বিধায়ক জিগনেশ মেৱানিক গ্ৰেপ্তাৰ: প্ৰতিক্ৰিয়া ব্যক্ত কৰিলে ডঃ হীৰেন গোহাঁইয়ে
গুজৰাটৰ বিধায়ক জিগনেশ মেৱানিক কোকৰাঝাৰ আৰক্ষীয়ে গ্ৰেপ্তাৰ কৰাৰ পিছতে ভিন্ন মহলত তীব্ৰ প্ৰতিক্ৰিয়াৰ সৃষ্টি হৈছে।
এনে সময়তে বিশিষ্ট চিন্তাবিদ ডঃ হীৰেন গোহাঁইয়েও বিধায়ক জিগনেশ মেৱানিৰ গ্ৰেপ্তাৰকলৈ প্ৰতিক্ৰিয়া ব্যক্ত কৰিছে।
এক বিবৃতিত ডঃ গোহাঁইয়ে কয়—’অসম আৰক্ষীৰ এটা দলে সুদূৰ গুজৰাটলৈ গৈ জিগনেশ মেৱানিক গ্ৰেপ্তাৰ কৰাৰ ঘটনাই মোক হতভম্ব কৰিছে। আৰক্ষীয়ে কোনোবাই কাৰোবাৰ বিৰুদ্ধে ৰাজহুৱাকৈ তেওঁৰ প্ৰিয় নেতাৰ সম্পৰ্কে কটুক্তি কৰা বুলি এজাহাৰ দিলেই অভিযুক্তক গ্ৰেপ্তাৰ কৰিব পাৰে নে? তেনেহলে দেখোন দৈনিক হেজাৰ-বিজাৰ মানুহ গ্ৰেপ্তাৰ হ’ব লাগিব। এগৰাকী বিশিষ্ট আইনবিদক সোধাত ক’লে যে এই অভিযোগত কাকো গ্ৰেপ্তাৰ কৰিব নোৱাৰি।
মেৱানিৰ উক্তিটোৱে অসম নালাগে ক’তো আইন-শৃঙ্খলা,শান্তি-সম্প্ৰীতি বিঘ্নিত কৰা নাই। নিন্দাৰ পাত্ৰজন অৱশ্যে দেশৰ প্ৰধানমন্ত্ৰী। কিন্তু এই উক্তিয়ে প্ৰধান মন্ত্ৰী জনৰ কাম-কাজত বা কাৰ্যকৰী ক্ষমতা প্ৰয়োগত কোনো নেতিবাচক প্ৰভাৱ পেলাব নোৱাৰে। তেন্তে এই গ্ৰেপ্তাৰৰ যুক্তি কি? ই বাৰু বাকস্বাধীনতাৰ ওপৰত আৰক্ষী বা সমাজৰ কোনো বিশেষ মহলৰ অসঙ্গত আৰু অবৈধ অৱদমন নুসূচায় নে? এনে ঘটনা গণতান্ত্ৰিক দেশৰ বাবে এক লজ্জাকৰ আৰু গৰ্হিত নজিৰ। মই বিশ্বাস কৰোঁ যে জিগনেশ মেৱানিক অবিলম্বে স-সন্মানে মুক্তি দিয়া উচিত’।