টীম পলাৰিছৰ সদস্য অসমৰ অৰিন্দম শইকীয়াই লেহত ‘ৰেইড ড’ হিমালয়’ৰ (Raid de Himalaya ) খিতাপ জয় কৰিছে। ১৩ অক্টোবৰ শনিবাৰে অৰিন্দমে এই খিতাপ জয় কৰে।
কাৰ্গিলৰ পৰা ১০ অক্টোবৰত অৰিন্দমৰ এই গৌৰৱময় যাত্ৰা আৰম্ভ হৈছিল আৰু ১৩ অক্টোবৰত সমাপ্ত হৈছিল। তেওঁ কাৰ্গিল, জংস্কাৰ, লাডাখৰ মাজেৰে ৬.৩২.৪৯ ঘণ্টাত লেহত উপস্থিত হৈছিল। চালকসকলে অতি শীতৰ সৈতে মোহাবিলা কৰি এই অঞ্চলেৰে যাত্ৰা কৰিবলগীয়া হৈছিল।
দ্বিতীয় স্থান লাভ কৰিছে কেপ্টেইন এভিএছ গিলে। তেওঁ তেওঁৰ গ্ৰেণ্ড ভিটাৰাখনেৰে অৰিন্দমতকৈ ১০.৫৩ মিনিটত লক্ষ্যস্থানত উপনীত হৈছিল।
উজনি অসমৰ গোলাঘাটৰ বাসিন্দা অৰিন্দমে তেওঁৰ যাত্ৰাৰ প্ৰস্তুতি আৰম্ভ কৰিছিল ৪ বছৰ পূৰ্বে আৰম্ভ কৰিছিল। ইয়াৰ বাবে তেওঁ এখন প’লাৰিছ ক্ৰয় কৰিছিল।
অৰিন্দমে কয়, ‘মোৰ ২০ বছৰ বয়সৰ পৰাই বাজা-১০০০, মিণ্ট-৪০০, ডকাৰ আৰু আন আন আন্তৰ্জাতিক মানৰ অফ ৰ’ড মটৰ স্পৰ্ট ৰেলীত অংশগ্ৰহণ কৰাৰ সপোন পুহি ৰাখিছিলোঁ। মই ভাৰতৰ মটৰস্পৰ্টৰ শীৰ্ষস্থানীয় প্ৰতিযোগিতাত অংশগ্ৰহণ কৰাৰ সপোন পুহি ৰাখিছিলোঁ। মই প’লাৰিছখন মোৰ সপোন পূৰ্ণ কৰাৰ বাবে ক্ৰয় কৰিছিলোঁ।
২০১৫ত শইকীয়াই প্ৰথম প্ৰতিযোগিতাত অংশগ্ৰহণ কৰিছিল কিন্তু প্ৰতিযোগিতাৰ তৃতীয় দিনা এটা দুৰ্ঘটনাত পতিত হৈছিল। ২০১৬ত আকৌ অংশগ্ৰহণ কৰিছিল কিন্তু এগৰাকী বাইকাৰৰ মৃত্যু হোৱাত সেই বছৰৰ প্ৰতিযোগিতা বাতিল কৰা হৈছিল। ২০১৭ত তেওঁ প্ৰতিযোগিতাত অংশগ্ৰহণ কৰা নাছিল।
ৰেচাৰগৰাকীয়ে কৈছে যে ২০১৮ চনটো তেওঁৰ বাবে ডাঙৰ দিন। অফ ৰ’ড ৰেচিঙৰ বাবে বাহনৰ ছাছপেন্সন আৰু লঘূ ওজনৰ হোৱাটো খুব প্ৰয়োজনীয়। প’লাৰিছৰ ১০০০ চিচি ইঞ্জিনে ১১০ অশ্বশক্তি ক্ষমতা যোগান ধৰে। ইয়েই বাহনখনক যথেষ্ট শক্তি প্ৰদান কৰে।
উল্লেখ্য যে ‘ৰেইড ড’ হিমালয়’ হৈছে বিশ্বৰ আটাইতকৈ কঠিন ১০টা মটৰস্পৰ্ট ৰেলীৰ অন্যতম।
ইয়াৰ পূৰ্বে অৰিন্দমে জয়সালমীৰত অনুষ্ঠিত ইণ্ডিয়া বাজা- (India Baja)২০১৮ৰ এক্সট্ৰিম শাখাত ( Xtreme category) চেম্পিয়ন হৈছিল। খিতাপৰ দ্বাৰাই তেওঁ দক্ষিণ আমেৰিকাৰ ডকাৰ ৰেলী-২০১০ আৰু অফ্ৰিকিয়া মেৰজুৱাগা (Afriquia Merzouga) ৰেলী-২০১৯ত অংশগ্ৰহণৰ প্ৰত্যক্ষ প্ৰৱেশাধিকাৰ লাভ কৰিছে।