কোটিপতি বিল গেটছৰ বিষয়ে পোহৰলৈ আহিছে এক চাঞ্চল্যকৰ দাবী। মাইক্ৰ’ছফ্টৰ সহ-প্ৰতিষ্ঠাপক গেটছ নিজেই যৌন সংক্ৰমিত ৰোগত (STD) আক্ৰান্ত হোৱাৰ লগতে প্ৰাক্তন পত্নীকো গোপনে ঔষধ প্ৰয়োগ কৰিবলৈ চেষ্টা কৰা বুলি অভিযোগ উঠিছে। শেহতীয়াকৈ মুক্তি পোৱা জেফ্ৰি এপষ্টেইন ফাইলছত গেটছৰ বিষয়ে এই গুৰুতৰ দাবী কৰা হৈছে।
গেটছৰ বিষয়ে এই চাঞ্চল্যকৰ দাবী এপষ্টেইনৰ নিজৰ এটা ইমেইলত পোৱা গৈছে। ২০১৩ চনত এপষ্টেইনে সেই ইমেইলটো নিজেই নিজৰ ওচৰলৈ প্ৰেৰণ কৰিছিল। শুকুৰবাৰে আমেৰিকাৰ ন্যায় বিভাগে জেফ্ৰি এপষ্টেইন ফাইলছৰ অধীনত প্ৰকাশ কৰা নতুন নথি-পত্ৰত এপষ্টেইনৰ ইমেইলটোও পোহৰলৈ আহিছে। অৱশ্যে তেওঁৰ অভিযোগৰ সত্যতা পৰীক্ষা কৰা হোৱা নাই।
সাধাৰণতে গেটছে তেওঁৰ বিষয়ে কোনো ধৰণৰ উৰাবাতৰি বা অভিযোগৰ উত্তৰ নিদিয়ে। কিন্তু নথি-পত্ৰ প্ৰকাশ পোৱাৰ লগে লগে তেওঁৰ হৈ বিবৃতি জাৰি কৰা হয়। কোৱা হৈছে, “দাবীবোৰ সম্পূৰ্ণ অৰ্থহীন আৰু মিছা। নথিখনত এটা কথা স্পষ্ট যে গেটছৰ সৈতে কোনো ধৰণৰ যোগাযোগ স্থাপন কৰিব নোৱাৰাৰ বাবে এপষ্টেইনে হতাশ হৈ পৰিছিল। গেটছক ফচাই বদনাম কৰিবলৈ তেওঁ কিমান দূৰ আগবাঢ়িব পাৰে সেয়া বুজা গৈছে।”
আমেৰিকাৰ ন্যায় বিভাগে প্ৰকাশ কৰিছে যে তেওঁলোকে এপষ্টেইনৰ সৈতে জড়িত ৩০ লাখ পৃষ্ঠাৰ নথি-পত্ৰ প্ৰকাশ কৰিছে। ২০০০ ভিডিঅ’ আৰু ১ লাখ ৮০ হাজাৰ ফটো মুকলি কৰা হৈছে। অৱশ্যে গেটছৰ বিষয়ে এপষ্টেইনৰ এই দাবীয়ে এই সকলোবোৰৰ মাজত আলোড়নৰ সৃষ্টি কৰিছে।
এপষ্টেইনে ২০১৩ চনৰ ১৮ জুলাইত এই ইমেইলটোৰ খচৰা প্ৰস্তুত কৰিছিল। কিছুমান লেখা গেটছৰ তেতিয়াৰ উপদেষ্টা বৰিছ নিকোলিচৰ বক্তব্য হিচাপেও লিপিবদ্ধ কৰা হৈছে। ইয়াৰ উপৰিও দাবী কৰা হৈছে যে বৰিছে গেটছৰ সংগঠন বিল এণ্ড মেলিণ্ডা গেটছ ফাউণ্ডেশ্যন যিকোনো প্ৰকাৰে ত্যাগ কৰিবলৈ হাহাকাৰ কৰিছিল।
বৰিছক উদ্ধৃতি দি এপষ্টেইনে ইমেইলটোত লিখিছে, “যোৱা কেইসপ্তাহমানৰ পৰা মই বাৰে বাৰে মেলিণ্ডা আৰু বিলৰ বৈবাহিক বিবাদৰ সৈতে জড়িত হৈ আছো। তেওঁৰ (গেটছৰ) সোঁহাতৰ মানুহ হিচাপে মোক এনে কিছুমান কাৰ্য্যকলাপত অংশগ্ৰহণ কৰিবলৈ কোৱা হৈছিল য’ত মইও ভুলবশত সন্মতি দিছিলো ।
