ভাৰত-বাংলাদেশ সীমান্তৰ আন্তঃগাঁথনি নিৰ্মাণ প্ৰকল্পত সংঘটিত হোৱা এক বৃহৎ বিত্তীয় কেলেংকাৰী শেহতীয়াকৈ পোহৰলৈ আহিছে। প্ৰায় ৬০.৩০ কোটি টকাৰ উৎকোচ আৰু অবৈধ ধন লেনদেনৰ এক গুৰুতৰ অভিযোগত প্ৰৱৰ্তন সঞ্চালকালয়ে (ইডি) অসমৰ এখন বিশেষ আদালতত ‘ধন সৰ্বৰাহ প্ৰতিৰোধ আইন’ৰ (PMLA) অধীনত অভিযোগনামা দাখিল কৰিছে। ৰাষ্ট্ৰীয় প্ৰকল্প নিৰ্মাণ নিগম লিমিটেডৰ (NPCC) কেইবাজনো কাৰ্যৰত আৰু প্ৰাক্তন বিষয়াৰ লগতে ব্যক্তিগত নিৰ্মাণ প্ৰতিষ্ঠানৰ সঞ্চালকক এই গোচৰত অভিযুক্ত কৰা হৈছে। অভিযুক্তসকলৰ ভিতৰত এন পি চি চিৰ উত্তৰ-পূব মণ্ডলৰ প্ৰাক্তন জ’নেল মেনেজাৰ ৰাকেশ মোহন কোতৱাল, জলপাইগুৰি প্ৰকল্প কাৰ্যালয়ৰ ভাৰপ্ৰাপ্ত বিষয়া লতিফুল পাছা, মেচাৰ্ছ শ্ৰী গৌতম কনষ্ট্ৰাকচন কোম্পানী লিমিটেডৰ সঞ্চালক অনীশ বৈদ আৰু বিনোদ সিঙী আদি প্ৰধান।
প্ৰৱৰ্তন সঞ্চালকালয়ৰ তথ্য অনুসৰি, এই কেলেংকাৰীটো সীমান্ত সুৰক্ষা বলৰ (বিএছএফ) হৈ এন পি চি চি-য়ে আবণ্টন দিয়া নটা সীমান্ত চকী (BOP) নিৰ্মাণৰ ঠিকাৰ সৈতে জড়িত। এই সন্দৰ্ভত অভিযুক্ত বিষয়াদ্বয় ৰাকেশ মোহন কোতৱাল আৰু লতিফুল পাছাই নিৰ্মাণ প্ৰতিষ্ঠানটোৰ পৰা ২.২৪ কোটি টকাৰ বকেয়া বিল মুকলি কৰাৰ বিনিময়ত প্ৰথমে ৩৩ লাখ টকা আৰু পৰৱৰ্তী সময়ত বুজাবুজিৰ মাজেৰে ৩০ লাখ টকাৰ উৎকোচ দাবী কৰিছিল। চি বি আই-এ ৰুজু কৰা এখন এজাহাৰৰ ভিত্তিত আৰম্ভ হোৱা তদন্তত শিলচৰ, গুৱাহাটী আৰু দিল্লীৰ মাজত সক্ৰিয় হৈ থকা এটা হাৱালা চক্ৰৰ জৰিয়তে অবৈধ ধনৰ লেনদেনৰ তথ্য পোহৰলৈ আহে।
প্ৰাপ্ত তথ্য অনুসৰি, ২০১৯ চনৰ ১৪ জুলাইত দিল্লীৰ এখন হোটেলত চি বি আই-এ অভিযান চলাই এই ধন হস্তান্তৰ কৰাৰ সময়তে সুনীল কুমাৰ নামৰ এজন লোকৰ পৰা নগদ ২৫ লাখ টকা জব্দ কৰিছিল। ইয়াৰ উপৰিও, ইডিয়ে শিলচৰৰ এখন হুণ্ডাই শ্ব’ৰুমৰ পৰাও অতিৰিক্ত ১৫ লাখ টকা নগদ ধন জব্দ কৰিবলৈ সক্ষম হয়, যি ধন অভিযুক্ত বিনোদ সিঙীৰ নিৰ্দেশত লুকুৱাই ৰখা হৈছিল বুলি বিভাগীয় সূত্ৰই প্ৰকাশ কৰিছে। তদন্তকাৰী সংস্থাটোৱে দাবী কৰা অনুসৰি অভিযুক্ত বিষয়াসকলে অঞ্চলটোৰ আন বহুকেইজন ঠিকাদাৰৰ পৰাও অনুৰূপ ধৰণে অবৈধ ধন দাবী কৰিছিল, যিয়ে সমগ্ৰ ব্যৱস্থাটোত চলি থকা দুৰ্নীতিৰ এক ভয়াবহ চিত্ৰ ডাঙি ধৰিছে।
বৰ্তমান এই গোচৰত অভিযুক্ত সকলোৰে বিৰুদ্ধে ২০০২ চনৰ ‘ধন সৰবৰাহ প্ৰতিৰোধ আইন’ৰ (PMLA) ৩ নং ধাৰাৰ অধীনত গোচৰ ৰুজু কৰা হৈছে বুলি জানিব পৰা গৈছে।
