও বিচাৰি পোৱা নগ’ল।

অৱশেষত ধ্বংসাৱশেষৰ পৰা উদ্ধাৰ হয় ট্ৰেজোৰ পত্নী য়ানিনা মাৰানেলা আৰু তেওঁলোকৰ দুটা সন্তান এৰন আৰু আইনহ’য়া। এই হৃদয়বিদাৰক ঘটনাৰ পিছতে ছ’চিয়েল মিডিয়াত সতীৰ্থ, প্ৰতিপক্ষৰ ফুটবলাৰ আৰু অনুৰাগীয়ে সমবেদনা জ্ঞাপন কৰে।

তেওঁৰ ঘনিষ্ঠ বন্ধু আৰ্জেণ্টিনাৰ ফুটবলাৰ এডছন টৰ্টলেৰ’ই লিখিছে, “আজি মোৰ হৃদয়খন টুকুৰা-টুকুৰ হৈ পৰিছে। এই বিৰাট যন্ত্ৰণা লাঘৱ কৰিবলৈ কোনো শব্দ নাই। মই ভগৱানৰ ওচৰত প্ৰাৰ্থনা কৰোঁ যে লুকাছে এই অকল্পনীয় ক্ষতি সহ্য কৰিবলৈ যাতে শক্তি বিচাৰি পায়।”

ভেনিজুৱেলাৰ ক্লাব স্প’ৰ্ট মেৰিটিমো দে লা গুয়াইৰাই দেওবাৰে এক বিবৃতিত ট্ৰেজোৰ পত্নী আৰু দুটা সন্তানৰ মৃত্যু নিশ্চিত কৰে। ক্লাবটোৱে কয় যে, “লুকাছ ট্ৰেজোৰ পত্নী য়ানিনা মাৰানেলা আৰু তেওঁলোকৰ সন্তান এৰন আৰু আইনহোয়াৰ মৃত্যুত আমি গভীৰভাৱে দুখী।‘’

এজন ফুটবলাৰৰ জীৱনৰ এই ট্ৰেজেডীয়ে সমগ্ৰ ফুটবল জগতখনক জোকাৰি গৈছে। লুকাছ ট্ৰেজোৰ জীৱনৰ তিনিজন আটাইতকৈ মূল্যৱান মানুহ ধ্বংসাৱশেষৰ মাজত চিৰদিনৰ বাবে হেৰাই গ’ল। আন্তঃৰাষ্ট্ৰীয় সংবাদ মাধ্যমৰ সূত্ৰ অনুসৰি ভেনিজুৱেলাত হোৱা ভূমিকম্পত মৃত্যু হোৱা লোকৰ সংখ্যা এহেজাৰ অতিক্ৰম কৰিছে।