প্ৰধান মন্ত্ৰী নৰেন্দ্ৰ মোদীৰ অসম ভ্রমণৰ বিৰোধিতা জনাই আজি অসম জাতীয়তাবাদী যুৱ ছাত্ৰ পৰিষদে ৰাজ্যৰ বিভিন্ন প্ৰান্তত ব্যাপক প্ৰতিবাদী কাৰ্যসূচী ৰূপায়ণ কৰে।
মাৰ্ঘেৰিটা : আন আন ঠাইৰ লগতে মাৰ্ঘেৰিটাতো অসম জাতীয়তাবাদী যুৱ ছাত্ৰ পৰিষদে নৰেন্দ্ৰ মোদীৰ অসম ভ্ৰমণৰ তীব্ৰ প্ৰতিবাদ জনায়। মাৰ্ঘেৰিটাৰ লিডু কেলেজ তিনিআলিৰ ৩৮ নং ৰাষ্টীয় ঘাইপথত যুৱ ছাত্ৰ পৰিষদৰ তিনিচুকীয়া জিলা সমিতিৰ ভাৰপ্ৰাপ্ত সাধাৰণ সম্পাদক কাঞ্চন বৰাৰ নেতৃত্বত অৰ্ধ শতাধিক সদস্যই প্ৰতিবাদ সাব্যস্ত কৰে।
প্ৰতিবাদকাৰীসকলে নৰেন্দ্ৰ মোদীৰ প্ৰতিকৃতি দাহ কৰাৰ লগতে বিজেপি চৰকাৰ বিৰোধী বিভিন্ন শ্ল’গানেৰে আকাশ-বতাহ কঁপাই তুলি পৰিৱেশ উত্তাল কৰি তোলে।
বিশ্বনাথ : নাগৰিত্ব সংশোধনী বিধেয়ক আৰু নৰেন্দ্ৰ মোদীৰ অসম ভ্ৰমণৰ প্ৰতিবাদত বিশ্বনাথ চাৰিআলিৰ মাজমজিয়াত আজি অসম জাতিয়তাবাদী যুৱ ছাত্ৰ পৰিষদে তীব্ৰ প্ৰতিবাদ সাব্যস্ত কৰে।
প্ৰতিবাদকাৰী সকলে জাতিধ্বংসী নাগৰিকত্ব সংশোধনী বিধেয়ক বাতিলৰ লগতে প্ৰধান মন্ত্ৰী নৰেন্দ্ৰ মোদীৰ অসম ভ্ৰমণ কাৰ্যসূচীক তিব্ৰ বিৰোধিতা জনাই হাতে-হাতে কলা পতাকা লৈ প্ৰধান মন্ত্ৰী গৰাকীৰ প্ৰতিকৃতি দাহ কৰে।
অসম জাতিয়তাবাদী যুৱ ছাত্ৰ পৰিষদৰ উপৰি বিশ্বনাথত আজি আছু আৰু ৩০টা সংগঠনেও বিক্ষোভ প্ৰদৰ্শন কৰি নগৰৰ মাজমজিয়াত বিজেপি চৰকাৰৰ বিৰুদ্ধে বিভিন্ন শ্ল’গান দি এক উত্তাল পৰিবেশৰ সৃষ্টি কৰে।