চোৰাংচোৱাৰ সন্দেহত শেহতীয়াকৈ দুজন যুৱকক আলফা স্বাধীন- এ মৃত্যুদণ্ড দিয়াৰ পাছত আলফাৰ এই কাণ্ডৰ সন্দৰ্ভত আজি এক প্ৰেচ বিজ্ঞপ্তি প্ৰকাশ কৰিছে অসম নাগৰিক সমাজে। আলফাৰ এই কাৰ্যক বৰ্বৰতা আখ্যা দি ধিক্কাৰ জনায় নাগৰিক সমাজে।
বিবৃতিটোত কোৱা হৈছে, “আলফাই দুজন ডেকা ল’ৰাক মৃত্যদণ্ড দিয়া বুলি শুনি আমি স্তম্ভিত আৰু হতবাক হৈছোঁ৷ অসম নাগৰিক সমাজৰ ফালৰ পৰা আমি একমুখে ইয়াৰ গৰিহণা দিছোঁ।”
“আলফাৰ মুৰব্বী পৰেশ বৰুৱাই আজিকালি সততে আক তাক ফোন কৰে৷ উপযাচি বাতৰি কাকতত, টিভিত দীঘলীয়া সাক্ষাৎকাৰ দিয়ে৷ তেওঁলোকৰ কথা-বতৰা, আওভাওৰ পৰা অনুমান হয় যে আলফাৰ নেতা,কৰ্মীসকল এতিয়া চৰকাৰৰ লগত আলোচনাত মিলিত হৈ সমাজ জীৱনৰ মূলসুঁতিলৈ ওভতি আহি এক স্বাভাৱিক জীৱন অতিবাহিত কৰিবলৈ যেন হামৰাও কাঢ়ি আছে।”
“এনে সময়ত, দুজন ডেকা ল’ৰাক শীতল মস্তিষ্কৰে হত্যা কৰাটোৱে কি বুজাইছে? আজিৰ এই পৰিস্থিতিত অসম, অসমীয়াৰ হৈ মাত মতাৰ, কথা কোৱাৰ তেওঁলোকৰ অধিকাৰ আছেনে? আৰু চৰকাৰে কি কৰিছে? চৰকাৰৰ হৈ চোৰাংচোৱা কৰা-এইবোৰ আমি কি শুনিছোঁ?”
“এই ক্ষেত্ৰত অসম চৰকাৰে দায়সৰা মন্তব্য কোনোপধ্যেই গ্ৰহণযোগ্য নহয়৷এই ডেকা ল’ৰা দুজনৰ হত্যাৰ দায়িত্ব এতিয়া কোনে ল’ব? কাৰ চক্ৰান্তৰ বলি হৈ এই ডেকা ল’ৰা দুজনে এনেকৈ জীৱন দিব লগা হ’ল?”
“মানুহৰ জীৱনক লৈ এনেদৰে হেতালি খেলাটো চৰকাৰ আৰু আলফা উভয়ৰ ক্ষেত্ৰতে এক নিকৃষ্ট ৰাজনীতি৷ আমি সকলোৱে সমস্বৰে ইয়াৰ নিন্দা কৰোঁ,গৰিহণা দিওঁ৷ আমি বিচাৰোঁ এই বৰ্বৰতা বন্ধ হওক।”