এইবাৰ যশস্বী অভিনেতা আদিল হুছেইনক দেখা যাব আমেৰিকাৰ বিখ্যাত ৱেব টেলিভিজন ছিৰিজ ‘Star Trek: Discovery’ত।
২০২০ বৰ্ষত প্ৰিমিয়াৰ হ’বলগীয়া জনপ্ৰিয় ছাই-ফাই ছিৰিজটোৰ ৩য় ছিজনত এক অন্যতম মুখ্য ভূমিকাত অভিনয় কৰিছে অসমৰ আদিল হুছেইনে।
যোৱা শনিবাৰ অৰ্থাৎ ৫ অক্টোবৰত New York Comic-Conত ‘Star Trek: Discovery’ ছিজন ৩ৰ প্ৰথমটো ট্ৰেইলাৰৰ প্ৰিমিয়াৰ হৈ যায়।
#StarTrekDiscovery takes fans 930 years into the future at #NYCC #StarTrekNYCC https://t.co/6WRTcSa4d0 pic.twitter.com/c1hnkYmGC5
— Star Trek (@StarTrek) October 5, 2019
‘ভায়া মামা’ৰ জৰিয়তে অভিনয় যাত্ৰা আৰম্ভ কৰা গোৱালপাৰাৰ আদিল হুছেইনে ইতিমধ্যে বলিষ্ঠ অভিনয়ৰ বলত নিজকে এগৰাকী আন্তঃৰাষ্ট্ৰীয় মানদণ্ডৰ অভিনেতা হিচাপে প্ৰতিষ্ঠা কৰিছে।
উল্লেখযোগ্য যে কালি অৰ্থাৎ ৫ অক্টোবৰত ৫৬ বছৰত ভৰি দিয়া আদিল হুছেইনে অভিনয় কৰা দুখন চলচ্চিত্ৰ ‘ৰাহগীৰ’ আৰু ‘নিৰ্বাণ ইন’ৰ এইবাৰ বুচান আন্ত:ৰাষ্ট্ৰীয় চলচ্চিত্ৰ মহোৎসৱ ২০১৯’ত ৱৰ্ল্ড প্ৰিমিয়াৰ হয়।
দুয়োখন চলচ্চিত্ৰতে আদিলে পুৰুষৰ মূল ভূমিকাত অভিনয় কৰিছে। ‘ৰাহগীৰ’ৰ পৰিচালনা গৌতম ঘোষৰ আৰু ছবিখন প্ৰযোজনা কৰিছে অমিত আগৰৱালাই। আনহাতে, ‘নিৰ্বাণ ইন’ৰ পৰিচলনা বিজয় জয়পালৰ।