বৰিছৰ উদ্ধৃতি দি এপষ্টেইনে এইটোও লিখিছে, “বিলক ড্ৰাগছ যোগান ধৰাৰ পৰা আৰম্ভ কৰি ৰাছিয়ান ছোৱালীৰ সৈতে যৌন সম্পৰ্কৰ পিছৰ পৰিণতিৰ সৈতে মোকাবিলা কৰালৈকে, বিবাহিত মহিলাৰ সৈতে তেওঁৰ অবৈধ সম্পৰ্কৰ ব্যৱস্থা কৰাৰ পৰা আৰম্ভ কৰি ব্ৰীজ টুৰ্নামেন্টৰ বাবে এডাৰল ড্ৰাগছ যোগান ধৰালৈকে… মই অনুভৱ কৰোঁ যে মোৰ নৈতিক ব্যৰ্থতাসমূহ মোৰ বন্ধু-বান্ধৱ আৰু ভৱিষ্যতৰ সহকৰ্মীসকলৰ আগত স্বীকাৰ কৰা, ক্ষমা বিচৰা আৰু আগবাঢ়ি যোৱাটো মোৰ কৰ্তব্য।”
গেটছলৈ লিখা আন এটা খচৰা ইমেইলত লিখা আছিল, “মোৰ কষ্টোপাৰ্জিত ছবিখন ঢাকি ৰখাৰ প্ৰয়াস। আপুনি মোক আপোনাৰ যৌন সংক্ৰামক ৰোগৰ ইমেইলবোৰ, মেলিণ্ডাক গোপনে এন্টিবায়টিক দিয়াৰ বাবে আপোনাৰ অনুৰোধ, আৰু আপোনাৰ লিংগৰ বিষয়ে আপোনাৰ বৰ্ণনা, সেইবোৰ মচি পেলাবলৈ মোক অনুৰোধ কৰিছে… মই আপোনাৰ কথাত চিন্তিত যে মেলিণ্ডাই হয়তো ৰাজহুৱাভাৱে বিবাহ বিচ্ছেদৰ বাবে গোচৰ ৰুজুৰ সিদ্ধান্ত ল’ব পাৰে…’।
জেফ্ৰি এপষ্টেইন ফাইলছৰ পৰা পোৱা তথ্য অনুসৰি বৰিছে পিছৰ মাহত এপষ্টেইনলৈ ইমেইল প্ৰেৰণ কৰিছিল। গেটছ ফাউণ্ডেশ্যন সম্পৰ্কীয় ‘চুক্তি’ৰ পৰা তেওঁ দুবছৰৰ ক্ষতিপূৰণ লাভ কৰিবলৈ ওলাইছে বুলিও কয়। গেটছৰ সৈতে এপষ্টেইনৰ কেইবাখনো ফটোও পোহৰলৈ আহিছে। আনকি এপষ্টেইনে সেই সম্পৰ্কত পিছলৈ উদ্ভৱ হোৱা সম্পৰ্কৰ ভাঙোনৰ বিষয়েও কেইবাটাও ইমেইল লিখিছিল।
২০১৯ চনত নিউয়ৰ্কৰ এখন কাৰাগাৰত এপষ্টেইনে আত্মহত্যা কৰিছিল। পিছত গেটছে তেওঁৰ সৈতে পূৰ্বৰ বন্ধুত্বৰ বাবে অনুশোচনা কৰা শুনা গৈছিল। তেওঁ দাবী কৰিছিল যে তেওঁৰ কেৱল এপষ্টেইনৰ সৈতে ব্যৱসায়িক সম্পৰ্ক আছিল আৰু তেওঁ কোনো অন্যায় কামত জড়িত নহয়। ১৯৯৪ চনৰ পৰা ২০২১ চনলৈ গেটছ আৰু মেলিণ্ডাৰ বৈবাহিক সম্পৰ্ক অটুট আছিল।পিছত মেলিণ্ডাই কয় যে এপষ্টেইনৰ সৈতে গেটছৰ বন্ধুত্ব তেওঁলোকৰ বিবাহ বিচ্ছেদৰ অন্যতম কাৰণ। অৱশ্যে তেওঁ কোনো সবিশেষ জনোৱা নাই।
