দৈনিক ৩৫০টকাকৈ ন্যূনতম মজুৰিৰে “অচ্ছে দিন”ৰ প্ৰতিশ্ৰুতি দিয়া নৰেন্দ্ৰ মোদীৰ শাসনত অসমৰ খোদ চৰকাৰী চাহ বাগানতে আজি পৰ্য্যন্ত প্ৰতিশ্ৰুত মজুৰিৰ তিনি গুণতকৈও কমহে আদায় দি অহাৰ প্ৰতিবাদত অহা ৮ জানুৱাৰিত অসম বন্ধৰ আহ্বান জনাইছে অসম চাহ মজদুৰ সংঘই।
অহা ৮ আৰু ৯ জানুৱাৰিত মোদী চৰকাৰৰ বিৰুদ্ধে সৰ্বভাৰতীয় শ্ৰমিক সংগঠন এ আই টি ইউ চি আহ্বায়িত ধৰ্মঘটলৈ সমৰ্থন জনোৱাৰ লগতে এই অসম বন্ধৰ কথা বুধবাৰে ঘোষণা কৰিছে সংঘৰ সাধাৰণ সম্পাদক ৰূপেশ গোৱালাই।
“যোৱা ২০১৪ৰ লোকসভা নিৰ্বাচনত অসমৰ বিভিন্ন নিৰ্বাচনী সভাত নৰেন্দ্ৰ মোদীয়ে এই প্ৰতিশ্ৰুতি প্ৰদান কৰিছিল। কিন্তু খোদ বিজেপি নেতৃত্বাধীন অসম চৰকাৰেই আজিলৈকে ৩৫০ টকাৰ ন্যূনতম মজুৰি নিৰ্ধাৰণ কৰা নাই,” মোদীৰ প্ৰতিশ্ৰুতিৰ কথা উল্লেখ কৰি এই মন্তব্য গোৱালাৰ।
ব্যক্তিগত চাহ বাগানসমূহতকৈও নিম্ন মজুৰি প্ৰদান কৰি আহিছে অসম চৰকাৰৰ অধীনৰ বাগানসমূহে। “ব্যক্তিগত কোম্পানিৰ বাগানসমূহত শ্ৰমিকৰ দৈনিক মজুৰি ১৬৭ টকা হোৱাৰ বিপৰীতে অসম চৰকাৰৰ অসম চাহ কোম্পানি লিমিতেদ (ATCL)ৰ অধীনত ১৪খন বাগানত কাম কৰি থকা ২৬ হাজাৰ শ্ৰমিকৰ দৈনিক মজুৰি মাত্ৰ ১১৫ টকা,” গোৱালাই জনালে।
আনহাতে ব্ৰহ্মপুত্ৰ উপত্যকাৰ শ্ৰমিকসকলে ১৬৭ টকাকৈ মজুৰি পোৱাৰ বিপৰীতে বৰাকৰ বাগানৰ শ্ৰমিকসকলে লাভ কৰে ১৪৫ টকা।
গোৱালাই লগতে কয় যে যোৱা ২৮ ছেপ্তেম্বৰত নতুন দিল্লীত অনুষ্ঠিত দেশৰ শ্ৰমিক সংগঠনসমূহৰ অভিৱৰ্তনটো সংঘই অসমৰ চাহ বাগানৰ শ্ৰমিকসকলৰ সমস্যাৰ কথা উত্থাপন কৰিছে।
