পাকিস্তান-শ্ৰীলংকাৰ যৌথ আয়োজনত চলি থকা এছিয়া কাপৰ বাকী থকা কেইখনমান মেচৰ ক্ষেত্ৰত স্থান সলনিৰ চিন্তাচৰ্চা কৰিছে এছিয়ান ক্ৰিকেট কাউন্সিলে। মূলত: বতৰৰ বিঘিনিৰ বাবেই এই চিন্তা কৰিবলৈ বাধ্য হৈছে এছিয়ান ক্ৰিকেট সংস্থাটো।
প্ৰকাশিত খবৰ অনুসৰি, বৰষুণৰ প্ৰভাৱৰ বাবে এছিয়ান ক্ৰিকেট কাউন্সিলে এছিয়া কাপৰ ছুপাৰ ফ’ৰ মেচৰ স্থান কলম্বোৰ পৰা সলনি কৰাৰ কথা চিন্তা কৰিছে।
৯ ছেপ্টেম্বৰৰ পৰা কলম্বোত পাঁচখন ছুপাৰ ফ’ৰ মেচ আৰু ফাইনেল খেলৰ দিন ধাৰ্য কৰা হৈছে যদিও কলম্বোত বৰষুণ আশা কোনো লক্ষণ দেখা পোৱা নাই।
সেই প্ৰেক্ষাপটত বৰ্তমান এচিচিয়ে শ্ৰীলংকা ক্ৰিকেট আৰু পাকিস্তান ক্ৰিকেট ব’ৰ্ড (পিচিবি)ৰ সৈতে স্থানৰ সম্ভাৱ্য পৰিৱৰ্তনৰ বিষয়ে আলোচনাত মিলিত হৈছে।
এছিয়ান ক্ৰিকেট কাউন্সিলে মূলত: তিনিটা স্থান ক্ৰমে পালেকেলে, ডাম্বুলা আৰু হাম্বাণ্টোটা এই ক্ষেত্ৰত বিবেচনাধীন হৈ আছে বুলি জানিব পৰা গৈছে। ইতিমধ্যে অংশগ্ৰহণকাৰী ছটা দলক স্থানৰ সম্ভাৱ্য পৰিৱৰ্তনৰ বিষয়েও অৱগত কৰা হৈছে।
বৰ্তমান পালেকেলেই এছিয়া কাপ লীগৰ মেচ আয়োজন কৰিছে যদিও এই চহৰখনতো বৰষুণৰ সম্ভাৱনা অধিক। আনহাতে পালেকেলেৰ তুলনাত ডাম্বুল্লাৰ ক্ষেত্ৰত বৰষুণৰ সম্ভাৱনা বহু কম।
অৱশ্যে এছ এল চিৰ এগৰাকী বিষয়াই ডাম্বুলাৰ ৰংগিৰি আন্তঃৰাষ্ট্ৰীয় ক্ৰিকেট ষ্টেডিয়াম কম সময়ৰ ভিতৰতে ইমানবোৰ মেচ আয়োজন কৰিবলৈ সাজু নহ’বও পাৰে বুলি আশংকা প্ৰকাশ কৰিছে।
এই মুহূৰ্তত হাম্বাণ্টোটাই সম্ভাৱ্য স্থান হিচাপে বিবেচিত হৈছে। চহৰখনত আগন্তুক সময়ত বৰষুণৰ প্ৰায় সম্ভাৱনা নাই বুলি ভৱিষ্যদ্বাণী কৰা হৈছে।
