ক’ৰ’না ভাইৰাছৰ সংক্ৰমণ ৰোধৰ বাবে ঘোষিত তৃতীয় পৰ্যায়ৰ ল’কডাউনৰ সময়ত কিছু শিথিলতাৰ মাজেৰে বাছসেৱা আৰম্ভ হৈছে।
বৰ্তমানলৈ অসম ৰাজ্যিক পৰিবহন নিগমৰ অধীনৰ বাছ সমূহে চলাচল কৰিবলৈ অনুমতি প্ৰদান কৰা হৈছে।
ৰাজ্যৰ বিভিন্ন প্ৰান্তৰ সমান্তৰালভাৱে অসম ৰাজ্যিক পৰিবহন নিগমৰ বিশ্বনাথ চাৰিআলিৰ পৰা গুৱাহাটী অভিমুখী বাছ সেৱা আৰম্ভ হৈছে।
বিশেষ প্ৰয়োজন সাপেক্ষে যাবলগীয়া যাত্ৰী সকলে অসম ৰাজ্যিক পৰিবহন নিগমৰ অধীনৰ এই বাছ সমূহত যাত্ৰা কৰাৰ বাবে আগতীয়াকৈ বুকিং কৰিব লাগে।
ৰাজ্যিক পৰিবহন নিগমৰ অধ্যক্ষ অশোক ভট্টৰায়ে এই কথা সদৰী কৰে।
বিশ্বনাথ চাৰিআলিৰ অসম ৰাজ্যিক পৰিবহন নিগমৰ বাছ আস্থানৰ পৰা উপলব্ধ এই বিশেষ বাছসেৱা সন্দৰ্ভত তদাৰকৰ বাবে আজি অধ্যক্ষগৰাকী বিশ্বনাথ চাৰিআলিত উপস্থিত হয়।
উল্লেখযোগ্য যে, ল’কডাউনৰ সময়ত বিভিন্ন স্থানলৈ যাব বিচৰা যাত্ৰী সকলে অসম ৰাজ্যিক পৰিবহন বিভাগৰ বাছ সেৱাৰ সুবিধা ভোগ কৰিবলৈ হ’লে Redbus.in-ৰ জৰিয়তে টিকত বুক কৰিব লাগিব।
পৰিদৰ্শন কালত অধ্যক্ষগৰাকীয়ে যাত্ৰী সকলৰ সুবিধা-অসুবিধা আৰু প্ৰয়োজনীয় নীতি-নিৰ্দেশনা সমূহ পালন কৰা দিশ সমূহৰো বুজ লয়।
